Ioane 11

O le Oti o Lasalo

1Sa ma‘i le tasi tagata, o Lasalo le Petania, o le ‘a‘ai a Maria ma lona uso o Mareta.#Luka 10.38-39 2O Maria fo‘i lea na na u‘u le Ali‘i i le u‘u manogi, ‘ua sōloi fo‘i ona vae i lona lauulu, ‘ua ma‘i lona tuagane o Lasalo.#Ioane 12.3 3‘Ona ‘ave lea o le fe‘au a ona tuafafine ‘iā te ia, ‘ua fa‘apea mai, “Le Ali‘i e, fa‘auta, o lo‘o ma‘i lē ‘ua alofaina e oe.”

4‘Ua fa‘afofoga e Iesu, ‘ona fa‘apea lea o ia, “O lenei ma‘i e lē i‘u ‘ina oti, a ‘ona o le vi‘iga o le Atua, ‘ina ‘ia vi‘ia ai o le Atali‘i o le Atua.”

5‘Ua alofa lava Iesu ‘iā Mareta, ma lona uso, ‘atoa ma Lasalo. 6‘Ua fa‘afofoga o ia ‘ua ma‘i o ia, ‘ona nofo pea ai lea o ia, e lua aso, i le mea sa i ai. 7Mulimuli ane ‘ona fa‘apea atu ai lea o ia i ona so‘o, “‘Ia tatou toe ō i Iutaia.”

8‘Ua fai mai ona so‘o ‘iā te ia, “Rapi e,#11.8 Rapi e: po o A‘oa‘o e. na se‘i sā‘ili nei Iutaia e fetogi ‘iā te oe i ma‘a, ‘e te toe maliu atu ‘ea i ai?”

9‘Ona tali atu lea o Iesu, “E lē ‘ua sefulu ‘ea ma le lua itūlā i le ao? ‘Āfai e savali se tasi i le ao, e lē tausuai o ia, auā e va‘ai o ia i le malamalama o lenei lalolagi. 10‘Ae ‘āfai e savali se tasi i le po, e tausuai o ia, auā e leai se malamalama ‘iā te ia.” 11‘Ua fetalai atu ia ‘upu, ‘ae mulimuli ane ‘ua fa‘apea atu o ia ‘iā te i latou, “O lo‘o moe la tatou uō o Lasalo; ‘ae ‘ou te alu e fafagu ‘iā te ia.”

12‘Ona fa‘apea mai lea o ona so‘o, “Le Ali‘i e, ‘āfai o moe o ia, e ola.”

13‘Ua fetalai Iesu i lona oti, a ‘ua latou masalo ‘ua fetalai o ia i le ta‘oto ma moe. 14‘Ona ta‘utino atu lea e Iesu ‘iā te i latou, “‘Ua oti Lasalo. 15‘Ou te ‘oli‘oli fo‘i ‘ona o ‘outou, ‘ina ‘ua ‘ou lē i ai, ‘ina ‘ia ‘outou talitonu mai; ‘ae tatou ō ia ‘iā te ia.”

16‘Ona fai atu lea o Toma, o lē na igoa ‘iā Titumo, i lona ‘au uso a so‘o, “‘Ia tatou ō fo‘i, ‘ina ‘ia tatou oti fa‘atasi ma ia.”

O Iesu o le Toetū ma le Ola

17‘Ua o‘o atu Iesu, ‘ona silafia lea ‘ua aso fa o ia i le tu‘ugamau. 18‘Ua vāvā lalata Petania ‘iā Ierusalema, pe lua maila lo la vā. 19E to‘atele fo‘i o Iutaia ‘ua ō atu ‘iā Mareta ma Maria ‘ina ‘ia fa‘amafanafana i a‘i lā‘ua ‘ona o lo la tuagane.

20‘Ua fa‘alogo Mareta ‘ua maliu mai Iesu, ‘ona alu ai lea na te fa‘afetaia‘i ‘iā te ia; a ‘ua nofo Maria i le fale. 21‘Ona fa‘apea mai lea o Mareta ‘iā Iesu, “Le Ali‘i e, ‘ana e ‘i‘inei, po ‘ua lē oti lo‘u tuagane, 22‘Ae ui lava i lea, ‘ua ‘ou iloa o mea uma ‘e te fa‘atoga atu ai i le Atua, e foa‘iina mai e le Atua ‘iā te oe.”

23‘Ua fetalai atu Iesu ‘iā te ia, “E toetū mai lou tuagane.”

24‘Ua fai mai Mareta ‘iā te ia, “‘Ua ‘ou iloa e toetū mai lava ia i le toetū i le aso gata‘aga.”#Ioane 6.40; Luka 14.14

25‘Ua fetalai atu Iesu ‘iā te ia, “O a‘u nei o le toetū ma le ola; o lē fa‘atuatua mai ‘iā te a‘u, e ui lava ‘ina oti, ‘ae ola lava ia. 26O tagata ola uma o ē fa‘atuatua mai ‘iā te a‘u, e lē oti lava e o‘o i le fa‘avavau; po ‘ua e talitonu mai ‘ea i lenā mea?”#Ioane 5.24; 8.51

27‘Ona fa‘apea mai lea o ia ‘iā Iesu,#11.27 Iesu: O le fa‘aliliuga tuai; ia. “Ioe, le Ali‘i e, ‘ua ‘ou talitonu lava, o oe o le Keriso le Alo o le Atua, o lē maliu mai i le lalolagi.”

O le Tagi a Iesu

28‘Ua ia fai mai na ‘upu, ‘ona alu ane lea o ia, ‘inā vala‘au lemū i lona uso o Maria ‘ua fa‘apea atu, “‘Ua o‘o mai le a‘oa‘o, ‘ua vala‘au ‘iā te oe.” 29‘Ua fa‘alogo ai o ia, ‘ona vave tu lea i luga, ma alu ‘iā te ia. 30A o Iesu e le‘i maliu ane i le ‘a‘ai, a ‘ua i le mea na la fetaia‘i ai ma Mareta.#Ioane 11.20 31O tagata Iutaia fo‘i sa i le fale ma ia, ma fa‘amafanafana ‘iā te ia, ‘ua latou va‘ai atu ‘iā Maria ‘ua vave tu i luga, ma alu i fafo, ‘ona mulimuli atu lea o i latou ‘iā te ia, ‘ua fa‘apea ane, o le a alu o ia i le tu‘ugamau e tagi ai.

32‘Ua o‘o fo‘i Maria i le mea sa i ai Iesu; ‘ua va‘ai mai ‘iā te ia, ‘ona fa‘apa‘ū mai lea o ia i ona vae, ‘ua fa‘apea mai ‘iā te ia, “Le Ali‘i e, ‘ana e ‘i‘inei, po ‘ua lē oti lo‘u tuagane.”#Ioane 11.21

33‘Ua silafia e Iesu o ia ‘ua tagi, ma Iutaia ‘ua ō mai ma ia ‘ua fētāgisi, ‘ona tigā tele lea o lona finagalo, ma ‘ua atu lava o ia; 34‘ona fa‘apea atu lea, “Ofea na ‘outou tu‘uina ai o ia?”

‘Ua fa‘apea mai i latou ‘iā te ia, “Le Ali‘i e, maliu mai ia, ‘e te silasila i ai.”

35‘Ua tagi Iesu.#Luka 19.41 36‘Ona fa‘apea ane ai lea o Iutaia, “Fa‘auta i le tele o lona alofa ‘iā te ia!”

37A o isi o i latou, ‘ua fa‘apea ane, “E le‘i mafai ‘ea e lenei tagata ‘ina ‘ia fa‘apupula mata o le tauaso, ‘ona vavao fo‘i le oti o lenei tagata?”

‘Ua Toe Fa‘aolaina o Lasalo

38‘Ua toe tigā tele le finagalo o Iesu, ‘ona o‘o lea o ia i le tu‘ugamau. O le ana lea, ‘ua tu‘uina fo‘i le ma‘a i lona gutu. 39‘Ua fetalai atu Iesu, “‘Ave ‘ese ia le ma‘a.”

‘Ona fai mai lea ‘iā te ia o Mareta le tuafafine o lē ‘ua oti, “Le Ali‘i e, ‘ua o‘o ‘ina manogi, auā o le fa lenei o po.”

40‘Ua fetalai atu Iesu ‘iā te ia, “Pe na ‘ou lē fai atu ‘ea ‘iā te oe, afai ‘e te talitonu, ‘ona e iloa lea o le mamalu o le Atua?”#Ioane 4.23, 25, 26 41‘Ona latou ‘ave ‘ese lea o le ma‘a i le mea na tu‘u ai lē ‘ua oti. ‘Ona tepa a‘e lea o fofoga o Iesu, ‘ua fa‘apea atu, “Lo‘u Tamā e, ‘ou te fa‘afetai atu ‘iā te oe, auā ‘ua e fa‘afofoga mai ‘iā te a‘u. 42‘Ua ‘ou iloa fo‘i, ‘e te fa‘afofoga mai ‘iā te a‘u e lē aunoa; ‘ae peita‘i ‘ua ‘ou fai atu ai, ‘ona o le motu o tagata o lo‘o vagavagai, ‘ina ‘ia talitonu i latou ‘ua e ‘auina mai a‘u.” 43‘Ua ia fetalai atu ia ‘upu, ‘ona ‘alaga lea o ia ‘ua leo tele, “Lasalo e, ‘inā sau ia i fafo.” 44‘Ona alu ai lea i fafo o lē na oti, ‘ua fusifusia ona vae ma ona lima i ‘ie na tanuma‘i, ‘ua fusi fo‘i ona mata i le solosolo. ‘Ona fetalai atu lea o Iesu ‘iā te i latou, “Tatala ia ‘iā te ia, ‘inā tu‘u atu ia e alu.”

O le Taupulepulega Leaga e Fa‘asaga ‘iā Iesu

(Mata 26.1-5; Mare 14.1-2; Luka 22.1-2)

45‘Ona fa‘atuatua ai lea ‘iā te ia o Iutaia e to‘atele, o i latou ia na ō mai ‘iā Maria, ‘ina ‘ua latou va‘ai atu i mea ‘ua faia e Iesu.#Luka 16.31; Ioane 10.42; 12.42 46A o isi o i latou, ‘ua latou ō atu i le ‘au faresaio, ma fa‘amatala atu ‘iā te i latou mea ‘ua faia e Iesu. 47‘Ona fa‘apotopoto lea o le fono o le ‘au ositaulaga sili ma le ‘au faresaio, ‘ua latou fa‘apea ane, “Se a sa tatou mea e fai? Auā ‘ua faia fa‘ailoga e tele e lea tagata. 48A fai e fa‘apenei ‘ona tatou tu‘u ai pea o ia, e talia o ia e tagata uma lava; e ō mai fo‘i tagata Roma, ‘ona fa‘aumatia lea o la tatou nei mea ‘atoa ma lo tatou nu‘u.”

49A o le tasi o i latou, o Kaiafa, o le ositaulaga sili o ia i lea lava tausaga, ‘ua fai atu o ia ‘iā te i latou, “Tou te lē iloa lava se mea e tasi; 50tou te lē mafaufau fo‘i, e aogā ‘iā te i tatou ‘ona oti o le tagata e to‘atasi ma sui o le nu‘u, ‘ina ‘ia lē oti le nu‘u uma lava.” 51E le‘i fua mai ‘iā te ia ‘ona fai atu o lea mea, a ‘ona o ia o le ositaulaga sili i lea lava tausaga, na ia vavalo ai, o le a maliu Iesu e sui ai le nu‘u.#Kene 50.20; Eso 28.30; Nume 27.21 52E lē gata fo‘i i le nu‘u, a ‘ia fa‘apotopotoina ‘ia fa‘atasi le fānau a le Atua ‘ua ta‘ape‘ape.#Ioane 10.16; 1 Ioane 2.2; Mata 12.30

53Talu fo‘i i lea aso ‘ua latou taupulepule ai e fasioti ‘iā te ia. 54O le mea lea ‘ua lē toe femaliua‘i fa‘aaliali ai Iesu i tagata o Iutaia, a ‘ua maliu ‘ese o ia i lea mea i le lau‘ele‘ele e lata ane i le vao, i le ‘a‘ai e igoa ‘iā Efaraima, ‘ua nofo ai ma ona so‘o.

55‘Ua lata mai le paseka a tagata Iutaia, e to‘atele ‘ua ō a‘e i Ierusalema a o le‘i o‘o i le paseka, ‘ina ‘ia latou fa‘amamā ‘iā te i latou.#2 No 30.17; Mare 10.32; Galu 21.24, 26 56‘Ona latou sā‘ili lea ‘iā Iesu, ‘ua fetautalatala‘i fo‘i ‘ina o latou o tutū i le malumalu, “O le a la ‘outou manatu? E lē sau ‘ea o ia i le tausamiga?” 57Sa tu‘u fo‘i le poloa‘i a le ‘au ositaulaga sili ma le ‘au faresaio, ‘āfai ‘ua iloa e se tasi se mea o i ai o ia, ‘ia fa‘ailoa atu, ‘ina ‘ia latou pu‘e ‘iā te ia.

Currently Selected:

Ioane 11: RSCB

Highlight

Copy