Luka 1
1
O le ‘Upu Tomua
1E to‘atele ‘ua taumafai ‘ona tusi fa‘asolo le tala i mea ‘ua māe‘a ‘ona faia i o tatou luma. 2E fa‘apei ‘ona tu‘uina mai ‘iā te i tatou e i latou na matamata ai, o ē fo‘i ‘ua fai ma ‘au‘auna a le ‘upu talu le amataga; 3o le mea lea ‘ua ‘ou manatu ai, ‘ona ‘ua ‘ou matuā su‘e i mea uma lava talu le amataga, ‘ou te tusi fa‘asolo atu ‘iā te oe le ali‘i e, Teofilo,#1.3 Teofilo: mai le gagana Eleni; “o i latou o ē ‘ua alofaina e le Atua” (va‘ai i le Galu 1.1). 4‘ina ‘ia e silafia le moni o tala ‘ua a‘oa‘oina ai oe.
O le Fa‘alauiloaina o le Fānau mai o Ioane Papatiso
5O ona po o Herota le tupu o Iutaia,#1.5 Iutaia: O le igoa lenei e uiga i le ‘ele‘ele ‘atoa i Palisitina. sa i ai le tasi ositaulaga e igoa ‘iā Sakaria sa i le vasega o Avia; o lana avā fo‘i o le sā Aronā, e igoa ‘iā Elisapeta, #1 No 24.10 6Sa amiotonu i lā‘ua i luma o le Atua, o sāvavali i poloa‘iga ma tulafono uma a le Ali‘i e lē mata‘uleagaina. 7A ‘ua leai sa la fānau, ‘ina ‘ua pā o Elisapeta ‘ua matutua lava fo‘i i lā‘ua uma.
8‘Ua faia e ia le faiva o le ositaulaga i luma o le Atua, e ‘auai i lona vasega, 9pei o le tu a ositaulaga, ‘ua tofia ai o ia ‘ina ‘ua pa‘ū ‘iā te ia le vili, e ulu i le malumalu o le Ali‘i e fa‘amū ai mea manogi. 10‘Ua tatalo fo‘i i fafo le motu o tagata uma i le itū aso e mū ai mea manogi.
11‘Ona fa‘aali lea ‘iā te ia le agelu a le Ali‘i, o lo‘o tu i le itū taumatau o le fata e mū ai mea manogi. 12‘Ua iloa e Sakaria, ‘ona atuatuvale ai lea, ‘ua o‘o ‘iā te ia le mata‘u. 13A ‘ua fa‘apea mai le agelu ‘iā te ia, “Sakaria e, ‘aua ‘e te mata‘u; auā ‘ua fa‘afofogaina lau tatalo; e fānau lau avā o Elisapeta sou atali‘i, ‘e te fa‘aigoa ‘iā te ia o Ioane. 14E ‘iā te oe le fiafia ma le ‘oli‘oli; e to‘atele fo‘i ē fiafia i lona fānau mai. 15Auā e sili o ia i luma o le Ali‘i; e lē inu o ia i le uaina po o le ‘ava malosi; e fa‘atumuina fo‘i o ia i le Agaga Pa‘ia e āfua i lona fānau mai. #Nume 6.3 16E fa‘aliliu e ia le fānauga a Isaraelu e to‘atele i le Ali‘i lo latou Atua. 17E muamua atu o ia i ona luma ma le agaga ma le malosi o Elia, e fa‘aliliu loto o tamā i le fānau, e fa‘aliliu fo‘i ē ‘ua fa‘alogogatā i le poto o ē amiotonu; e sauni le nu‘u e fa‘atatauina mo le Ali‘i.” #Mala 4.5-6
18‘Ona fai atu lea o Sakaria i le agelu, “Pe fa‘apefea ‘ona ‘ou iloa le mea nei? Auā ‘ua ‘ou toeaina, o la‘u avā fo‘i ‘ua lo‘omatua ia.”
19‘Ua tali mai le agelu, “O a‘u o Kaperielu, o lē tu i luma o le Atua; ‘ua ‘auina mai a‘u e fai atu, ma ta‘u atu ‘iā te oe lenei tala lelei. #Tani 8.16; 9.21 20Fa‘auta fo‘i e gūgū oe, ‘e te lē magagana se‘ia o‘o i le aso e fai ai nei mea, auā ‘ua e lē talitonu mai i a‘u ‘upu, o mea ia e taunu‘u lava pe a o‘o i ona po.”
21O lo‘o fa‘atali le nu‘u ‘iā Sakaria, ma ofo ‘ina ‘ua fa‘atuai o ia i le malumalu. 22‘Ua alu ia i fafo, a ‘ua lē magagana ‘iā te i latou; ‘Ua latou iloa ai ‘ua na va‘aia se fa‘aaliga i le malumalu; a o ia ‘ua genogeno atu ‘iā te i latou, ‘ua gūgū pea o ia.
23‘Ua uma ona aso na fai ai le galuega, ‘ona alu ai lea o ia i lona ‘āiga. 24‘Ua mavae ia aso, ‘ona tō lea o Elisapeta lana avā, ‘ua nofo fa‘alilo o ia i ona masina e lima, ‘ua fa‘apea ane, 25“‘Ua fa‘apea ‘ona faia e le Ali‘i ‘iā te a‘u i ona aso ‘ua silasila mai ai o ia, e ‘ave ‘ese ai lo‘u luma i tagata.”
O le Fa‘alauiloaina o le Fānau mai o Iesu
26O le ono o masina ‘ua ‘auina mai ai e le Atua o le agelu o Kaperielu i le ‘a‘ai o Kalilaia, o Nasareta le igoa, 27i le taupou o le ‘āiga o Tavita, ‘ua faufautane i le tagata e igoa ‘iā Iosefa; o Maria fo‘i le igoa o le taupou. #Mata 1.18 28‘Ua ulufale mai le agelu ‘iā te ia ‘ona fa‘apea mai lea o ia, “Si ‘ou alofa ‘iā te oe lē ‘ua alofaina, ‘ua ‘iā te oe le Ali‘i.”
29A ‘ua atuatuvale o ia i lana ‘upu, ‘ua taumanatunatu fo‘i o ia, pe se a le uiga o lenei alofa‘aga. 30‘Ua fai mai fo‘i le agelu ‘iā te ia, “Maria e, ‘aua ‘e te fefe; auā ‘ua alofaina mai oe e le Atua. 31Fa‘auta fo‘i, o le a tō oe, ma e fānauina se tama tane, ‘e te fa‘aigoa ‘iā te ia o Iesu. #Mata 1.21 32E sili o ia, e ta‘ua fo‘i o le Alo o le Silisili‘ese; e foa‘i atu e le Ali‘i le Atua ‘iā te ia le nofoa‘iga a Tavita lona tamā. #2 Samu 7.12, 13, 16; Isai 9.7 33E fai o ia ma tupu i le ‘āiga o Iakopo e fa‘avavau; o lona mālō fo‘i e leai sona gata‘aga.”
34‘Ona fai atu lea o Maria i le agelu, “A fa‘apefea le mea nei; auā ‘ou te lē iloa se tane?”
35‘Ua tali mai le agelu, ‘iā te ia, “E afio ifo le Agaga Pa‘ia i luga ‘iā te oe, e fa‘amalumalu ifo fo‘i ‘iā te oe le mana o lē Silisili‘ese; o le mea lea e ta‘ua ai le tama pa‘ia e fānau mai, o le Alo o le Atua. 36Fa‘auta fo‘i, o lou ‘āiga o Elisapeta, ‘ua tō o ia ‘ina ‘ua lo‘omatua, o le tama tane fo‘i lana tama; o le onoga masina lenei i lē ‘ua ta‘ua e pā. 37Auā e leai lava se mea e tasi e lē mafaia e le Atua.” #Kene 18.14
38‘Ua fai atu Maria, “Fa‘auta, o a‘u nei o le ‘au‘auna a le Ali‘i; ‘ia faia ‘iā te a‘u e tusa ma lana fetalaiga.” ‘Ona alu ‘ese ai lea o le agelu ‘iā te ia.
O le Asiasiga a Maria ‘iā Elisapeta
39‘Ua tula‘i Maria i ia ona aso, ‘ua fa‘atelevave atu i le atu mauga, i le tasi ‘a‘ai o Iuta; 40‘ua ulu atu fo‘i o ia i le fale o Sakaria, ma alofa atu ‘iā Elisapeta. 41‘Ua fa‘alogo mai Elisapeta i le alofa o Maria, ‘ona osooso ai lea o le tama i lona manava; ‘ua fa‘atumuina fo‘i Elisapeta i le Agaga Pa‘ia; 42‘ua ‘alaga ia, ‘ua leo tele, ‘ua fa‘apea mai, “‘Amu‘ia oe i fafine, ‘amu‘ia fo‘i lē a fānau mai ‘iā te oe. 43Pe fa‘apefea fo‘i lenei mea, ‘ina ‘ua sau le tinā o lo‘u Ali‘i ‘iā te a‘u nei? 44Fa‘auta fo‘i, ‘ua o‘o mai le leo o lou alofa i o‘u taliga, ‘ona osooso ai lea o le tama i lo‘u manava ma le ‘oli‘oli. 45E manuia fo‘i le fafine e talitonu, e taunu‘u mea ‘ua fetalai mai ai le Ali‘i ‘iā te ia.”
O le Pese a Maria
46‘Ona fai ane lea o Maria, #1 Samu 2.1-10
“‘Ua vivi‘i atu lo‘u loto i le Ali‘i.
47‘Ua ‘oli‘oli fo‘i lo‘u agaga i le Atua lo‘u Fa‘aola;
48auā ‘ua silasila mai o ia i lana ‘au‘auna fafine ‘ua fa‘amaulaloina; #1 Samu 1.11
auā e amata mai nei ‘ona fa‘a‘amu‘ia mai ‘iā te a‘u o tupulaga uma.
49Auā o Lē e ona le mana ‘ua faia e ia mea silisili mo a‘u;
e pa‘ia fo‘i lona suafa.
50O lona alofa fo‘i i ē matata‘u ‘iā te ia,
e āu tupulaga lava lea.
51‘Ua ia fa‘aalia le malosi i lona ‘a‘ao,
‘ua fa‘ata‘ape‘apeina e ia o ē fa‘amaualuluga i manatu o o latou loto.
52‘Ua tulei ifo e ia o ali‘i nai o latou nofoāli‘i, #Iopu 5.11; 12.19
a ‘ua fa‘aeaina e ia o ē fa‘amaulalo.
53‘Ua fagaina e ia i mea lelei ē sa fia ‘a‘ai,
a o ē mau mea ‘ua aufuaina atu e ia.
54‘Ua fesoasoani o ia i lana ‘au‘auna o Isaraelu,
55‘ina ‘ua manatua lona alofa ‘iā Aperaamo,
mā ana fānau e fa‘avavau, pei ‘ona fetalai mai o ia i o tatou tamā.”
56‘Ua nofo Maria ma ia, pe tolu masina, ‘ona fo‘i ai lea o ia i lona ‘āiga.
O le Fānau mai o Ioane le Papatiso
57‘Ua o‘o i le masina o Elisapeta e fānau ai, ‘ona fānau ai lea e ia o le tama tane. 58‘Ua fa‘alogo ē ‘ua latou tuā‘oi ‘atoa ma lona ‘āiga, ‘ua alofa tele mai le Ali‘i ‘iā te ia ‘ona ‘oli‘oli ai lea o i latou fa‘atasi ma ia.
59‘Ua o‘o i le aso valu, ‘ona ō mai lea o i latou e peritome ai le tama, o le a fa‘aigoa e i latou ‘iā te ia i le igoa o lona tamā, o Sakaria. #Levi 12.3 60A ‘ua fai atu lona tinā ‘ua fa‘apea atu, “‘Aua; e igoa lava o ia ‘iā Ioane.”
61‘Ona latou fai mai lea ‘iā te ia, “E leai se tasi o lo‘u ‘āiga e igoa i lea igoa.” 62‘Ua latou genogeno atu i lona tamā, pe se a lona loto i sona igoa.
63‘Ona fai ane lea o ia i se papatusi e ‘aumai, ‘ona tusi ai lea e ia, ‘ua fa‘apea, “O Ioane lona igoa.” ‘Ona latou ofo uma ai lea. 64‘Ona matala loa lea o lona gutu ma lona laulaufaiva, ‘ua tautala lea o ia, ma fa‘afetai i le Atua. 65‘Ua o‘o ai le mata‘u i ē ‘ua latou tuā‘oi uma, ‘ua so‘o fo‘i le atu mauga uma, o Iutaia i le tala i nei mea uma. 66O i latou uma na fa‘alogo ai ‘ua mānatunatu i ai, ‘ua fa‘apea ane, “Pe i‘u la ‘ina fa‘apefea lenā tama?” Auā ‘ua ‘iā te ia le ‘a‘ao o le Ali‘i.
O le Perofetaga a Sakaria
67‘Ua fa‘atumuina Sakaria lona tamā i le Agaga Pa‘ia, ‘ona perofeta ane ai lea o ia, ‘ua fa‘apea ane:
68“‘Ia vi‘ia le Ali‘i le Atua o Isaraelu,
‘ina ‘ua asiasi mai o ia ma togiolaina lona nu‘u.
69Ma ‘ua fa‘atūina le fa‘aolataga mamana
mo i tatou i le ‘āiga #1.69 ‘āiga: mai le gagana Eleni “oikos” ‘au ‘āiga po o latou uma o ē tau i le gafa i le tupu o Tavita. o lana ‘au‘auna o Tavita.
70Fa‘apei ‘ona fetalai mai o ia i fofoga o ana perofeta pa‘ia talu mai anamua,
71‘ina ‘ia fa‘aolaina i tatou mai ē ‘ua fai i tatou ma fili,
mai lima fo‘i o ē ‘ino‘ino mai ‘iā te i tatou.
72E faia le alofa ‘ua folafolaina mai i o tatou tamā
e manatua fo‘i lana feagaiga pa‘ia;
73le tautoga na ia tautō ai,
‘iā Aperaamo lo tatou tamā.
74E foa‘i mai ‘ina ‘ia lavea‘iina i tatou mai lima o ē ita mai,
tatou te lē fefefe ai, ‘ae ‘au‘auna ‘iā te ia,
75ma le pa‘ia ma le amiotonu,
i ona luma i aso uma o lo tatou ola.
76O oe fo‘i le tama, e tā‘ua oe o le perofeta o le Silisili‘ese, #Mala 3.1
auā ‘e te muamua atu i luma o le Ali‘i,
e sauni i ona ala;
77e fa‘ailoa atu le fa‘aolataga i lona nu‘u,
i le fa‘amāgaloina o a latou agasala.
78‘Ona ‘ua mutimutivale le alofa o lo tatou Atua,
‘ua asiasi mai ai le malamalama mai lugā,
79e fa‘amalamalama ai i ē nonofo i le pouliuli ma le ata o le oti, #Isai 9.2
e ta‘ita‘i i o tatou vae i le ala o le manuia.”
80‘Ua tupu le tama, ma ‘ua malosi lona loto; sa i le vao o ia, ‘ua o‘o i le aso na fa‘aalia ai o ia ‘iā Isaraelu.
Currently Selected:
Luka 1: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
