Ioane 2
2
‘Ua Liliu e Iesu le Vai e Fai ma Uaina
1‘Ua o‘o i le aso tolu, ‘ona fai ai lea o le tausama‘aga i Kana i Kalilaia; sa i ai fo‘i le tinā o Iesu. 2Na vala‘aulia fo‘i Iesu ma ona so‘o i le tausama‘aga. 3‘Ua uma fo‘i le uaina, ‘ona fai atu lea o le tinā o Iesu ‘iā te ia, “‘Ua leai sa latou uaina.”
4‘Ua fetalai mai Iesu ‘iā te ia, “Funa e, se a ‘ea se mea ‘ua e mana‘o mai ai ‘iā te a‘u?#2.4 Funa e, se a ‘ea se mea ‘ua e mana‘o mai ai ‘iā te a‘u? O le fa‘aliliuga tuai; Funa e, se a ‘ea lau na ‘iā te a‘u? E le‘i o‘o i lo‘u itū aso.”#Ioane 19.26; Mata 12.48; Mare 1.24
5‘Ua fai ane lona tinā i ‘au‘auna, “O se mea lava e fai mai ai o ia ‘iā te ‘outou, ‘ia ‘outou faia.”
6Sa i ai vai ma‘a tetele e ono, e ta‘iluasefulu po ta‘itolusefulu kalone, pei o le tu o le fa‘amamāina o Iutaia.#Mare 7.3-4 7‘Ua fetalai atu Iesu ‘iā te i latou, “‘Inā fa‘atūtūmu ia o vai i suāvai.” ‘Ona latou fa‘atūtūmuina lea, ‘ua o‘o lava i lau. 8‘Ua fetalai atu o ia ‘iā te i latou, “‘Inā asu ane ia, ‘inā ‘ave i lē pule i le tausama‘aga.” ‘Ona latou avatua lea. 9‘Ua tofo fo‘i lē pule i le tausama‘aga i le vai ‘ua liu uaina, (a ‘ua na lē iloa le mea na maua ai, a o ‘au‘auna na asu le vai ‘ua latou iloa,) ‘ona vala‘au atu lea o le pule i le tausama‘aga i le fa‘ato‘āfaiavā, 10‘ua fai atu ‘iā te ia, “E muamua ‘ona ‘aumai e tagata uma o le uaina lelei; pe a tele fo‘i le inu i ai o tagata, ‘ona ‘aumai ai lea o le uaina leaga; a ‘ua tu‘u e oe le uaina lelei, ‘ua o‘o mai i lenei itū aso.”
11Na faia e Iesu lenei ulua‘i fa‘ailoga i Kana i Kalilaia, ma fa‘aali mai ai lona mamalu; ‘ona fa‘atuatua ai lea o ona so‘o ‘iā te ia.#Ioane 1.14; 11.40
12Mulimuli ane ‘ua maliu ifo ai i Kapanaumi, o ia ma lona tinā ma ona uso, ma ona so‘o; ‘ae le‘i nonofo ai i ni aso e tele.#Mata 4.13
‘Ua Maliu atu Iesu i le Malumalu
(Mata 21.12-13; Mare 11.15-17; Luka 19.45-46)
13‘Ua lata mai fo‘i le paseka a Iutaia; ‘ona maliu a‘e lea o Iesu i Ierusalema.#Eso 12.1-27 14‘Ua nā silafia i le malumalu o ē fa‘atau povi, ma mamoe, ma lupe, ma ē fa‘atau tupe o nonofo mai ai. 15‘Ua ia faia le sasa i maea tua iti, ‘ona tutuli atu ai lea ‘iā te i latou uma lava i fafo o le malumalu, o mamoe ‘atoa ma povi; ‘ua sasa‘a ifo fo‘i tupe a tagata fa‘atau tupe, ma fuli atu laulau. 16‘Ua fa‘apea atu fo‘i o ia i ē fa‘atau lupe, “‘Ave ‘ese ia nei mea; ‘aua le fai le fale o lo‘u Tamā ma fale fa‘atau ‘oa.”#Luka 2.49 17‘Ona manatu ai lea o ona so‘o i le ‘upu ‘ua tusia, “‘Ua ‘aina lava a‘u i le mana‘o tele i lou fale.”#2.17 ‘Ua ‘aina lava a‘u…tele i lou fale: po o ‘Ua naunauta‘i lava a‘u i le mana‘o tele i lou fale. #Sala 69.9
18‘Ona fai mai ai lea o tagata Iutaia, ‘ua fa‘apea mai ‘iā te ia, “Se a se fa‘ailoga ‘e te fa‘aali mai ‘iā te i matou, ‘ina ‘ua e faia nei mea?”#Mata 21.23; Ioane 3.2
19‘Ua tali atu Iesu, ‘ua fa‘apea atu ‘iā te i latou, “‘Inā lepeti ia o lenei malumalu, ‘ona ‘ou toe faia lea i aso e tolu.”#Mata 26.61; 27.40; Mare 14.58; 15.29
20‘Ona fai mai lea o Iutaia, “E fasefulu ma le ono o tausaga o fai lenei malumalu, pe ‘e te toe faia fo‘i e oe i aso e tolu?”
21A o lona tino, o le malumalu lea na ia fetalai mai ai.#1 Kori 6.19; Ioane 8.57 22Na tu mai o ia nai ē ‘ua oti ‘ona manatu ai lea o ona so‘o ‘ua na fetalai mai lenei ‘upu ‘iā te i latou; ‘ona latou talitonu lea i le Tusi, ma le fetalaiga a Iesu ‘ua ia fetalai mai ai.
23Sa i Ierusalema o ia i le paseka, i le tausamiga, ‘ona to‘atele ai lea o ē na fa‘atuatua i lona suafa, ‘ina ‘ua latou va‘ai atu i fa‘ailoga na faia e ia. 24A o Iesu, e le‘i fa‘alagolago o ia ‘iā te i latou, auā ‘ua na silafia tagata uma lava. 25E lē aogā fo‘i ‘iā te ia ‘ina ‘ia molimau o se tasi ‘iā te ia i amio a tagata; auā fo‘i ‘ua na silafia mea uma i loto o tagata.#Mare 2.8
Currently Selected:
Ioane 2: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
