Ioane 18

O le Fa‘amasinoga o Iesu

(Mata 26.47-56; Mare 14.43-50; Luka 22.47-53)

1‘Ua fetalai atu ia ‘upu, ‘ona maliu atu ai lea o Iesu ma ona so‘o i le tasi itū o le alia o Ketarono, ‘ua i ai le fanua, ‘ua latou ō i ai ma ona so‘o. 2‘Ua iloa fo‘i lea mea e Iuta lē na fa‘alataina o ia; auā na maliu atu so‘o i ai Iesu fa‘atasi ma ona so‘o.#Luka 21.37 3‘Ua maua fo‘i e Iuta le ‘au tau ma ‘au‘auna mai le ‘au ositaulaga sili ma faresaio, ‘ona alu atu lea o ia i lea mea ma sulu, ma molī, ma le ‘au‘upega. 4‘Ua silafia fo‘i e Iesu mea uma o le a o‘o ‘iā te ia, ‘ua maliu atu, ma fa‘apea atu ‘iā te i latou, “O ai ‘ea tou te sā‘ilia?”#Ioane 19.28

5‘Ua latou tali mai ‘iā te ia, “O Iesu le Nasareta.”

‘Ona fetalai atu lea o Iesu ‘iā te i latou, “O a‘u lenei.”

‘Ua tutū fa‘atasi fo‘i ma i latou o Iuta lē na fa‘alataina ia. 6‘Ua fa‘apea atu Iesu ‘iā te i latou, “O a‘u lenei;” ‘ona solomuli ai lea o i latou, ‘ua pa‘u‘ū fo‘i i le ‘ele‘ele. 7‘Ona toe fesili atu lea o Iesu ‘iā te i latou, “O ai ‘ea tou te sā‘ilia?”

‘Ua fai mai i latou, “O Iesu le Nasareta.”

8‘Ona tali atu lea o Iesu, “‘Ua uma ‘ona ‘ou fai atu ‘iā te ‘outou, o a‘u lenei; o lenei, ‘āfai tou te sā‘ili mai ‘iā te a‘u, tu‘u pea ‘iā i latou nei, ‘ia latou ō.” 9‘Ina ‘ia taunu‘u ai le ‘upu na ia fa‘apea atu ai, “O i latou na e foa‘i mai ‘iā te a‘u, e le‘i fano so latou e to‘atasi.”#Ioane 17.12

10O Simona Peteru fo‘i, ‘ua i ai le pelu, ‘ua se‘i e ia ma taia ai le ‘au‘auna a le ositaulaga sili, ‘ua tipi‘esea lona taliga taumatau; o Maliko le igoa o le ‘au‘auna. 11‘Ona fetalai atu lea o Iesu ‘iā Peteru, “‘Inā sulu ia lau pelu i lona fa‘amoega; ‘ou te lē inu ‘ea i le ipu ‘ua ‘aumai ‘iā te a‘u e lo‘u Tamā?”#Mata 26.39; Mare 14.36; Luka 22.42

O Iesu i luma o Ana

12‘Ona pu‘e atu lea e le ‘au ma lo latou ta‘ita‘i ‘au, ma ‘au‘auna a Iutaia ‘iā Iesu, ma saisai ‘iā te ia. 13‘Ona latou ulua‘i ta‘ita‘iina lea o ia ‘iā Ana, auā o le tamā o ia o le avā a Kaiafa, o le ositaulaga sili lea i lea tausaga.#Mata 26.57; Mare 14.53; Luka 22.54 14O Kaiafa fo‘i lea na fai atu ‘iā Iutaia, ‘ua aogā pe a oti se tagata to‘atasi e sui ai le nu‘u.#Ioane 11.49-50

O le Fa‘afiti a Peteru

(Mata 26.69-70; Mare 14.66-68; Luka 22.55-57)

15‘Ua mulimuli atu ‘iā Iesu o Simona Peteru ma le tasi so‘o; na iloa fo‘i lea so‘o e le ositaulaga sili; ‘ua ulufale o ia fa‘atasi ma Iesu i le maota o le ositaulaga sili;#Ioane 20.3; 21.20; Galu 3.1 16a o Peteru, ‘ua tu o ia i fafo i le faitoto‘a. ‘Ona alu ane lea i fafo o le isi so‘o na iloa e le ositaulaga sili, ‘ua tautala ane i le leoleo faitoto‘a, ma ‘aumai ‘iā Peteru i le fale.#Mare 14.54; Luka 22.54 17‘Ona fa‘apea mai lea o le ‘au‘auna teine na leoleo i le faitoto‘a ‘iā Peteru, “E lē o oe ‘ea le tasi so‘o o lenā tagata?”

‘Ua fai atu o ia, “E lē o a‘u.”

18‘Ua tutū mai tautua ma ‘au‘auna, ‘ua latou tafu le afi malala, auā ‘ua ma‘alilili, ‘ua latou fa‘amafanafana ai; ‘ua tu fo‘i Peteru fa‘atasi ma i latou, ‘ua fa‘amafanafana ai.

‘Ua Fesiligia e le Ositaulaga sili Iesu

(Mata 26.59-66; Mare 14.55-64; Luka 22.66-71)

19‘Ona fesili mai lea o le ositaulaga sili ‘iā Iesu i ona so‘o ma lana a‘oa‘oga. 20‘Ua tali atu Iesu ‘iā te ia, “‘Ua ‘ou tautala fa‘aali i tagata uma; ‘ua ‘ou a‘oa‘o so‘o i sunako ma le malumalu, e fa‘apotopoto so‘o ai Iutaia; a ‘ou te le‘i tautala fa‘alilolilo i se mea e tasi.#Ioane 7.14, 26; Mata 10.27 21Pe se a le mea ‘e te fesili mai ai ‘iā te a‘u? ‘Ia e fesili i ē na fa‘alogo ai, se mea na ‘ou tautala atu ai ‘iā te i latou; fa‘auta, ‘ua latou iloa mea na ‘ou fai atu ai.”

22‘Ua ia fetalai atu ia mea, ‘ona pō mai lea ‘iā Iesu o le tasi ‘au‘auna sa tu ai, ‘ua fa‘apea mai, “‘E te tali atu ‘ea fa‘apea i le ositaulaga sili?”#Ioane 19.3; Galu 23.2

23‘Ona tali atu lea o Iesu ‘iā te ia, “‘Āfai ‘ua leaga la‘u ‘upu, ‘ia molimau i lona leaga; ‘ae ‘āfai ‘ua lelei, se a le mea ‘ua e pō mai ai ‘iā te a‘u?”#Mata 5.39; Galu 23.2-5

24‘Ua ‘auina o ia e Ana ‘iā Kaiafa o le ositaulaga sili, o noanoatia.

‘Ua Toe Fa‘afiti Peteru

(Mata 26.71-75; Mare 14.69-72; Luka 22.58-62)

25Sa tu ai Simona Peteru, o fa‘amafanafana; ‘ona latou fai mai lea ‘iā te ia, “E lē o oe ‘ea le tasi o ona so‘o?”

‘Ua fa‘afiti atu o ia, ‘ua fai atu, “E lē o a‘u.”

26‘Ua fai mai ‘iā te ia le tasi ‘au‘auna o le ositaulaga sili, o le ‘āiga o lē na tipi‘esea lona taliga e Peteru, “‘Ou te le‘i va‘ai atu ‘ea ‘iā te oe fa‘atasi ma ia i le fanua?”

27‘Ona toe fa‘afiti atu lea o Peteru, ‘ona vivini loa lea o moa.

‘Ua Ta‘ita‘iina mai Iesu ‘iā Pilato

(Mata 27.1-2, 11-14; Mare 15.1-5; Luka 23.1-5)

28‘Ona latou ta‘ita‘iina lea o Iesu nai ‘iā Kaiafa i le maota o le kovana. ‘Ua ao fo‘i; e le‘i ulufale i latou i le maota o le ali‘i, ne‘i leaga i latou, ‘ona lē mafai lea ‘ona ‘a‘ai i le paseka. 29‘Ona alu ai lea i fafo o Pilato ‘iā te i latou, ‘ua fai atu, “Se a se mea ‘ua ‘outou molia ai lenā tagata?”

30‘Ua latou tali mai, ‘ua fa‘apea mai ‘iā te ia, “‘Āfai ‘ana lē pagotā o ia, po ‘ua matou lē tu‘uina atu o ia ‘iā te oe.”

31‘Ona fai atu lea o Pilato ‘iā te i latou, “‘Inā ‘ave ia e ‘outou ‘iā te ia, ‘inā fa‘amasino ‘iā te ia i la ‘outou tulafono.”

‘Ona fai mai lea o Iutaia ‘iā te ia, “E sā ‘ona matou fasioti o se tasi.”#Ioane 19.6, 7; Galu 18.15 32‘Ua taunu‘u ai le fetalaiga a Iesu, na fetalai atu ai o ia, ‘ina ‘ua ta‘u atu le uiga o lona maliu o le a maliu ai o ia.#Ioane 3.14; 12.32

33‘Ona toe ulufale lea o Pilato i le maota o le ali‘i, ‘ua vala‘au ‘iā Iesu, ‘ua fai mai ‘iā te ia, “O oe ‘ea o le tupu o tagata Iutaia?”

34‘Ua tali atu Iesu ‘iā te ia, “Pe se ‘upu mai ‘iā te oe lea ‘upu, pe na ta‘u atu e nisi ‘iā te oe?”#Mata 16.13

35‘Ua tali mai Pilato, “O a‘u ‘ea o se Iutaia? ‘Ua tu‘uina mai oe ‘iā te a‘u e lou nu‘u ma le ‘au ositaulaga sili; pe se a le mea ‘ua e faia?”#Ioane 1.11; Mata 21.39

36‘Ua tali atu Iesu, “E lē mai le lalolagi nei lo‘u mālō; ‘āfai ‘ana mai le lalolagi nei lo‘u mālō, po ‘ua tau a‘u ‘au‘auna, ‘ina ne‘i tu‘uina atu a‘u ‘iā Iutaia; a o lenei, e lē mai ‘i‘inei lo‘u mālō.”

37‘Ona fai mai lea o Pilato ‘iā te ia, “O lenā fo‘i, o oe ‘ea o se tupu?”

‘Ua tali atu Iesu, “O lea lava, o a‘u o le Tupu o le mea lenei na fānau mai ai a‘u, o le mea fo‘i lenei na ‘ou sau ai i le lalolagi, ‘ina ‘ia ‘ou molimau i le ‘upu moni. O i latou uma lava o i le ‘upu moni, e fa‘alogo mai i latou i lo‘u leo.”#Ioane 3.32; 18.14-17; 1 Ioane 4.6

38‘Ua fai mai Pilato ‘iā te ia, “Po o le a le ‘upu moni?”

‘Ua Fa‘asalaina Iesu i le Oti

(Mata 27.15-31; Mare 15.6-20; Luka 23.13-25)

‘Ua fai mai lea ‘upu, ‘ona toe alu lea o ia i fafo ‘iā Iutaia, ‘ua fai atu fo‘i ‘iā te i latou, “‘Ou te le‘i iloa se mea e sala ai o ia. 39A o la ‘outou tu lea, ‘ia ‘ou tatalaina atu ‘iā te ‘outou se tasi tagata i le paseka. O lenei, pe tou te manana‘o ‘ea ‘ina ‘ia ‘ou tatalaina atu ‘iā te ‘outou le tupu o tagata Iutaia?”

40‘Ona toe ‘alalaga lea o i latou uma lava, ‘ua fa‘apea atu, “Leai, e lē o ia, a o Parapa.” O Parapa o le fao mea.

Currently Selected:

Ioane 18: RSCB

Highlight

Copy