Naṉ. 48

Jakup Jusé uchirí̱n péṉker pujutnum yúmiṉkiamu

1Nuyá̱ árusaṉ Jusen ujainiak “Ame apa jaawai” tiármiayi. Tutai Jusé iyuttsa wéak ni uchirí̱n Manasésan tura Eprainian aya̱kiar werimiayi. 2Nuyá̱ Jakupka ame uchiram Jusé iirmastaj tusa tayi tutai katsuntas nantaki̱ ekemsamiayi. 3Tura Jusé támatai chicharuk “Ashí Tujintkiachu Yus Kanaannum Rus péprunam pujumiaj nui̱ wantintiurkamiayi. Tura shiir pujutnum yumiṉkrak 4chichartak ‘Ame shuarumnia̱ka tí nukap awajsartatjai. Tura ti untsurí nuṉkanam mátsatka awajsartatjai. Tura ame tiraṉminkia jú̱ nuṉkanam tuke matsamsarat tusan súsartatjai’ turutmiayi. 5Tura wi táatsa̱i̱ṉ ju̱i̱ Ejiptunam ame uchiram Eprain tura Manasés akiiniawarua nuka yamaikia winia nekas uchir Ruwin tura Semiun ainia núnis ártatui. 6Tura chíkich uchi yajutmartatmena nuka áminiu ártatui. Nisha Eprainian tura Manasésan yachi̱ ásarmatai níniunmaya̱n achikiártatui. 7Warí ame nuku Rakirka Patanarámnumia̱ winisar Kanaan nuṉkanam Épratanam nuntumas jakamiayi. Túrunamtai Éprata jintiá ayamach ikiusmiajai. Éprataka Piriṉkiaiti” tímiayi.

8Nuna tuasua umik uchin wáinkiar Jusen aníak “Ju̱sha ¿ya ainia?” tímiayi. 9Tutai Jusé aparí̱n chicharuk “Ju̱i̱ Ejiptunam pujái̱ Yus surusárma winia uchir áiniawai” tutai Israer chichaak “Waitneasam itiantarta, shiir pujutnum yumiṉkrartaj” tímiayi.

10Kame Israer tí uuntach asa péṉker wáinmachmiayi. Tuma asamtai Jusé ni uchirí̱n aparí̱i̱n itiantarmiayi. Tura Israerka nincha miniakak mukunáwarmiayi. 11Tura Jusen chicharuk “¡Maa, wáinkiashtiniapitjia tiniuyajme túrasha tímiatmam uchiram wáinkiartinniaka Yus tsaṉkatrukai!” tímiayi.

12Nuya̱ṉka Jusé uchirí̱ṉkia ni apachrí̱i̱n wajarmiayi. Túmainian Jusé ni uchirí̱n nátupasaṉ ni aparí̱n nuṉká piniakum tepersamiayi. 13Tura Eprainnaka untsuuri̱ji̱a̱i̱ achik tura Manasésnaka menaari̱ji̱a̱i̱ achik ni aparí̱n tarunmiayi. Nuna túramtai Eprainkia Israera menaarí̱ni̱ wajasmiayi tura Manaséska untsuurí̱ni̱ wajasmiayi. 14Tura Israer shiir pujutnum yumiṉkrataj tusa ni kunturi̱n mai̱ takuimiayi. Tura nékayat uwejé̱n awanteak yápaji̱asaṉ Eprainnaka untsuuri̱n muuknum awanteak Manasésnaka iwia̱i̱ri̱ áunak menaari̱n awantsamiayi. 15Tura Jusen péṉker pujutnum yúmiṉkiak “Winia úuntur Aprajámsha tura apar Isaksha Yusan umirkarmia nú Yuska wi akiiniamiajna nuyá̱ shiir waitniua nu 16tura ashí yajauchinmaya̱ uwemtikrurmia nu jú̱ uchin péṉker pujutnum yumiṉkrarti. Nuja̱i̱ winia náarnasha tura winia uuntru Aprajáman tura aparu Isaka náari̱ncha shiir enentáimtiarti tura jú̱ uchisha tí nukap pampaṉkarti tura ti untsurí aents ajasárti” tímiayi.

17Túrasha Jusé íismaka ni aparí̱ untsuuri̱ uwejé̱n Eprainian muuknum awantkamia nuka yajauchiyayi. Túramtai aparí̱ uwejé̱n Eprainia muuke̱ya̱ jusa Manasésa muuke̱n awantkataj tusa takurmiayi. 18Túram chicharuk “Atsá apawá, antsu ju̱i̱ti iwia̱i̱ri̱ṉkia. Ame untsuurum uwejém ju̱na muuke̱n awantkata” tímiayi. 19Túrasha aparí̱ nuna nakitiak “Ee, auka nékajai uchiru. Kame Manaséssha ukunam ti pampaṉtiniaiti. Antsu ni yachi̱ Epraincha úchitiat yachi̱ji̱a̱i̱ naṉkaamas ajastatui tura ni aentssha untsurí matsatkamu ajasártatui” tímiayi.

20Tura nú tsawantai̱k Israer nú tiraṉki̱n péṉker pujutnum yumiṉkiainiak “Israer shuarka atumí náari̱n pachisar jú̱nis tiniu ártatui. Yus Eprainian Manasésja̱i̱ shiir awajsarmia núnis ámin shiir awajtámsati” tímiayi. Nuna tinia Manasésnaka anaitsuk antsu Eprainian páantin awajsámiayi. 21Nuya̱ṉka uchirí̱n Jusen chicharuk “Wisha jakattajai. Túrunamtaisha Yus atumji̱a̱i̱ pujá asa atumí uuntri̱ nuṉke̱n awaṉtamkittiarme. 22Winia puya̱ruja̱i̱ tura tíshimkiurja̱i̱ Amur aentsja̱i̱ mánaikian atantkimiaj nuna amaajai. Nuja̱i̱ yatsumja̱i̱ṉkia ámin imiá nukap súajme” tímiayi.

Currently Selected:

Naṉ. 48: jiv

Highlight

Copy