Sapakuka 3
3
O le Tatalo a Sapakuka
1O le tatalo a le perofeta o Sapakuka, na fai ma pese.
2Le ALI‘I e, ‘ua ‘ou fa‘alogo i le tala ‘iā te oe,#Sala 44.1; 77.9; 85.6; 90.16
‘ua ‘ou mata‘u ai.
Le ALI‘I e, ‘ia e toe fa‘aolaolaina lau galuega i ia tausaga,
o ia tausaga ‘ia e fa‘ailoa mai ai;
‘ia e manatu i le alofa a o e to‘asā.
3Na afio mai le Atua mai Timanu,
na afio mai fo‘i le Pa‘ia mai le mauga o Parana.
Sa ufitia le lagi i lona pupula,
o lona vi‘iga fo‘i sa tumu ai le lalolagi.
4O le pupula fo‘i sa fa‘apei o le lā,#Eseki 1.27
sa o‘o mai ‘ave ai lona ‘a‘ao,
sa i ai fo‘i le ufiufi o lona mana.
5Sa muamua atu le fa‘ama‘i i ona luma,
sa mulimuli fo‘i ‘iā te ia le ma‘i vevela.
6Sa tu o ia ma fuafua le lalolagi;#Kene 49.26; Isai 51.9; Mika 1.4
na ia silasila mai ma na fa‘agateteina nu‘u ‘ese.
Na fa‘ata‘ape‘apeina ai fo‘i mauga o le vavau;
na fa‘amaualaloina ai mauga iti o le vavau;
o ona ala ia mai le vavau.
7Na ‘ou iloa fale ‘ie o Kusa ‘ua puapuagātia;
na gatete ‘ie puipui o le nu‘u o Mitiana.
8Na to‘atama‘i ‘ea le ALI‘I i vaitafe?#Teu 33.26-27; Sala 18.10; 114.5; Isai 66.15
Pe na e to‘asā ‘ea i vaitafe?
Pe na e ma‘ema‘eā ‘ea i le sami,
‘ina ‘ua e ti‘eti‘e i au solofanua,
ma ou nofoa fa‘ata‘avalevale o le fa‘aolataga?
9Na tō ‘ese lava le fa‘amoega o lau ‘aufana,
o tautoga na e fetalai mai ai i itū‘āiga.
Na e vaevaea le lalolagi i vaitafe.
10Na iloa oe e mauga, ‘ua latou gatete ai;#Eso 14.22; 19.18
‘ua tafe ane le tāfega o vai.
Na gagana mai le moana,
‘ua na sisi‘i i luga ona lima.
11Sa tutū pea le lā ma le masina i le mea la te mau ai;
o le malamalama o au ū fanafana na latou sāvavali ai,
ma le malamalama o lou tao pupula.
12Sa e afio atu i le lalolagi ma le to‘atama‘i,#Mika 4.12-13
sa e soli nu‘u ‘ese i lou to‘asā.
13Sa e afio atu e fa‘aola i lou nu‘u,
e fa‘aola i le na e fa‘au‘uina.
Sa e foa le ulu i le fale o lē amio leaga,
i lou fa‘ata‘atia fua le fa‘avae ‘ia o‘o i le ua lava.
14Sa e soso‘a le ali‘i sili o ona talitali i ona lava tao;
sa latou feosofi mai pei se afā e fa‘ata‘ape‘ape ‘iā te a‘u;
sa fai mo latou mitamitaga le fa‘aumatia fa‘alilolilo o le tagata mativa.
15Sa e afio i totonu o le sami ma au solofanua,#Sala 77.19
sa e afio fo‘i i le faupuegavai e tele.
16Na ‘ou fa‘alogo ai, ‘ona sapotuvale ai lea o lo‘u manava,#Isai 14.3-4; Iere 4.19
sa tete o‘u laugutu i le leo.
‘Ua o‘o mai ai le pala i o‘u ivi,
‘ua ‘ou tetemū ai lava.
‘Ae filemū a‘u i le aso o le puapuagā,
pe a alu a‘e o ia i le nu‘u e si‘i mai le tau‘a ‘iā te i tatou.
17E ui lava ‘ina lē fuga mai le mati,
e leai fo‘i ni fua i vine,
e i‘u vale le fua o le olive,
e le tupu mai fo‘i ni mea e ‘ai i le fanua;
e fa‘aumatia le lafu mamoe i le lotoā,
e leai fo‘i ni povi i le fale povi;
18‘ae peita‘i a‘u, ‘ou te ‘oli‘oli lava i le ALI‘I,#Iopu 13.15; Sala 9.14; Luka 1.47
‘ou te fiafia lava i le Atua o lo‘u fa‘aolataga.
19O le ATUA le Ali‘i, o lo‘u malosi ia,#2 Samu 22.34; Sala 18.33; Isai 38.20; Amo 4.13
na te faia o‘u vae e pei o vae o ‘aila,
o ia fo‘i ‘ou te savali ai i a‘u mea maualuluga.
Ma le usu pese i nekina.
Currently Selected:
Sapakuka 3: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
