Naṉ. 49

Jakup uchirí̱n péṉker pujutnum yúmiṉkiamu

1Kame Jakup ni uchirí̱n untsukar chicharainiak “Winí̱ weankátarum, túrunawakrumin ukunam túrunattana nuna ujaktájrum.

2Wi Jakupaitiatan Israer náartiniaitjiana ju̱na uchirtirmin untsúajrume winirum anturtuitiarum.

3Ruwinkiá, úchipia asan kákarmakeyaj nui̱ áminkia yajutmarmiajme.

Iwiá̱i̱ asam ámeka kakarmaitme núnisaṉ páantniuitme.

4Túrasha ámeka esetramsha enentáimcha asam

entsa tampaki̱ winiana núniniaitme.

Warí winia chíkich nua̱rja̱i̱ tsaniṉkia kanarmame.

Tuma asam Ruwinkiá, páantin áchattame.

5Semiunka Riwiji̱a̱i̱ mái̱ nuniniak áiniawai.

Aya mesetnak enentáimtin áiniawai.

6Warí shuaran kajerkarka mácharmakia.

Tura waakancha ántar kaṉkajnium awatiar kupirkacharmakia.

Maaj, tuma ásarmatai wikia ni chicharkartuiniamunka anturkacharaintjiai

tura iruntrancha pujuschaintjiai.

7Wárik kajen ásar yajauch pujutnum yumiṉkramu áiniawai.

Maaj, ti kajen áiniawai.

Tuma ásarmatai ni tiraṉki̱ ártatna núnaka

ashí Israer nuṉkanmaya̱ṉka tsakiṉmamtikiartatjai.

8Tura áminkia Jutá, ame yátsum shiir awajtámin ártatui.

Tura nemasrumsha núpeteakum sué̱nam achía nútiktiatme.

Tura ashí yatsumsha tikishmátramin ártatui.

9Ámeka Jutá, winia uchiru úunt ya̱wa̱chia núniniaitme.

Tuma asam namaṉ yuam aju̱a̱nta ininiaitme.

Túram úunt ya̱wa̱a núnismek nuṉká iniantam tepenaitme.

Inianta tepesakmincha ¿yaki itit awajtámin aintⁱ?

10Nekas nérentin táatsa̱i̱ṉ úunt akupniu akuptáiri̱ Jutaka atankichmin átatui.

Nunasha ashí aents umirin ártatui.

11Úunt akupin asa ni umpuruchiri̱n uwa araatai̱niam jiṉkiá wétatui

tura ni pushiri̱ncha uwa yumiri̱ winiu tutaiji̱a̱i̱ nijiá wétatui.

12Tura ni ji̱sha uwa yumiri̱ji̱a̱i̱ naṉkaamas kapanniuiti

tura nai̱ṉkia muntsuja̱i̱sha naṉkaamas pújuiti.

13Sapurúnka nayantsa yantamén pujustatui

tura uunt kanu anutai̱ya̱ nui̱ Setunnumaani̱ núṉke̱ṉka átatui.

14Isakárka umpuru kakaram áentskatniuri̱

tepenamunam ajapén tepá núnisaiti.

15Nuka péṉker pujú ajamai wainiak

tura ayampratin péṉkeraiti

tú enentáimias kijinniasha entsak

peṉkesha chichatsuk iniatairi̱ ajasmai.

16Tancha Israer weanmaya̱ṉ asa

ni shuari̱ncha tímiatrusaṉ sumamtikiattawai.

17Tura Tanka napi jintiá yantam tepes

kawái wéan nawe̱nam esaim

eketun ájapeana núnis átatui.

18Uunt Yusru uwemtikrurai tusan nákajme.

19Káatnaka untsurí suntar jatekártatui

túramaitiat nisha íksaṉ awakmak akupénak pataatukartatui.

20Úunt akupniu yurumtairi̱ji̱a̱i̱ métek

Asera yurumkari̱sha ti núkap tura péṉker átatui.

21Neptaríkia japa aṉkant wekáa núnisaiti.

Tura uchirí̱ncha shíirmachin petsawiti.

22Tura Juseka numi entsá yantamach wajas

tí nukap nereana núniniaiti

tuma asa ni kanawe̱sha tanishnium waka ti nerek punua ániuiti.

23Tíshimkiuja̱i̱ mánin ainia nunasha kajerainiak eketáiniawai

túrawar tuke itit awajainiawai.

24Antsu Jusesha ti kakarmaiti

tuma asa ni tíshimkiuri̱ncha kaki achíawai.

Maa, ti kakaram Yus Israer shuaran Wáinkiartin

tura Ayamkartin ana nuna ti yumiṉsajai.

25Ame apá Yusri̱ Uunt Yus ashí naṉkamantua nu

tura yáintmana nu ju̱ja̱i̱ shiir awajtámsati.

Nayaimpinmaya̱ núja̱i̱sha tura nayantsa initri̱n ana núja̱i̱sha

tura takusar tsakatmartinji̱a̱i̱sha shiir awajtámsarti.

26Winia apachur shiir awajtúsmaja̱i̱

naṉkaamas áminkia shiir awajjame.

Nú shiir awajeamuka naint tuke wajáa núnis átatui.

Tura ti nekas Juseka ni yachi̱ji̱a̱i̱ naṉkaamas uunt awajsamuiti.

27Piṉjiamínia kampunniunmaya̱ ya̱wá̱ kajen

káshik yukartua kí̱arai̱ṉkia ni ampirman chikichan achia̱r súana núniniaiti” Jakup tímiayi.

28Jú̱naka Israer ni uchirí̱n tuse armia nuna péṉker pujutnum yúmiṉkiak tímiayi. Kame chikichkimias aṉkant aṉkant túrunatniun yumiṉkramiayi. Nusha mash Israer shuar tuse wea ajasármiayi.

Jakup jakamu

29-30Chíkich tsawant ju̱ túratarum tusa Jakup uchirí̱n irur chicharainiak “Yamaikia wikia jatak ajasjai. Jakamtaisha wi shuar iwiarsamunmaṉ Kanaan nuṉkanam Makpiranam Mampri numi íṉkiuasmak wajamunam Aprajám yaunchu wa̱a̱n núṉke̱ntuk Jet aentsu Ijrunan kuitji̱a̱i̱ sumarkamia nui̱ iwiartustarum. 31Warí Aprajámnasha Sarancha Isaknasha tura Riwikiancha nui̱ṉ iwiarsarmiayi. Tura winia nua̱run Ríancha nui̱ṉ iwiarsamiajai. 32Nuṉkasha tura wa̱a̱sha Jet aentsun Aprajám kuitji̱a̱i̱ sumarkamia nuiti” tímiayi.

33Tura Jakup ni uchirí̱n akateasua umik tepes jakamiayi.

Currently Selected:

Naṉ. 49: jiv

Highlight

Copy