Iutita 5
5
O le Fono a Holofene ma Ta‘ita‘i ‘Au
1Ma ‘ua ta‘ua mai e nisi ‘iā Holofene, le ta‘ita‘i o ‘au a tagata Asuria, ‘ua nofo sauni le fānauga a Isaraelu e tete‘e atu ‘iā te ia ma ‘ua latou punitia ala i mauga. 2‘Ona mū ai lea o lona loto i le tigā anoanoa‘i ma le ita tele, ‘ua vala‘au mai i ta‘imua uma o Moapi ma ta‘ita‘i o Amona. 3Ma ‘ua fai atu ‘iā te i latou: ‘Inā ‘outou ta‘u mai ia po o ai lenei nu‘u ‘ua na si‘omia le atu mauga, po o ā o latou ‘a‘ai, pe fia pe tele fo‘i; po o le a fo‘i lo latou malosi, po o le to‘atele o i latou; po o ai le ta‘ita‘i o a latou ‘au. 4Po o le a fo‘i le mea ‘ua na o i latou, i tagata uma lava e nonofo i le itū i sasa‘e, na latou tauemu ‘iā te i tatou, ma ‘ua latou le fa‘afetaia‘i ‘iā i tatou e tali ai i tatou ma le filemū?
O le Fa‘amatalaga a Akiora
5‘Ona tali mai lea o Akiora, i le ta‘ita‘i o le fānauga uma lava a Amona, ‘ua fa‘apea mai: A e finagalo malie e fa‘alogo mai ‘iā te a‘u, lo‘u ali‘i e, ‘ou te ta‘u atu i ou luma le ‘upu moni e uiga i lenei nu‘u ‘ua nofo i le atu mauga, e leai fo‘i se ‘upu pepelo e tasi e alu nai lo‘u gutu. 6O lenei nu‘u o le fānauga i latou a tagata Kaletaia. 7Na mua‘i nonofo i latou i Mesopotamia, ‘ae na mumusu ‘ona mulimuli atu i atua o latou tamā sa i le ‘ele‘ele o Kaletaia. 8O lenei ‘ua latou tu‘ulafoa‘i sauniga a o latou tamā sa to‘atele o latou atua, 9ma ‘ua latou ‘au‘auna tasi i le Atua o le lagi, o ia lea na poloa‘i atu ‘iā te i latou ‘ia latou ō ‘ese i lea mea ma ‘ia latou mau i Karana. A ‘ua vela vela le oge i le lau‘ele‘ele uma, ‘ona latou ō ifo lea i Aikupito, ma ‘ua fa‘ato‘ateleina i latou i lea mea i tausaga e fa selau, ‘ua lē toe mafaitaulia ai la latou ‘au.#Kene 11.31—12.5; 42.1-5; 46.1-7; Eso 1.7
10Ma ‘ua mafatia i latou e le tupu o Aikupito, ‘ua na fa‘apologaina i latou i le atiina a‘e o ona ‘a‘ai i le ‘omea ma le ma‘a ‘omea, ‘ona latou ‘alalaga atu ai lea i lo latou Atua, ma ‘ua taia le lau‘ele‘ele ‘atoa o Aikupito i mala ‘ese‘ese.#Eso 1.8-14; 7—12 11‘Ua tuli‘eseina i latou e tagata Aikupito ma ‘ua tāofia ai o mala, ‘ona toe fia pu‘e lea i latou e Aikupito ‘ina ‘ia latou toe ‘au‘auna mai ‘iā te i latou;#Eso 14.21-22 12a ‘ua sōsōla i latou ma ‘ua fa‘aavanoaina le sami e le Atua o le lagi, ‘ua tutū o vai i itū e lua e pei o le pavali, ma ‘ua latou ui atu i le aliti sami o sāvavali i le mea matūtū.
13O le mea lava lea na ufitia ai fo‘i i le sami le ‘au a Aikupito e lē mafaitaulia le to‘atele, ‘ua lē tu‘ua ai lava se to‘atasi na te tala atua i ē amulī. 14A ‘ua latou sopo‘ia le sami Ulaula, ‘ona latou mau ai lea i le fanua tu‘ufua o le mauga o Sinai, o le mea sa lē mafai lava ‘ona mautū ai se tagata, pe mālōlō ai se atali‘i o le tagata. 15O le mea lenā na fa‘amāgalo ai o vai ‘o‘ona ‘ina ‘ia latou feinu ai ma ‘ua latou maua ai le mea e ‘ai mai le lagi i tausaga e fagafulu. 16O mea uma na latou ulu atu ai, e aunoa ma se ‘aufana po o se ū, e aunoa fo‘i ma se talitā ma se pelu, ‘ua tau lo latou Atua mo i latou ma ‘ua mālō o ia.
17Ma ‘ua leai se tasi na te tauemu i lea nu‘u, vaganā o aso sa tēte‘a ‘ese ai i le ‘au‘auna i le Ali‘i lo latou Atua. 18A o aso uma na latou ifo ai i se tasi, e ‘ese i lo latou lava Atua, ‘ua faia ai i latou ma mea e vetea, ‘ua tu‘uina i le pelu, ‘ua ‘avea ma tauemuga. 19A o aso uma ‘ua latou salamō ai ‘ina ‘ua latou te‘a‘ese i le ‘au‘auna i lo latou Atua, ‘ua foa‘iina ai e le Atua o le lagi ‘iā te i latou le malosi e tete‘e atu i o latou fili. 20Mulimuli ane, ‘ua latou fa‘ato‘ilaloina tupu o sā Kananā ma sā Iepusē ma sā Faresā ma sā Hetī ma sā Hevī ma sā Amorī, ma le ‘au faipule uma o Hesepona, ma ‘ua latou maua lo latou lau‘ele‘ele ‘atoa ma o latou ‘a‘ai.#Nume 21.21-32; Iosu 3
21O aso uma fo‘i sa latou le agasala ai i luma o lo latou Atua, ‘ua manuia ai lava i latou; auā e ‘ino‘ino lo latou Atua i le amio leaga.#Isai 59.2 22A o le‘i o‘o fo‘i i tausaga ‘ua fa‘ato‘ā mavae atu nei, na latou ō ‘ese i le ala na tu‘u atu ‘iā te i latou e le Atua ‘ia latou sāvavali i ai, na olopalaina ai i latou i le tau‘a e nu‘u e tele; o le to‘atele fo‘i o i latou ‘ua ‘avea fa‘atagataotau‘a i le nu‘u ‘ese.#2 Tu 25
23Mulimuli mai nei, ‘ua latou toe fo‘i atu i le Ali‘i lo latou Atua, ‘ona toe aofa‘iina ai lea i latou a‘i le tāfeaga na tāfea ai i latou, ma ‘ua latou a‘e i nei atumauga uma ma ‘ua latou toe maua Ierusalema, o le mea o i ai lo latou malumalu. 24O lenei, lo‘u ali‘i e, ‘ia e su‘esu‘e po o i ai sa latou agasala i luma o lo latou Atua; ‘ona tatou a‘e lea e tau ma i latou, auā e tu‘uina lava i latou ‘iā te oe e lo latou Atua, e fa‘ato‘ilaloina fo‘i i latou i lalo o lau pule.#Iuti 11.9 25Peita‘i, a leai se amio leaga a lenei nu‘u i luma o lo latou Atua, tatou te lē lavā tete‘e atu ‘iā te i latou, auā e puipui lo latou Atua ‘iā te i latou, ‘ae ‘avea i tatou ma tauemuga i nu‘u uma lava.
O le Tete‘e o Tagata
26A ‘ua o‘o ‘ina fa‘auma e Akiora o ana ‘upu ia, ‘ona tigā ai lea o ali‘i sili uma o Holofene, ma ‘ua latou manatu e fasioti ‘iā te ia, o fetautalatala‘i i latou: 27Po o ai lava lenei ‘ina ‘ua fa‘apea mai e mafai ‘ona te‘ena le tupu o Nepukanesa māna ‘au e le fānauga a Isaraelu, o tagata ‘ua leai ni ‘au‘upega, o tagata vaivai ma le lē masani i le tau‘a? 28O lenei, ‘ia tatou a‘e i le atumauga, ‘ina ‘ia iloa ai e Akiora ‘ua na fa‘asesē ‘iā te i tatou; a uma fo‘i ‘ona pu‘eina o latou ali‘i sili, ‘ona tuia fo‘i o ia i le pelu fa‘atasi ma i latou, 29‘ina ‘ia iloa ai e nu‘u uma lava o Nepukanesa o le atua ia o le lau‘ele‘ele ma ‘ua leai se tasi, ‘ua na o ia lava.
Currently Selected:
Iutita 5: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.