Jṉ. 8

Nuwa̱ wainmakman Jesusan itiariarma

1Tura Jesuska Uriwiunam wémiayi. 2Tura kashin tsawa̱r Yusa Uunt Je̱e̱n ataksha támatai ashí shuar Niin káutkarmiayi. Túrawarmatai Jesus pujus unuiniarmiayi. 3Nuyá̱ Israer shuara jintinniuri̱sha Pariséusha nuwa̱n wainmakman Jesusan itiariármiayi. Tura ashí iruntramunam ajapén awajsarmiayi. 4Tura Jesusan chicharainiak “Uuntá, ju̱ nuwa̱ tsanirma pujá achintkiáyi. 5Muisais akupkámunmasha nuna túraka ‘kayaja̱i̱ tukurar mátniuiti’ tawai. ¿Amesha warintmea?” tiármiayi. 6Aya mamikmar nekapsatai tusar tiármiayi. Nin sumamtikiatniun wakeriarmiayi. Nuyá̱ Jesus tsuntsumá ni uwejé̱ja̱i̱ nuṉká áarmiayi. 7Tura tuke iníam wajaki̱ chichaak “Ayu, atumíiya̱ yajauchin túrichu ákuṉka kayan achik nin emka tukuti” tímiayi. 8Tura nuna ti ataksha tsuntsumá nuṉká áimiayi. 9Tura ni chichame̱n antukar ni enentái̱n sumamawar úuntnumia̱ juarki̱ chikichik chikichik jiinkí̱ wéarmiayi.

Ashí wéarmatai Jesus Niṉki nuwa̱ja̱i̱ juákmiayi. 10Jesussha wajaki̱ aya nuwa̱nak wainiak chichaak “¿Ámin súmamtikramainia nusha tui̱ṉ pujuinia. Chikichkisha áwak?” 11tutai nisha “Atsá, Uuntá. Chikichkisha atsawai” tímiayi. Nuyá̱ Jesus chichaak “Ayu, Wisha súmamtiktsujme. Yamaikia weme atakka tunáa túrawaip” tímiayi.

Jesus tsáapninia áintsaṉkete

12Ataksha Jesus Yusa Uunt Je̱e̱n iruntrarun chicharainiak “Ju̱ nuṉkanam Wi tsáapninia áintsan shuara enentái̱n paant awajtajai. Ashí Wiji̱a̱i̱ tsaniṉ wekaana nú shuar kiritniunam wekasashtatui antsu shuar iwiaaku pujuwa nu tsáapninium wekasattawai” tímiayi. 13Pariséu nuikia chichainiak “Ame péṉkerum tau asam támena nu ántraiti” tuíniakui 14Jesus “Tuyá̱ winiaj tura tui̱ wéaj nu nékatsrume tura Wikia nékajai. Tuma asan winia péṉkerun táyatnak tájana nu péṉkeraiti. 15Ju̱ nuṉkanmaya̱ aents enentáimmiaja̱i̱ enentáimtakrum tí sumamtikrume. Tura Wikia chikichkinkesha súmamtiktsujai. 16Tura súmamtikiunka awajitsuk túrajai. Iis, Wiki shuar túramun péṉkerashit tusan enentáimtsujai antsu winia Apar Winia akuptúkua nusha Wiji̱a̱i̱ métek shuar túramun nékawai. 17Atumí akupkámuri̱i̱n áarmaiti ‘Jimiará shuar mai̱ nú chichamnak tákuiṉkia nu chicham nekasaiti.’ Muis. 17:6; 19:15 18Wátsek Wisha winia Aparsha mái̱ metek taji. Winia Aparsha akuptúkuiti” tímiayi. 19Takui̱ “¿Ame apasha tui̱ pujá?” tiármiayi. Tutai “Átumka Winiasha winia Aparsha nékatsrume. Winia nékarkurmeka winia Aparsha nekaawaintrume” tímiayi Jesus. 20Núnaka Yusa Uunt Je̱e̱n Yusa kuítri̱n suinia nui̱ wajá tímiayi. Tuma ai̱ṉ ni tsawantri̱ jeachu asamtai sepunam eṉkeatniun achikcharmiayi.

Wi wéajna nui̱ wéchamniaitrume

21Jesus ataksha chichaak “Wikia wéajai. Atumsha e̱a̱tkáttarme tura wi wéamunam wéchamniaitkiuram atumí tunaari̱ji̱a̱i̱ṉ jakattarme” tiármiayi. 22Israer shuarsha chicharainiak “Wi wéamunam wéchamniaitrume tutai nuiṉkia mámatpiash” tiármiayi. 23Nuiṉkia Jesus chichaak “Átumka nuṉkaya̱itrume antsu Wikia nayaimpinmaya̱itjiai. Ju̱ nuṉkaya̱itrume tura Wikia ju̱ya̱nchuitjiai. 24Tuma asamtai tájarme atumí yajauch túramuri̱ji̱a̱i̱ jakattarme. Nekas Wi tájana nuitjiai. Tura nu enentáimtachkurmeka atumí tunaari̱ji̱a̱i̱ jakattarme” tímiayi. 25Nisha aniasarmiayi “¿Amesha yáitiam?” tutai Jesussha “Yaunchu tájarme. 26Nu arantcha atumín súmamtikiatjarum tusan ti tíminiaitjiai. Winia Apar akuptúkua nuka tuke nekasa nuna tawai. Tura aya ni táman antukan ashí shuaran nunak tajai” tímiayi. 27Tuma ai̱ṉ ni Aparí̱n áujmatman peṉké nekaacharmiayi. 28Tuma asamtai chicharainiak “Aents Ajasuitjiana ju̱, numiniam ajintruarum yakí̱ takuriakrumin núja̱i̱ṉkia nekarattarme. Wi tájana nuitjiai tura winia enentái̱rja̱i̱ṉ takatsuk aya winia Apar unuitiurmanak tajai. 29Winia akuptúkua nuka tuke Wíji̱a̱i̱ṉ pujawai. Winia Apar wakeramun tuke shiir túrakui ikiurkichuiti” tímiayi. 30Tutai untsurí shuar Nin nekas enentáimtusarmiayi.

Tunaanum emetamu

31Israer shuaran Nin shiir enentáimtusarmia nuna Jesus chicharainiak “Wi tájarmena nu yawe̱tsuk túrakrumka nekas winia unuiniamur átatrume. 32Núja̱i̱sha timiá nekas ana nu nekaattarme tura nekas aṉkant ajastatrume” tímiayi. 33Nisha chichainiak “Iisha Aprajáma shuari̱ntji. Chikicha takarniúri̱ átai tusar peṉké emetachmaitji. ¿Urukamtai ‘Aṉkant ajastatrume’ tame?” tiármiayi. 34Jesus chichaak “Timiá nekasaiti, ashí shuar tunaan túruinia nuka nu tunaaja̱i̱ emetamuiti. Tuma asa takarniua núnisaṉ ajasuíti. 35Takarniusha ajapnamnia asa ajapnamniaiti. Tura Uchirí̱ṉkia ni Aparí̱ji̱a̱i̱ tuke pujawai. 36Tuma asamtai Uchirí̱ aṉkant awajtámsamtaiṉkia imiá nekas aṉkant pujustatrume. 37Átum Aprajám weaitrume nékajai. Túmaitiatrum winia chichamur ántachu asarum mantuataj tárume. 38Winia Apar iniaktursamun áujmatjai. Átumka atumí uuntri̱ timia túrarme.” 39Tutai nisha chicharainiak “Iikia Israer shuar asakrin ii úuntri̱ṉkia Aprajámaiti” tiármiayi. Tura Jesus chichaak “Nekas enentáimin Aprajám weaitkiurmeka niya núnis túrawaintrume. 40Nekas ana nuna Yus iniaktursamtai nuna ujakjarme tuma ai̱ṉ mantuataj tárume. Aprajámka nuní̱ túrachmiayi. 41Antsu atumí uuntri̱ túrana áintsarum túrarme” tutai nisha chicharainiak “Warí tsanirnumia̱ akiiniachuitji. Ii uuntri̱ Yúskete. Nisha ii Aparí̱nti” tiármiayi.

42Tura Jesus chichaak “Yus nekas atumí Aparí̱ntkiuiṉkia Winiasha anentíntrume Yusai̱ya̱ tau asamtai. Wisha winia enentáimmiarja̱i̱ ju̱i̱ táchaitjiai antsu Yus akuptúkuiti. 43¿Urukamtai Wi tájana nu imiá nékatsrum? Wi tájana nu nakitia asarum winia chichamur ántatsrume. 44Atumí aparí̱ṉkia iwianchi úuntri̱nti. Tura niniu asarum ni wakera nu túrarme. Yámankamtaiksha iwianchi úuntri̱ṉkia tuke maṉkartiniaiti. Nekas ana nunasha nakitiawai tuke wáitrin asa. Wáitraksha níniunak chichaawai. Iis, waitia uuntri̱ asa tuke wáitriniaiti. 45Tura Wikia nekas takui̱ átum enentáimturtsurme. 46¿Yaki chikichkí tunaaja̱i̱ súmamtikruamniait? Nuikia Wi nekasa nuna tau ai̱sha ¿urukamtai enentáimturtsuram? 47Yus shuarka Yus timian ántawai tura átum Yúsnachu asarum Wi tájana nu nakitiarme” tímiayi.

Aprajám akiintsa̱i̱ṉ Jesus pujumiayi

48Nuikia Israer shuar chicharainiak “Maa, ti nekas tátsujik ‘Ame Samarianmaya̱ áentsuitme. Tuke yajauch áiniawai nusha. Nu arantcha iwianchrukuitme amesha’ nekas taji” tiármiayi. 49Jesussha chichaak “Iwianchrukchaitjiai. Áyatik winia Aparun shiir enentáimtikiajai. Tura átumka yajauch chichartarme. 50Wikia ‘shiir enentáimturarti’ tátsujai túrasha Yuska ashí shuar Winia shiir enentáimturat tusa wakerawai. Nisha Yus asa ashí shuar túramun péṉkerashit tusa nekaattawai. 51Ti nekasaiti. Wi tájana nuna enentáimta nú shuarka peṉké jákashtiniaiti” tímiayi.

52Nuiṉkia Israer shuar chicharainiak “Pai, yamaikia ti paant íwianch takakme. Aprajámsha ashí Yúsnan etserniusha jákaruiti tura Ame ‘Wi tájana nuna enentáimtaka peṉké jákashtiniaiti’ tátsumek. 53¿Nuiṉkia ii uuntri̱ Aprajám naṉkaamaskaitiam. Nisha tura Yúsnan etserniusha jákacharuk ainia. Itiurak imiá naṉkamantu enentáimtumam?” tiármiayi. 54Tutai Jesus “Wiki shiir enentáimtumaknaka peṉké antraiti. Antsu Winia shiir enentáimturna nu winia Aparuiti. Nusha átumka ‘winia Yúsruiti’ tárumna nuiti. 55Nusha táyatrum Nin nékatsrume. Wikia Nin nékajai. ‘Nin nékatsjai’ tákunka atumji̱a̱i̱ métek wáitrin aintjiai. Tura Nin neka asan Ni tana nuna tuke túriniaitjiai. 56Aprajámka, atumí uuntri̱, imiá yaunchu jákaitiat Wi ju̱ nuṉkanam tátinian wararas nákasmiayi. Tura waitiak ti shiir warartusmiayi” tímiayi. 57Takui̱ Israer shuar Jesusan chicharainiak “Warí seṉkuintia uwiksha takaktsume túmaitiatmekek ¿Aprajám wáinkiaitiam?” tiármiayi. 58Tutai Jesussha chichaak “Ti nekasan tájarme, Aprajámka pujatsa̱i̱ṉ Wikia Wíkitjiai” tímiayi Jesus.

59Nuna takui̱ Jesusan tukutai tusar kayan achikiármiayi. Tura Jesus ú̱mak ni matsatmanum ajapéni̱ṉ wéak Yusa Uunt Je̱e̱ya̱ jiinkí̱ wémiayi.

Currently Selected:

Jṉ. 8: jiv

Highlight

Copy