Ioane 20

O le Toe Soifua mai o Iesu

(Mata 28.1-8; Mare 16.1-8; Luka 24.1-12)

1O le ulua‘i aso o le vaisapati, i le taeao, a o pouliuli lava, ‘ua alu ane ai Maria le Makatala i le tu‘ugamau; ‘ua va‘ai atu i le ma‘a ‘ua ‘ave‘eseina i le tu‘ugamau. 2‘Ona momo‘e lea o ia, ‘ua alu ‘iā Simona Peteru ma le tasi so‘o sa alofaina e Iesu, ‘ua fai atu ‘iā te i lā‘ua, “‘Ua latou ‘ave‘eseina le Ali‘i i le tu‘ugamau; matou te lē iloa fo‘i le mea ‘ua latou tu‘uina ai o ia.”#Ioane 13.23

3‘Ona ō atu lea o Peteru ma le tasi so‘o, ‘ua lā ō atu i le tu‘ugamau. 4‘Ua taufetuli i lā‘ua uma; a o le tasi so‘o, ‘ua momo‘e atu ‘ua muamua ‘iā Peteru, ‘ua mua‘i o‘o i le tu‘ugamau. 5‘Ua punou o ia, ‘ona iloa ai lea o ‘ie na tanuma‘i ‘ua tu‘u; ‘ae le‘i ulu atu ai o ia. 6‘Ona o‘o atu lea o Simona Peteru, sa mulimuli atu ‘iā te ia, ‘ua ulu atu o ia i totonu i le tu‘ugamau, ‘ua va‘ai atu i ‘ie na tanuma‘i ‘ua tu‘u, 7ma le solosolo sa i lona ao, e le‘i tu‘u fa‘atasi ma ‘ie na tanuma‘i, a ‘ua tu‘u ‘ese, ma ta‘ata‘ai i le tasi mea.#Ioane 11.44 8‘Ona ulu atu lea o le tasi so‘o na mua‘i o‘o i le tu‘ugamau, ‘ua va‘ai atu, ‘ona talitonu lea o ia. 9Auā o ona po ia e le‘i iloa ai e i latou le Tusi, e ao ‘ina ‘ia toetū o ia nai ē ‘ua oti.#1 Kori 15.4; Galu 2.24-32 10‘Ona toe ō lea o ia so‘o i o lā‘ua ‘āiga.

‘Ua Fa‘aali Iesu ‘iā Maria le Makatala

(Mata 28.9-10; Mare 16.9-11)

11A o Maria, ‘ua tu o ia i fafo e lata ane i le tu‘ugamau, ‘ua tagi ai. ‘Ua tagi o ia ma punou i le tu‘ugamau. 12‘Ona iloa atu lea e ia o agelu e to‘alua ‘ua ‘o‘ofu i ‘ofu sisina, ‘ua nonofo i le mea na tu‘u ai le tino o Iesu; o le tasi e i ulu, o le tasi e i vae. 13‘Ua la fai mai ‘iā te ia, “Funa e, se a le mea ‘e te tagi ai?”

‘Ua fa‘apea atu o ia ‘iā te i lā‘ua, “Auā ‘ua latou ‘ave ‘ese lo‘u Ali‘i, ‘ou te lē iloa fo‘i le mea ‘ua latou tu‘uina ai o ia.”

14‘Ua ia fai atu na ‘upu, ‘ona fāliu lea i tua; ‘ona iloa atu lea e ia o Iesu ‘ua tu mai; ‘ae le‘i iloa e ia o Iesu lava lea. 15‘Ua fetalai atu Iesu ‘iā te ia, “Funa e, se a le mea ‘e te tagi ai? O ai ‘ea ‘e te sā‘ilia?”

A o le fafine, sa manatu o ia o le leoleo o ia o le fanua, ‘ua fai mai ‘iā te ia, “Le ali‘i e, ‘āfai ‘ua e ‘ave ‘ese ‘iā te ia, ta‘u mai ia ‘iā te a‘u po o fea le mea ‘ua e tu‘uina ai o ia; ‘ona ‘ou ‘ave‘eseina lea o ia.”

16‘Ua fetalai atu Iesu ‘iā te ia, “Maria e.”

‘Ona fāliu lea o ia, ‘ua fai mai ‘iā te ia, “Raponi e,” (o lona uiga, Le a‘oa‘o e).

17‘Ua fetalai atu Iesu ‘iā te ia, “‘Aua ‘e te tago mai ‘iā te a‘u, auā ‘ou te le‘i alu a‘e lava i lo‘u Tamā; a ‘ia e alu i o‘u uso ma fai atu ‘iā i latou, ‘‘Ou te alu a‘e i lo‘u Tamā ma lo ‘outou Tamā, o lo‘u Atua ma lo ‘outou Atua.’”#Epe 2.11, 12; Roma 8.29

18‘Ua alu atu Maria le Makatala,#20.18 Maria le Makatala: po o Maria Matalena. ‘ua fa‘ailoa atu i le ‘au so‘o, “‘Ua ‘ou iloa atu le Ali‘i,” ‘ua fa‘ailoa atu fo‘i ‘iā te i latou ‘ua fetalai mai o Iesu ia mea ‘iā te ia.

‘Ua Fa‘aali Iesu i lana ‘au So‘o

(Mata 28.16-20; Mare 16.14-18; Luka 24.36-49)

19‘Ua o‘o i le afiafi, o le ulua‘i aso lea o le vaisapati, ‘ua punitia faitoto‘a o le mea na potopoto ai le ‘au so‘o, ‘ona o le fefe ‘iā Iutaia ‘ua maliu atu Iesu, ‘ua tu i totonu; ‘ona fetalai atu lea o ia ‘iā te i latou, “‘Ia ‘outou manuia.”#20.19 ‘Ia ‘outou manuia po o ‘Ia ‘iā te i ‘outou le filemū. 20‘Ua fetalai atu o Iesu lea mea, ‘ona fa‘aali atu lea ‘iā te i latou o ona lima ma lona itū. ‘Ona ‘oli‘oli ai lea o le ‘au so‘o ‘ina ‘ua latou va‘ai atu i le Ali‘i.#1 Ioane 1.1 21‘Ona toe fetalai atu lea o Iesu ‘iā te i latou, “‘Ia ‘outou Manuia.“‘Ia ‘outou manuia.”#20.21 ‘Ia ‘outou manuia po o ‘Ia ‘iā te i ‘outou le filemū. Fa‘apei ‘ona ‘auina mai o a‘u e le Tamā, e fa‘apea fo‘i ‘ona ‘ou ‘a‘auina atu ‘outou.” 22‘Ua fetalai atu o Iesu lea mea, ‘ona mānava atu lea o ia, ma fa‘apea atu ‘iā te i latou, “‘Ia ‘outou talia le Agaga Pa‘ia.#Galu 2.4, 33; Kene 2.7 23O i latou uma lava tou te fa‘amāgaloina ai a latou agasala, e fa‘amāgaloina ia ‘iā i latou; o i latou uma lava tou te tu‘u pea i ai a latou agasala, e tu‘u pea lava ia.”#Mata 16.19; 18.18

O Iesu ma Toma

24A o Toma o le tasi o le to‘asefulu ma le to‘alua, ‘ua igoa ia o Titumo, e le‘i i ai o ia ma i latou ‘ina ‘ua maliu atu Iesu.#Ioane 11.16; 14.5 25‘Ona fai atu lea o le ‘au so‘o uma ‘iā Toma,#20.25 Toma: O le fa‘aliliuga tuai; ia. “‘Ua matou iloa atu le Ali‘i.”

A ‘ua fai mai o Toma ‘iā te i latou, “‘Āfai ‘ou te lē va‘ai atu i ona lima, i mea na tutu‘i ai fao, ma tu‘u lo‘u tamatama‘i lima i mea na tutu‘i ai fao, ma tu‘u lo‘u lima i lona itū, ‘ou te lē talitonu lava.”

26‘Ua mavae aso e valu, ‘ua toe fa‘atasi ona so‘o i le fale, ‘ua fa‘atasi ai fo‘i i latou ma Toma; ‘ua maliu atu Iesu a o pupuni faitoto‘a, ‘ua tu fo‘i o ia i totonu, ma fetalai atu, “‘Ia ‘outou manuia.”#20.26 ‘Ia ‘outou manuia po o ‘Ia ‘iā te i ‘outou le filemū. #Ioane 20.19 27‘Ona fetalai atu lea o ia ‘iā Toma, “‘Aumai ia lou tamatama‘i lima ‘i‘inei, va‘ai mai fo‘i i o‘u lima; tu‘u mai ia fo‘i lou lima, ma tu‘u mai i lo‘u itū; ‘aua fo‘i ‘e te masalo vale, a ‘ia e fa‘atuatua.”

28‘Ona tali mai lea o Toma, ‘ua fa‘apea mai ‘iā te ia, “Lo‘u Ali‘i e, ma lo‘u Atua e.”#Ioane 1.1

29‘Ua fetalai atu Iesu ‘iā te ia, “Toma e, ‘ua e fa‘atuatua, auā ‘ua e va‘ai mai ‘iā te a‘u. ‘Amu‘ia o ē lē va‘ai mai, ‘ae fa‘atuatua mai pea.” #1 Pete 1.8

O le Uiga o le lenei Tusi

30O isi fo‘i fa‘ailoga e tele na faia e Iesu i luma o ona so‘o, e le‘i tusia i lenei tusi. 31A ‘ua tusia ia mea, ‘ina ‘ia talitonu ai ‘outou, o Iesu o le Keriso lava ia, o le Alo o le Atua; ‘ina ‘ia maua ai fo‘i le ola i lona suafa e ‘outou o ē talitonu.#Ioane 3.15

Currently Selected:

Ioane 20: RSCB

Highlight

Copy