1 Ioane 5
5
O lē Alofa i le Atua, e Alofa lea i lana Fānau
1O i latou uma o ē talitonu, o Iesu o le Keriso lava lea, ‘ua fānau mai i latou mai le Atua; o i latou uma fo‘i o ē alolofa i lē ana le fānau, e alolofa fo‘i i latou i lana fānau. 2O le mea lava lenei ‘ua tatou iloa ai e alolofa i tatou i fānau a le Atua, pe a tatou alolofa i le Atua, ma tausi i ana poloa‘iga. 3Auā o lenei lava le alofa i le Atua, ‘ia tatou tausi i ana poloa‘iga; e lē mamafa fo‘i ana poloa‘iga.#Ioane 14.15 4Auā o i latou uma o ē fānau mai i le Atua, e manumālō i latou i le lalolagi; o lenei fo‘i le manumālō e manumālō ai i le lalolagi, o lo tatou fa‘atuatua lava. 5O ai sē na te manumālō i le lalolagi, pe ‘āfai e lē talitonu, o Iesu o le Alo lava ia o le Atua?
O le Molimau ‘iā Iesu Keriso
6O ia lava lenei, o lē na maliu mai ma le vai ‘atoa ma le toto, o Iesu Keriso lava; e lē na o le vai, a o le vai ‘atoa ma le toto. 7O le Agaga fo‘i o lo‘o molimau mai, auā o le Agaga o le ‘upu moni lava ia. 8E tolu molimau, o le Agaga ma le vai ‘atoa ma le toto, o lea tolu e ‘auga atu ia i le mea e tasi. 9‘Āfai e talia e i tatou le molimau a tagata, e sili le molimau a le Atua; auā o lenei lava le molimau a le Atua na ia molimau mai ai, i lona lava Alo. 10O lē fa‘atuatua i le Alo o le Atua, ‘ua i totonu ‘iā te ia le molimau, o lē lē talitonu i le Atua ‘ua ia faia o ia ma pepelo; auā e le‘i talitonu o ia i le mau na molimau mai ai le Atua i lona lava Alo. 11O lenei fo‘i le mau, ‘ua foa‘iina mai e le Atua ‘iā te i tatou le ola e fa‘avavau, o le ola lava lea ‘ua i lona Alo.#Ioane 3.36 12O lē o ‘iā te ia le Alo, o ‘iā te ia le ola; o lē e lē o ‘iā te ia le Alo o le Atua, e lē o ‘iā te ia le ola.
O le Ola e Fa‘avavau
13‘Ua ‘ou tusi atu nei mea ‘iā te ‘outou o ē fa‘atuatua i le suafa o le Alo o le Atua ‘ina ‘ia ‘outou iloa ai ‘ua ‘iā te ‘outou le ola e fa‘avavau, ‘ina ‘ia ‘outou fa‘atuatua fo‘i i le suafa o le Alo o le Atua. 14O lenei fo‘i le loto tele ‘ua tatou maua i ona luma, pe ‘āfai tatou te ole atu ai se mea e tusa ma lona finagalo, e fa‘afofoga mai o ia ‘iā te i tatou. 15‘Āfai fo‘i ‘ua tatou iloa, e fa‘afofoga mai o ia ‘iā te i tatou i se mea tatou te fa‘atoga atu ai, ‘ua tatou iloa e maua e i tatou mea tatou te fa‘atoga atu ai ‘iā te ia.
16‘Āfai na iloa e se tasi lona uso ‘ua na fai se agasala e lē i‘u i le oti, ‘ia fa‘atoga o ia mo ia, ‘ona foa‘iina mai lea o le ola ‘iā te ia mo ē agasala e lē i‘u i le oti. O i ai le agasala e i‘u i le oti; ‘ou te lē fai atu, ‘ia ‘outou fa‘atoga atu mo lea agasala. 17O amioletonu uma lava, o agasala ia; o i ai fo‘i le agasala e lē i‘u i le oti.
18‘Ua tatou iloa e lē agasala se tasi o ē ‘ua fānau mai i le Atua, a o lē ‘ua fānau mai i le Atua, e tausi o ia e ia, e lē tago fo‘i lē o lo‘o leaga ‘iā te ia.
19‘Ua tatou iloa ē mai le Atua lava i tatou, a o le lalolagi uma o lo‘o nofo to‘ilalo i lē o lo‘o leaga.
20‘Ua tatou iloa fo‘i ‘ua maliu mai le Alo o le Atua, ‘ua ia foa‘iina mai fo‘i le mafaufau ‘iā te i tatou, ‘ina ‘ia tatou iloa ai le Atua moni. ‘Ua tatou ola fa‘atasi ma le Atua moni i lona Alo o Iesu Keriso. O lenei lava le Atua moni, ma le soifua e fa‘avavau.
21Le fānau e, ‘ia leoleo ‘outou ‘iā te ‘outou, ‘ia taumamao i tupua. Amene.
Currently Selected:
1 Ioane 5: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
