Esther Greek 5
5
O le Tausamiga na Saunia e Eseta
1 #O le fuai‘upu 1-2 mai le gagana Eperu. ‘Ua o‘o i le aso tolu, ona ‘ofu ai lea o Eseta i ‘ofu o le masiofo, ma tu atu i le lotoā o le fale o le tupu, o le lotoā i totonu i luma o le fale o le tupu, o lo‘o nofo mai le tupu i le nofoāli‘i o le tupu i le fale o le tupu, ‘ua feagai ma le faitoto‘a o le fale. 2‘Ua iloa mai e le tupu o le masiofo o Eseta o lo‘o tu atu i le lotoā, ‘ona alofaina lea o ia e ia. ‘Ua fa‘aloaloa mai fo‘i e le tupu lona to‘oto‘o auro na i ai i lona lima ‘iā Eseta; ‘ona fa‘alatalata atu ai lea o Eseta, ma pa‘i atu i le i‘u o le to‘oto‘o.#Ese 4.11; 8.4
3 #O le fuai‘upu 3-11 mai le Tusi Pa‘ia i le gagana Eleni, sa tu‘uina i le fa‘asi‘usi‘uga o Tusi o le Feagaiga Tuai, sa ta‘ua o le Tusi a Eseta (Vaega Fa‘aopoopo) 15.2-19 ‘Ua fai mai a ia: ‘Ia e manatua o aso o lou tagatanu‘u na fagaina ai oe e ‘ou nei lima. Auā o Hamanu, o le tulua i le mālō, o lo‘o ia taumafai i le tupu ‘ina ‘ia fasiotia i tatou. ‘Ia e ‘ai‘oi atu i le Ali‘i, ma tautala atu i le tupu mo i tatou, ma lavea‘i i tatou mai le oti. ‘Ua o‘o i le aso tolu, ‘ua uma ai lana tatalo, ‘ona tō ‘ese ai lea e Eseta o ona ‘ofu na ia tatalo ai, ma fa‘a‘ofu o ia i ‘ofu matagofie. ‘Ua pupula tele lona ‘aulelei i ona ‘ofu matagofie, ‘ua tagi atu fo‘i o ia i le Atua o lo‘o silasila mai i mea uma ma fa‘aola mai. ‘Ua alu o ia fa‘atasi ma ana ‘au‘auna teine e to‘alua. ‘Ua ia lagolago fa‘avaivai i le tasi, a o le tasi na ia si‘i le pito ‘ofu o Eseta. E peiseaī o lona fia fa‘apelepele i lona tino ‘ua ia lagolago ai fa‘avaivai i lana ‘au‘auna, a o le mea moni, o lona vaivai fa‘amaoni ‘ua lē mafai ai ‘ona savali to‘atasi; a o le tasi ‘au‘auna teine na si‘i lona pito ‘ofu ‘ua sosolo i le ‘ele‘ele. 4‘Ua ‘ato‘atoa lona ‘aulelei, ‘ua mūmū fo‘i ona mata ma ‘ua mata fiafia e pei o se alofaina, a o lona loto ‘ua tumu i le fefe. 5‘Ua te‘a i tua o faitoto‘a uma, ‘ona tu atu ai lea o ia i luma o le tupu. O lo‘o nofo mai le tupu i le nofoāli‘i, ‘ua ‘ofuina o ia i ona la‘ei o aso mamalu, ‘ua ufitia ai i le auro ma ma‘a tāua. ‘Ua mata‘utia tele lona mamalu. 6‘Ua tepa a‘e ona mata ‘ua pupula i le mamalu tele ma ‘ua na iloa atu o Eseta ma le ita tele. ‘Ua matapogia le masiofo, ‘ua segaia ona mata ma fa‘alagolago lona ulu i le ‘au‘auna na fa‘afeao ‘iā te ia. 7‘Ona fa‘aliliu ai lea e le Atua le loto o le tupu, ‘ua o‘otia ai i le agamalū, ‘ua ia oso a‘e nai lona nofoāli‘i ma le popole, ma tago ‘iā te ia i ona ‘a‘ao se‘ia toe ala o ia, ‘ua na fa‘amafanafana atu fo‘i ‘iā te ia i ‘upu fa‘afilemū ‘ua fa‘apea atu: 8O le a, Eseta? O a‘u o lou tuagane. ‘Aua ‘e te fefe! ‘E te lē oti lava. O la‘u tulafono mo tagata lautele lea. ‘Ia e sōsō mai. 9‘Ua si‘i a‘e i luga lona to‘oto‘o auro ma pa‘i atu i le ‘ua o Eseta; ‘ua ia fusi alofa fo‘i ‘iā te ia ma fa‘apea atu ‘iā te ia: ‘Ia e tautala mai! 10‘Ona fa‘apea lea Eseta ‘iā te ia: Le ali‘i e, ‘ua ‘ou va‘ai atu ‘iā te oe ‘ua pei o se agelu a le Atua. ‘Ona atuatuvale lea o lo‘u loto, ‘ua ‘ou fefe fo‘i i lou mamalu. Auā ‘ua ofoofogia oe, le ali‘i e, ‘ua matagofie tele ou fofoga. 11‘Ua tautala Eseta a ‘ua tauāu ‘ina vaivai ma matapogia ai. ‘Ua fa‘aatu le tupu, a o ana ‘au‘auna ‘ua latou taumafai ona fa‘amafanafana atu ‘iā Eseta.
12 #O le fuai‘upu 12-23 mai le gagana Eperu. ‘Ona fai mai lea o le tupu ‘iā te ia, “Le masiofo e, Eseta, se a ‘ea lou mana‘o? se a le mea ‘e te fa‘atoga mai ai? e o‘o lava i le vaeluaina o le mālō e avatua lava ‘iā te oe.”#Ese 7.2; 9.12; Mare 6.23
13‘Ona tali atu lea o Eseta, “‘Āfai e lelei i le tupu, ‘ia maliu atu le tupu ma Hamanu, i le asō, i le tautega ‘ua ‘ou saunia mo ia.”
14‘Ona fai mai lea o le tupu, “‘Ia fa‘avave ‘iā Hamanu, ‘ina ‘ia fai le mea a Eseta.” ‘Ona ō lea o le tupu ma Hamanu i le taumafataga na saunia e Eseta. 15‘Ona fai mai lea o le tupu ‘iā Eseta i le taumafataga o le uaina, “Se a le mea ‘e te fai mai ai? e avatua lava ‘iā te oe; pe se a fo‘i le mea ‘e te fa‘atoga mai ai? e o‘o lava i le vaeluagalemū o le mālō e faia lava.”
16‘Ona tali atu lea o Eseta, ‘ua fa‘apea atu, “O le mea ‘ou te ole atu ai, ma fa‘atoga atu ai o lenei: 17‘Āfai ‘ua alofaina a‘u e le tupu, ‘āfai fo‘i e lelei i le tupu ‘ona faia le mea ‘ou te fa‘atoga atu ai, ma ‘ia faia le mea ‘ou te mana‘o i ai, ‘ina toe afio mai ia le tupu ma Hamanu i le tautega ‘ou te saunia mo i lā‘ua, ‘ona ‘ou faia lea taeao e pei ‘ona fetalai mai ai o le tupu.”
‘Ua Faufau Hamanu na te Fasioti ‘iā Moretekai
18‘Ona alu atu lea o Hamanu i lenā aso ma le ‘oli‘oli ma le loto fiafia; a ‘ua va‘ai atu Hamanu ‘iā Moretekai i le faitoto‘a o le tupu, ‘ua lē tula‘i, ‘ua lē fa‘aaloalo fo‘i ‘iā te ia, ‘ona tele ai lea o le ita o Hamanu ‘iā Moretekai.#Ese 3.5 19A ‘ua ‘o‘ono Hamanu; ‘ua alu atu fo‘i i lona fale ma na ‘a‘auina atu nisi e ‘amia ana uō, ma Seresa lana avā. 20‘Ona fa‘amatalaina atu lea e Hamanu ‘iā te i latou o le mamalu o lona tamao‘āiga, ma le to‘atele o ana fānau, ma mea uma ‘ua fa‘asilisiliina ai o ia e le tupu, ma ‘ona ‘ua fa‘aeaina ai o ia ‘ia sili i ali‘i ma ‘au‘auna a le tupu.#Ese 3.1; 9.7-10 21‘Ua fai atu fo‘i Hamanu, “Sa mafai fo‘i le masiofo o Eseta ‘ona alu atu se isi fa‘atasi ma le tupu i le taumafataga na ia saunia, na o a‘u lava. ‘Ua fai mai fo‘i ‘iā te a‘u e alu ‘iā te ia a taeao fa‘atasi ma le tupu. 22‘Ae peita‘i e lē aogā lava ‘iā te a‘u o ia mea uma i aso uma ‘ou te va‘ai atu ai ‘iā Moretekai o lo sa Iutā o lo‘o nofo i le faitoto‘a o le tupu.”#Ese 2.19
23‘Ona fai atu ai lea ‘iā te ia o Seresa lana avā, ma ana uō uma, “‘Ia saunia se la‘au, ‘ia limagafulu kupita lona maualuga, ma ‘ia e fai atu i le tupu i le taeao, ‘ia fa‘atautauina ai Moretekai; ‘ona e alu ai lea ma le fiafia fa‘atasi ma le tupu i le taumafataga.”
‘Ua lelei lenā ‘upu ‘iā Hamanu; ‘ona ia faia lea o le la‘au.
Currently Selected:
Esther Greek 5: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.