Jiin. 26

Yus Shiir Awajtai̱ Je̱a̱ je̱a̱mtin iwiartamu

1Yus Shiir Awajtai̱ Je̱a̱ je̱a̱mtin tias tarach ríniuja̱i̱ kutampra nájankum wiṉkia, kapantaku, ti kapa̱a̱ku ainia nuja̱i̱ eteṉkrata. Túram émamkesam najanam Yusa suntari̱ úuntri̱sha#26:1 Nuka kiruwín tawai ímiatrusaṉ nakumnak jiinkittiawai. 2Nú ejatai̱ tarach najankattam nuna esantí̱ṉkia paintiúchu kuntu tura waṉkantí̱ṉkia kuatru kuntu jeá métekrak ártatui. 3Seṉku tarach apa̱yá̱rarta túram chíkich seṉku tarach ainia nusha apa̱yá̱rarta. 4Tura emka apa̱yá̱rma íkiaktinnium riniu kiṉkiaja̱i̱ yaraṉmaram seṉkuintia tenté najatkam neturta. Tura chíkich apa̱yá̱rma nui̱sha nútiksamek neturta. 5Emka tarach apa̱yá̱rma ainia nui̱ seṉkuintia tenté najatkam neturta. Tura chikichniumsha nútiksamek métek iṉkiumtikiamnia neturta. 6Núnismek seṉkuintia tséṉken aya kúrik najatkata túram tarach awaṉturam apa̱yá̱m Yus Shiir Awajtai̱ Je̱a̱ je̱a̱mta.

7Nu túram nukuktintri̱ṉkia chipiu ure̱ja̱i̱ aunse tarach najatkarta. 8Tura nukuktintri̱ esantí̱ṉkia traintia kuntu jeá átatui tura tarachi̱ waṉkantí̱ṉkia kuatru kuntu jeá átatui tura aunse tarachia nusha nú nekapkak ártatui. 9Seṉku tarach apa̱yá̱m chikichik awajsam tura sais tarachia nusha apa̱yá̱m chikichik awajsata. Nuyá̱ saisa nuka ipijkiam Yus Shiir Awajtai̱ Je̱a̱ nákari̱n nenaata. 10Nu túram tarach emka apa̱yá̱rma yantamén seṉkuintia tenté wa̱a̱ najatkam neturta. Núnisaṉ chíkich tarach apa̱yá̱rma nui̱sha yantamén seṉkuintia tenté najatkam neturta. 11Núnismek yaṉkú jiruja̱i̱ seṉkuintia tseṉkeniarma najatkata túram tenté wa̱a̱ najatkamunam awaṉkearam iṉkiumtikiam chikichik awajsata. 12Nuyá̱ tarach waku juákainia nuka ipijkiam Yus Shiir Awajtai̱ Je̱a̱ tuntupéni̱ nukukta. 13Tura Yus Shiir Awajtai̱ Je̱a̱ nukukmári̱ esantí̱ni̱ mai̱ yantamén péṉker nukuaku juákat tusar chikichik kuntu tura chíkich yantaméncha chikichik kuntu waku juákartiniaiti. 14Núnisaṉ nu je̱a̱ ataksháa nukuktintri̱ṉkia murikiu nuape̱ yamákáiji̱a̱i̱ eṉkeram najanata. Tura nuya̱shá nukuktintri̱sha péṉker nuap ainia nuja̱i̱ nukukta.

15Yus Shiir Awajtai̱ Je̱a̱ tanishmakum akasia numi nakaram awaj tanishmarta. 16Tura numi nakarma esantí̱ṉkia tias kuntu nekapmamu tura waṉkantí̱sha chikichkí kuntu nuyá̱ íniaṉkasaṉ ajapén ártiniaiti. 17Yus Shiir Awajtai̱ Je̱a̱ tanishmartin numi nakarma ainia nuka íkiaktintri̱n chikichik numi nakakma nayamuri̱ jímiar najatata. Núnismek ashí numi nayawarta.

18-25 Numi nuparam painti nakararta túram kuaraintia aepruktintri̱ kuít jiruja̱i̱ najankata. Numí núparam Yusa Je̱e̱ nuṉkaani̱ yantam ana nui̱ tura chíkichkia arakaani̱ yantam ana nui̱ náṉkatramunam sais numi nuparam nakarma tsukintri̱nkia jímiarja̱i̱ najanata. Numi nuparam nakarma aṉkant aṉkant tépakmari̱ jímiara nuka kuít jiruja̱i̱ najanamu átatui.

26-28 Ukuamuri̱ṉkia aṉkant aṉkant yantamén winiaṉke seṉku numi nakarma iṉkiumtikramu ártatui.

29Tanishsha tura pératniuri̱sha esarmasha sútarchisha mash kurimkiarta. Núnismek awaṉtukar achimtikratniuri̱sha kúrik najankata. 30Nuyá̱ Yus Shiir Awajtai̱ Je̱a̱ je̱a̱mkum nainnium iniaktusmajmena nuja̱i̱ métek je̱a̱mtia.

31Yamaikia tarach ejaatin ríniuja̱i̱ kutampra nájankum wiṉkia tura kapantaku nuyá̱ ti kapa̱a̱kuja̱i̱ kutampram eteṉkrata. Túram émamkesam nájaneam Yusa suntari̱ úuntri̱sha tímiatrusaṉ nakumnak jiinkittiawai. 32Tura akasia numi kurimpramuja̱i̱ ajapén tesakur, jirú kuitji̱a̱i̱ aku̱jtukar kuatru pauri̱n aya kúriji̱a̱i̱ṉ tsauka najatkar neturma ainia nui̱ achimtikram nu tarach ejaata. 33Nuyá̱ tsauka nenarma ainia nui̱ awaṉturam nu tarach ejaata. Tura nu tarach ejaamu initiaani̱ Yus Aentsja̱i̱ Chícham Najanamu Eṉkeamua nu nui̱ apujsata. Kame tesar tarach ejaamua nuka nékatkaka Shiir Tesamu tutai tura initiaani̱ṉkia Imiá Shiir Tesamu tutainti. 34Imiá Shiir Tesamu tutainiam Yus Aentsja̱i̱ Chícham Najanamu Eṉketai̱ apujsamua nu Akikmatrukmatai Tsaṉkurnatai̱ji̱a̱i̱ etektukta.

35Tura páṉ awa̱tai̱ṉkia tarach ejaamua nui̱ áwiini̱ arakaani̱ apujsata. Tura shirikip ekemátai̱ṉkia Yusa paṉkri̱ awa̱tai̱ pujana nuja̱i̱ íṉkiuasmak nuṉkaani̱ apujsata. 36Nu je̱a̱ wáitiri̱ṉkia tarach ríniuja̱i̱ nájankum wiṉkia kapantaku tura ti kapa̱a̱kuja̱i̱ kutampra eteṉkram náimpram najanata. 37Tura tarach nenatniuri̱ṉkia kúriji̱a̱i̱ṉ najatkata seṉku pau akasia numi kurimpramuja̱i̱ nájankum awajátniuri̱ṉkia yaṉkú jiruja̱i̱ seṉku najanata.

Currently Selected:

Jiin. 26: jiv

Highlight

Copy