1 Samuelu 3
3
‘Ua Fa‘aali mai le Ali‘i ‘iā Samuelu
1Sa ‘au‘auna le tama o Samuelu i le ALI‘I i luma o Eli; ‘ua valavala fo‘i le afioga a le ALI‘I i ia ona aso, ‘ua lē fa‘aalia mai so‘o.#1 Samu 2.11, 18; Sala 74.9; Amo 8.11 2O ia ona aso sa ta‘oto ai Eli i lona moega; ‘ua afuafua ‘ona popogi o ona mata,#3.2 popogi o ona mata: po o ‘ua pogisā lona va‘ai po o ‘ua tauaso. ‘ua lē mava‘ai; 3a o le‘i tineia le lamepa a le Atua, ‘ua ta‘oto Samuelu i le malumalu o le ALI‘I o i ai le ‘atola‘au a le Atua;#Eso 25.22; 27.20-21; 33.11; Levi 24.2-3; 1 Samu 1.9 4‘ona vala‘au lea o le ALI‘I ‘iā Samuelu; ‘ua tali atu o ia, “O a‘u lenei.” 5‘Ona momo‘e atu ai lea o ia ‘iā Eli, ma na fai atu ai, “O a‘u lenei, auā na e vala‘au atu ‘iā te a‘u.”
A ‘ua fai mai o ia, “‘Ou te le‘i vala‘au; fo‘i ia, ‘inā ta‘oto.” ‘Ona alu atu lea o ia, ‘ua ta‘oto.
6‘Ua toe vala‘au fa‘alua le ALI‘I, “Samuelu e!” ‘Ona tula‘i lea o Samuelu, ‘ua alu atu ‘iā Eli, ‘ua fai atu ai, “O a‘u lenei, auā na e vala‘au atu ‘iā te a‘u.”
‘Ua fai mai o ia, “Tā e, ‘ou te le‘i vala‘au atu; fo‘i ia, ‘inā ta‘oto.” 7A o Samuelu e le‘i o‘o ‘inā iloa e ia le ALI‘I, e le‘i fa‘aalia fo‘i ‘iā te ia le afioga a le ALI‘I.
8‘Ua toe vala‘au le ALI‘I ‘iā Samuelu, o le fo‘i fa‘atolu lea; ‘ona tula‘i lea o ia, ‘ua alu atu ‘iā Eli, ‘ua fai atu, “O a‘u lenei, auā na e vala‘au atu ‘iā te a‘u.”
‘Ona iloa ai lea e Eli ‘ua vala‘au le ALI‘I i le tama. 9‘Ona fai mai lea o Eli ‘iā Samuelu, “Alu ia, ‘inā ta‘oto; ‘āfai e vala‘au atu o ia ‘iā te oe, ‘e te fai atu ai, ‘Fetalai mai ia, le ALI‘I e, auā o lo‘o fa‘alogologo atu lau ‘au‘auna.’” ‘Ona alu ai lea o Samuelu, ‘ua ta‘oto i lona moega.
10‘Ua afio mai le ALI‘I, ‘ona tu lea ma vala‘au, pei ‘ona lua‘i fai, “Samuelu e, Samuelu e!”
‘Ona tali atu lea o Samuelu, “Fetalai mai ia, auā o lo‘o fa‘alogologo atu lau ‘au‘auna.”#Kene 28.13; 46.2; Eso 3.4; Nume 12.5; Galu 9.10
11‘Ona fetalai mai lea o le ALI‘I ‘iā Samuelu, “Fa‘auta, o le a a‘u faia se mea i Isaraelu, e ta‘itasi uma o ē fa‘alogologo ai ma ta‘alili ai ona taliga uma e lua. 12O lea aso ‘ou te fa‘ataunu‘u atu ai ‘iā Eli o mea uma na ‘ou fai atu ai i lona ‘āiga; ‘ou te amataina, ma ‘ou fa‘ai‘uina lava.#1 Samu 2.12, 17, 22-25, 30-36; 1 Timo 3.4 13‘Ua ‘ou ta‘utino atu ‘iā te ia#3.13 O isi fa‘aliliuga ‘ua ‘ou ta‘utino atu ‘iā te ia: gagana Eperu o le a ‘ou ta‘uina atu ‘iā te ia. ‘ou te fa‘asala lona ‘āiga e fa‘avavau, ‘ona o le pagotā ‘ua ia iloa; auā o ona atali‘i ‘ua fai mea e fetu‘uina ai i lā‘ua, a ‘ua ia lē tāofi ‘iā te i lā‘ua. 14O le mea lea ‘ua ‘ou tautō ai i le ‘āiga o Eli, e lē fa‘amāgaloina le pagotā a le ‘āiga o Eli i se taulaga, po o se mea foa‘i mai e fa‘avavau lava.”
15‘Ua ta‘oto Samuelu se‘ia o‘o i le taeao, ‘ona tō ai lea o puipui o le fale o le ALI‘I; a ‘ua fefe Samuelu e fa‘ailoa atu ‘iā Eli le mea na fa‘aalia mai. 16‘Ua vala‘au Eli ‘iā Samuelu, ‘ua fai mai, “Tā e, Samuelu;”
Na tali atu o ia, “O a‘u lenei.”
17‘Ona fai mai lea o ia, “O le a le ‘upu na fetalai mai ai ‘iā te oe, ‘aua lava ne‘i e nanā ‘iā te a‘u; ‘ia fa‘apea ‘ona faia e le Atua ‘iā te oe, ma ‘ia fa‘aopoopo i ai, pe ‘āfai ‘e te nanā ‘iā te a‘u se ‘upu o ‘upu uma na fetalai mai ai ‘iā te oe.”#Ruta 1.17 18‘Ona fa‘ailoa lea e Samuelu o ‘upu uma, ‘ua lē natia se mea ‘iā te ia. ‘Ona fai ane lea o ia, “O ia o le ALI‘I, ‘ia faia e ia le mea e finagalo i ai o ia.”
19‘Ua tupu Samuelu, sa ‘iā te ia le ALI‘I, ma ‘ua lē mafai ‘iā te ia ‘ona i‘u vale sina ana ‘upu.#1 Samu 2.21; 9.6 20‘Ua iloa e Isaraelu uma, e pau mai i Tanu e pau mai i Peresepa, ‘ua fa‘amaoni Samuelu e fai ma perofeta a le ALI‘I. 21‘Ua toe iloa le ALI‘I i Sailo, auā ‘ua fa‘aali le ALI‘I ‘iā Samuelu i Sailo i le afioga a le ALI‘I. ‘Ua o‘o fo‘i le ‘upu a Samuelu ‘iā Isaraelu uma.#Iosu 18.1
Currently Selected:
1 Samuelu 3: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
