Esther Greek Fa‘atomuaga
Fa‘atomuaga
‘Ua ulutala le tusi ‘iā Eseta, o le fafine Iutaia sa ola i le atunu‘u o Peresia. O le ‘a‘ano ‘autū o le tusi lenei o le lavea‘iga mai o tagata Iutaia mai lima o latou fili, e ala lea i galuega lavea‘i ma le lotonu‘u o lenei tama‘ita‘i o Eseta. O le isi ‘autū o le tusi o le alofa o le Atua i lona nu‘u filifilia ‘ona o lenei fafine loto toa ma ‘ua ‘avea le lavea‘iina e Eseta o tagata o lona nu‘u ma aso fa‘amanatu ‘ua fa‘aigoa o le “Puro,” ‘ina ‘ia manatua ai pea e tagata Iutaia le aso lea na lavea‘iina ai latou mai o latou fili.
O le isi itū tāua, o le Tusi ‘iā Eseta, e lua ona vaega. O le vaega (1) pu‘upu‘u i le gagana Eperu e pei ‘ona i ai i le Feagaiga Tuai (2) vaega umi i le gagana Eleni e pei ‘ona ta‘ua o le Vaega Fa‘aopoopo; sa tu‘uina i le fa‘asi‘usi‘uga o le Feagaiga Tuai. ‘Ua mafai nei ‘ona toe fa‘afo‘i mai le Vaega Fa‘aopoopo ma toe tu‘u i le Eseta e pei ‘ona i ai le fa‘atulagaga o Tusi i le Tusi Pa‘ia Eleni.
O le Fa‘asologa o Matā‘upu:
O ‘Upu Tomua 1-11*
Taupulepulega i le Tupu 12-17*
‘Ua ‘avea Eseta ma masiofo 1.1—2.23
O fuafuaga leaga a Hamanu 3.1-13
Tusi a le Tupu 3.14-19, 14-15*
Fa‘anoanoaga o sā Iutā 4.1-17
Tatalo a Moretekai 4.18-27
Tatalo a Eseta 4.28-46
Tausamiga a Eseta 5.1-2, 3-23
‘Ua fasiotia Hamanu 6.1—7.10
‘Ua fa‘asilisilina a Moretekai 8.1-12
Tulafono a le Tupu 8.13-32, 33-37
Tausamiga o Puro 9.1-32
Fa‘asilisiliina o Moretekai 1.1-3
O le miti a Moretekai 10.4-13
‘Upu Mulimuli 10.14
O ‘Upu Tomua
O le Miti a Moretekai#O le fuai‘upu 1-11 lenei o le ‘Upu Tomua mai le Tusi Pa‘ia i le gagana Eleni, sa tu‘uina i le fa‘asi‘usi‘uga o Tusi o le Feagaiga Tuai, sa ta‘ua o le Tusi a Eseta (Vaega Fa‘aopoopo) matā‘upu 11.2-12.
1O lona lua o tausaga i le nofoa‘iga a Asueru le sili, o le ulua‘i aso o le masina o Nisani, na fai ai lana miti e Moretekai, le atali‘i o Iairo, le atali‘i o Semi, le atali‘i o Kiso, mai le itū‘āiga o Peniamina. 2O ia o le tagata Iutaia ‘ua mau i le ‘a‘ai o Susana, o le tagata mamalu o ia ‘ua fai tofi i le maota o le tupu. 3Na ‘avea o ia fa‘atagataotau‘a fa‘atasi ma Iekonia le tupu o Iuta e Nepukanesa le tupu o Papelonia. 4O lana miti lenei:
Fa‘auta, o le vāvāō ma le vevesi, o le faititili ma le mafui‘e, o le nunuvale i le lalolagi! 5Fa‘auta fo‘i, ‘ua sōsō mai tarako tetele e lua, ‘ua sauniuni e tau ‘ua mata‘utia la lā‘ua tagi. 6O le tagi fo‘i a ia manu na sauni ai loa o nu‘u uma e si‘i le tau‘a i le nu‘u o ē amiotonu. 7Fa‘auta, ‘ua o‘o i le lalolagi le aso o le pouliuli ma le pogisā, o le puapuagā ma le tigā, o le atuatuvale ma le femēmēa‘i. 8‘Ua atuatuvale uma le nu‘u amiotonu; ‘ua latou matata‘u i le leaga a o‘o mai latou te fano ai. 9‘Ona latou ‘alalaga lea i le Atua. O la latou ‘alaga fo‘i, e peiseaī o se punāvai itiiti ‘ua ‘avea ma vaitafe tele, ‘ua anoanoa‘i le vai. 10‘Ua o‘o mai le malamalama i le oso a‘e o le la. ‘Ua fa‘aeaina o ē fa‘amaulalo, ‘ua latou fa‘aumatia o ē malolosi. 11‘Ua iloa e Moretekai i lana miti o mea ‘ua tonu i le finagalo o le Atua o le a faia e ia, ‘ua ala mai, ‘ona ia mafaufau ai lea i le aso ‘atoa o su‘esu‘e au‘ili‘ili i le uiga o lana miti.
O le Taupulepulega leaga i le Tupu#O le fuai‘upu 12-17 lenei o le ‘Upu Tomua mai le Tusi Pa‘ia i le gagana Eleni, sa tu‘uina i le fa‘asi‘usi‘uga o Tusi o le Feagaiga Tuai, sa ta‘ua o le Tusi a Eseta (Vaega Fa‘aopoopo) matā‘upu 12.1-6.
12Sa mau Moretekai i le maota o le tupu fa‘atasi ma Kapata ma Tara. O i lā‘ua o eunuka sa leoleo i le maota o le tupu. 13Na ia fa‘alogo ‘iā la ‘upu ma su‘esu‘e a la filifiliga, ‘ona ia malamalama lea ‘ua la taupulepule e fa‘ao‘o o la lima i le tupu o Asueru; ‘ona ia logo atu lea le tupu e uiga ‘iā te i lā‘ua. 14‘Ua su‘esu‘eina e le tupu o eunuka ia e to‘alua, ‘ua la ta‘utino atu la la taupulega, ‘ona tu‘uina lea i lā‘ua ‘ia fasiotia. 15Na fa‘amauina e le tupu le tala i nei mea i Tala Fa‘asolopito; na tusia fo‘i le tala e Moretekai lava ia. 16‘Ona tu‘uina lea e le tupu ‘iā Moretekai se tofiga i lona maota, ‘ua na avatu fo‘i ni mea alofa ‘iā te ia ‘ona o ia mea. 17‘Ae peita‘i, o Hamanu, le atali‘i o Hametatu o lo sa Akakō, ‘ua matua alofaina o ia e le tupu, ma ‘ua sā‘ili e ia se ala e fa‘aleaga atu ai ‘iā Moretekai ma lona nu‘u ‘ona o eunuka ia e to‘alua o le tupu.
Currently Selected:
Esther Greek Fa‘atomuaga: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.