Ioane Fa‘atomuaga
Fa‘atomuaga
O ai Ioane? ‘Ua igoa lenei Evagelia ‘iā Ioane (Yehōhanan i le gagana Eperu po o Iōannes i le gagana Eleni). O le tasi lenei o ‘aposetolo a Iesu lea e masani ‘ona fa‘aigoaina o le so‘o pele (Ioane 13.23; 19.26; 21.20-24). I le tausamiga o le paseka sa fa‘alagolago lenei ‘aposetolo i le fatafata o Iesu ma sa tu fo‘i o ia i lalo o le koluse fa‘atasi ma le tinā o Iesu i le taimi na maliu ai Iesu. ‘Ina ‘ua toetū mai Iesu nai le oti sa tamo‘e televave o ia i lona fia va‘ai i le tu‘ugamau o Iesu ‘ina ‘ua ia maua le tala, ‘‘Ua leiloa le tino o Iesu i le tu‘ugamau.’ ‘Ua atagia ai o se tagata sa ola vāvā lalata tele ‘iā Iesu.
O le ‘a‘ano o tusitusiga a Ioane, o Iesu o le ‘Upu ola a le Atua ‘ua liutino tagata ma ‘ua ola fa‘atasi ma i tatou (1.14). O Iesu o le malamalama moni o le lalolagi ma o ia o le Alo o le Atua (1.1-14), o le Tama‘i mamoe a le Atua ma o le Areto o le ola e fa‘avavau.
O le tele o vaega o le Evagelia e talanoa ai i fa‘ailoga po o vāvega na faia e Iesu e fa‘ailoa mai ai le uiga Atua o Keriso ma o Ia o le Fa‘aola sa folafolaina. O le tele o nei vāvega po o fa‘ailoga ‘ua ‘avea lea ma ala e talitonuina ai e le to‘atele o tagata Iesu ma fa‘atuatua ‘iā te ia. ‘Ae sa ‘avea fo‘i nei fa‘ailoga sa lē talitonu ai nisi o tagata ‘iā Iesu ma latou ō ‘ese mai ma latou tete‘e atu ai ‘iā te ia.
O se isi vaega tāua o lenei Evagelia (Matā‘upu 13-17) o saunoaga tima‘i ma fa‘ala‘ei‘au a Iesu i lana ‘au so‘o ‘ae maise le po na pu‘eina ai o ia. O ‘upu fautua ‘ina ‘ia tumau pea i le fa‘atuatua ma fa‘alagolago malosi ‘iā te Ia ma le Tamā. ‘Ia ‘onosa‘i e talia puapuagā ma tigā o le galuega ‘ona o le tala‘iga o lona suafa. O Matā‘upu fa‘ai‘ui‘u o fa‘amatalaga o le fa‘amasinoina ma le fa‘asatauroina, le maliu ma le toetū o Iesu ma lona fa‘aali atu i ona so‘o.
E tele ni fa‘ailoga va‘aia masani o le soifuaga o lo‘o fa‘aaogāina mai e Ioane i lana tusi e pei o le malamalama, molī, afi, vai, falaoa, vine, i‘a, leoleo mamoe, lafu mamoe; o nei fa‘ailoga va‘aia e a‘oa‘oina mai ai le itū fa‘aleagaga. ‘Ua manino mai ai, o Ioane o se tagata sa loloto tele lana su‘esu‘e i a‘oa‘oga fa‘a-Atua ‘iā Iesu.
O le to‘atele o le ‘au su‘esu‘e i le ‘Upu a le Atua, o le Evagelia lenei sa tusia i le vaitaimi i le vā o le 90-100 tausaga i le vaitaimi lava o le Ali‘i (Anno Domini)
O le Fa‘asologa o Matā‘upu:
Fa‘atomuaga 1.1-18
Ioane Papatiso ma ulua‘i so‘o o Iesu 1.19-51
O galuega a Iesu i tagata lautele 2.1—12.50
O aso fa‘ai‘ui‘u i Ierusalema 13.1—19.42
O le toetū ma le fa‘aali atu o le Ali‘i i ona so‘o 20.1-31
O le fa‘aali o Iesu i Kalilaia ma le ‘upu mulimuli 21.1-25
Currently Selected:
Ioane Fa‘atomuaga: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.