Naṉ. 40

Jimiará mesekran Jusé paant awajsamu

1Nu túrunamtai Ejiptunmaya̱ úunt akupniun wíniun suuya nu núnisaṉ páṉkan najatniusha úuntan yajauch enentáimtikiarmiayi. 2Túram akupin Parauṉ nú jimiará yaintri̱n wíniun suun úuntri̱ncha tura páṉkan najanniu úuntri̱ncha kajerak 3Parauṉka wainniuri̱ suntara uuntri̱ je̱e̱n sepunam pujumia nui̱ eṉkeawarmiayi. Nú sepunmasha Jusé pujumiayi. 4Tura suntara uuntri̱ Jusen ame jú̱ jimiará aents wáinkiarta tusa ikiukmiayi. Tura nui̱ núkap tsawant eṉkeamu pujusármiayi. 5Nuyá̱ Ejiptunmaya̱ úunt akupniuri̱n wíniun suuya nusha tura páṉkan najatniuya nusha sepunam pujusár nu kashi mai̱ mesekramprarmiayi. Tura mesekranmasha aṉkant aṉkant nusháa nusháa túrunatniun wainiarmiayi.

6Tura kashin káshik Jusé iyutaj tusa wéaj tukamá wake mesekar pujuinian wainiak chicharainiak 7“¿Urukamtai yamaikia imiá kúntutssha tsawa̱a̱ruram?” tiármiayi. 8Tutai “Wariṉ tuusha mesekramprajⁱ nuna yaki ujatmáktajⁱ tusar kúntuts pujaji” tiármiayi. Tuíniakui Jusé aya̱k “Kame nuna nekaatniuka Yúschakait. Wats ujatkatarum” tímiayi. 9Tutai wíniun sukartinia uuntri̱ mesekrampramuri̱n Jusen ujaak “Múnchiya ániun wáiniaj. 10Tura menaintiú kaṉkapnumia̱ je̱e̱kar kuku̱jrukar úwan nerekar tsamainian wáiniaj. 11Túrunamtai wikia Parauṉka umutairi̱n takakaj tura úwan akakan umutainiam ijiureaj. Túran úuntrun súaj” tímiayi. 12Nu tutai Jusé aya̱k “Ame mesekranam menaintiú kaṉkap wáinmena nuka menaintiú tsawantaiti. 13Menaintiú tsawantai̱ Parauṉ ji̱i̱rmaki̱ yaunchu Parauṉ winiu súuyam nui̱ṉ ataksha apujtamsattame. 14Túrunam jiinkimkia winiasha nekas waitneasam Parauṉkai̱ pachitkiata wisha jiinkitiaj. 15Wíniaka Israer shuarnumia̱ jurukiaruiti. Tura warinkesha yajauch túrachu asan ju̱ sepunam pujuschamniaitjiai” tímiayi.

16Nuyá̱ páṉkan najanniu úuntri̱sha ti shiir ujakui nekáa Jusen chicharuk “Wikia menaintiú chaṉkiniach puju eṉketai̱ winia muukrui̱ eketáinian wáiniaj. 17Tura chaṉkin náṉkatkamunam untsurí tí peṉker yumin paṉ Parauṉna najatkamu eṉketáinia. Tura winia muukrui̱ chaṉkin eketáiniamunmaya̱nak chiṉki yuínian karamaj” tímiayi. 18Takui̱ Jusé aya̱k “Menaintiú chaṉkinkia menaintiú tsawantaiti. 19Menaintiú tsawant jeamtai Parauṉ ataksha ámin sepunmaya̱ ji̱i̱rmakin yakí̱ numiniam nenatma mantamattawai. Túrutmamtai ame aya̱shmin chuaṉ yúartatui” tímiayi.

20Wats menaintiú tsawantin Parauṉsha ni akiiniamuri̱ tsawantri̱ enentáimtak uunt namperan ashí ni takarniúri̱n armia nuna najatamiayi. Nui̱ ipiaamusha ántuiniamunam Parauṉ chichaak “Wíniun sukartinia uuntri̱ tura páṉkan najanniu úuntri̱sha utitiarum” tímiayi. 21Wíniun sukartinia úuntri̱nkia ataksha nu takatnak susamiayi. Túram Parauṉkan yaunchu wíniun suuya núnisaṉ súmiayi. 22Túrasha páṉkan najanniu úuntri̱nkia Jusé timia tímiatrusaṉ sué̱nam jiṉkiá nená mámiayi. 23Kame wíniun sukartinia úuntri̱ṉkia ti shiir pujayat Jusenka enentáimtutsuk peṉké kajinmatkimiayi.

Currently Selected:

Naṉ. 40: jiv

Highlight

Copy