Esekielu 46
46
O isi ‘Upu fa‘atonu i le Malumalu ma Sauniga e fai i Ai
1‘Ua fa‘apea ‘ona fetalai mai o le Ali‘i le ATUA: O le puipui o le lotoā tuloto le ‘ua fa‘asaga i sasa‘e, e punitia ia i aso e ono e fai ai galuega; a o le sapati e avanoa ai, ‘atoa ma le aso o le masina fa‘ato‘ā va‘aia e avanoa ai.#Eseki 44.1 2E ulufale le ali‘i sili i le ala o le fa‘apaologa o le puipui i fafo ma tu i le pou o le faitoto‘a, e sauni fo‘i e ositaulaga lana taulaga mū ma ana taulaga fa‘afetai, e tapua‘i fo‘i o ia i tala ane o le faitoto‘a, ‘ona alu lea o ia; ‘ae lē punitia le faitoto‘a se‘ia o‘o i le afiafi.#1 No 9.18; Eseki 40.38-39; 44.3; 45.19 3E tapua‘i fo‘i tagata o le nu‘u i lenei faitoto‘a i luma o le ALI‘I i sapati ma masina fa‘ato‘ā va‘aia.
4O le taulaga mū e avatua e le ali‘i sili i le ALI‘I i le aso sapati, e ono tama‘i mamoe ‘ia sao ‘ona lelei ma se mamoe po‘a e sao ‘ona lelei.#Nume 28.3, 9, 10; Eseki 45.17 5O le taulaga i mea e ‘ai, o le efa lea i le mamoe po‘a, o le taulaga i mea e ‘ai i tama‘i mamoe e fa‘atatau i mea ‘ua ‘iā te ia, o le suāu‘u fo‘i i le efa.#Teu 16.17; Eseki 45.24 6O le aso fo‘i o le masina fa‘ato‘ā va‘aia e avatu ai le povi po‘a ta‘anoa e sao ‘ona lelei ma tama‘i mamoe e ono ma se mamoe po‘a; e sao ‘ona lelei i latou. 7Na te saunia fo‘i le taulaga i mea e ‘ai, o le efa e tasi i le povi po‘a ma le efa fo‘i i le mamoe po‘a; ‘ae avane i tama‘i mamoe e fa‘atatau i mea ‘ua na maua, o le sinu o suāu‘u fo‘i i le efa. 8A ulufale le ali‘i sili na te ui ane i le ala o le fa‘apaologa o lenā puipui, na te ulufafo ai fo‘i i lenā lava ala.#Eseki 46.2
9A ō ane tagata o le nu‘u i luma o le ALI‘I i tausamiga, o lē ulufale i le ala o le faitoto‘a i le itū i matū e tapua‘i, e ulufafo ia i le ala o le faitoto‘a i le itū i saute; o lē ulufale fo‘i i le faitoto‘a i le itū i saute, e ulufafo ia i le ala o le faitoto‘a i le itū i matū; na te lē ulufafo i le ala o le faitoto‘a na ia ulufale ai, ‘ae ulufafo o ia i le mea e feagai ai. 10A o le ali‘i sili, a latou ulufale, e ulufale o ia fa‘atasi ma i latou; a latou ulufafo, e ulufafo fo‘i o ia. 11O tausamiga ma fa‘apotopotoga e fai ai le taulaga i mea e ‘ai, o le efa lea i le povi po‘a, o le efa fo‘i i le mamoe po‘a, a o tama‘i mamoe e fa‘atatau i mea ‘ua ‘iā te ia, o le sinu fo‘i o suāu‘u i le efa.
12A sauni fo‘i le ali‘i sili se taulaga mū e manatu fua o ia ‘ona fai po o taulaga fa‘afetai na te manatu fua ‘ona fai i le ALI‘I, e fa‘aavanoaina mo ia le faitoto‘a e fa‘asaga i sasa‘e, na te saunia fo‘i lana taulaga mū ma ana taulaga fa‘afetai e pei ‘ona fai i le aso sapati; ‘ona ulufafo ai lea o ia; ‘ona punitia lea o le faitoto‘a ‘ina ‘ua ulufafo atu o ia.#Levi 1.3; 3.1; Teu 23.23; Eseki 46.1-2
O Taulaga mo Aso Uma
13‘E te sauni fo‘i i aso uma le taulaga mū i le ALI‘I, o le tama‘i mamoe e tasi lona tausaga e sao ‘ona lelei, ‘e te sauni ai i lea taeao ma lea taeao.#Eso 29.38-40 14‘E te sauni ai fo‘i se taulaga i mea e ‘ai i lea taeao ma lea taeao, o lona vaega e ono o le efa, o lona vaega fo‘i e tolu o le sinu o suāu‘u e palu a‘i le falaoa lelei; o le taulaga i mea e ‘ai e lē aunoa, o le sauniga i le ALI‘I e fa‘avavau. 15Latou te saunia lava le tama‘i mamoe ma le taulaga i mea e ‘ai ma le suāu‘u i lea taeao ma lea taeao, o le taulaga mū e lē aunoa.
O le Ali‘i sili ma lona Tofi
16‘Ua fa‘apea ‘ona fetalai mai o le Ali‘i le ATUA: A avatu e le ali‘i sili se mea alofa i se tasi o ona atali‘i e fai lea ma tofi o ona atali‘i; e fai lea mo i latou ‘ona o le tofiga. 17‘Ae ‘āfai na te avatu se mea alofa a‘i lona tofi i se tasi o ana ‘au‘auna, e fai lea mōna se‘ia o‘o i le tausaga e sa‘oloto ai, ‘ona toe i‘u ane lea i le ali‘i sili; a o lona tofi e fai lea mōna atali‘i, o i latou lava.#Levi 25.10 18E lē ‘avea fo‘i e le ali‘i sili se mea a‘i le tofi o le nu‘u, e tuli ‘ese ai i latou i lo latou tofi; ‘ae na te avane tofi o ona atali‘i a‘i ana lava mea ‘ua maua; ‘ina ‘ia lē fa‘ata‘ape‘apeina ai lo‘u nu‘u i o latou tofi.#1 Tu 21.3, 7; Eseki 45.8
O le Potu e Tunu ai Taulaga i le Malumalu
19‘Ona ia ‘aumai lea ‘iā te a‘u i le ala o i le tafatafa o le faitoto‘a i potu pa‘ia o le ‘au ositaulaga e fa‘asaga i le itū i matū; fa‘auta fo‘i, o i ai le tasi mea i itū e lua i sisifo. 20‘Ona fai mai lea o ia ‘iā te a‘u, “O le mea lenei e tunu ai e ositaulaga le taulaga mo le sesē ma le taulaga mo le agasala, latou te tao ai fo‘i le taulaga i mea e ‘ai; ‘ina ‘ia latou le avatu ai i le lotoā aupito i tua e fa‘apa‘iaina ai le nu‘u.”#1 Samu 2.13-14; 2 No 35.13; Eseki 44.19
21‘Ona ia ‘aumaia lea o a‘u i le lotoā aupito i tua, ‘ua ia ta‘ita‘i fo‘i ‘iā te a‘u i pito lotoā e fa; fa‘auta fo‘i, ‘ua ta‘itasi le pito lotoā ma se lotoā. 22O pito e fa o le lotoā, sa i ai lotoā ‘ua soso‘o ai, e fagafulu o kupita lona umi, e tolugafulu o kupita lona lautele; o ia pito e fa e tasi lo latou fua. 23Na i ai fo‘i le ‘aupā ‘ua so‘o ai, ‘ua so‘o ai lava ia lotoā e fa, na fai fo‘i mea e tunu ai mea i lalo ifo o ‘aupā ‘ua so‘o ai. 24‘Ona fai mai lea o ia ‘iā te a‘u, “O mea ia a latou o ē tunu mea, e tunu ai taulaga a le nu‘u e i latou o ē ‘au‘auna i le fale.”#44.11; 46.20
Currently Selected:
Esekielu 46: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
