Jiin. 18

Jitru Muisaisan chicharma

1-6 Jítruka Muisaisa we̱a̱rí̱yayi. Kame nisha Muisais ashí túrachminian Uunt Yus yaiṉmia nuna anturak iyutaj tusa wakerimiayi. Nui̱ wéak Sépuran Muisaisa nua̱ri̱n tura uchirí̱ncha yarurkamiayi. Muisaiska chíkich nuṉkanam wekasan yajutmarchajak tusa ni iwia̱i̱ri̱ uchin Jirsun anaikiamiayi. Tura chíkich uchirí̱ winia Uuntru Yusri̱ Parauṉkai̱ya̱ uwemtikruruiti tusa Iriasár anaikiamiayi. Kame Israer shuar Seúnnum ayamach atsú nuṉkanam matsamkar pujuarmia nui̱ iyutaj tusa wéarmiayi.

7-11 Tura Muisaissha we̱a̱rí̱n iṉkiuṉtaj tusa werimiayi tura Uunt Yus iniaktusam Israer shuaran Ejiptunmaya̱ aentsun akupkarmia nunasha ashí ujakmiayi. Tura Jitru waras chichaak “Uunt Yusa naari̱ shiir atí. Warí aṉkant awajtámsachaik. Yamaikia nékajai ashí najankamu yus ainia núja̱i̱sha naṉkaamas Uunt Yuska tí uuntaiti” tímiayi. 12Nuya̱ṉka Muisaisa we̱a̱rí̱ Jítrusha Yusan takamtsuk súak áestuatniuncha súsarmiayi. Tura Arauncha ashí Israer shuara úuntri̱sha núnisaṉ Muisaissha ni we̱a̱rí̱ji̱a̱i̱ Yus íimmianum yurumáwarmiayi. 13Nu naṉkaamasmatai kashin Muisaiska péṉkera nu tura yajauchia nusha nekaatniun Israer shuaran jintintiátaj tusa pujusmiayi. Tura ashí aentssha káshik pujusmak kintiamprarmiayi. 14Nuyá̱ Israer shuaran Muisais túrimia nuna Jitru iis ni awe̱n chicharuk “Ju̱ aents áitkiamna ausha ¿urukamtai áitkiainiam? ¿Urukamtai amek jintíakmin ashí aents káshik pujusmak pujá pujakua kintiamainia?” tímiayi. 15Tura Muisais ni we̱a̱rí̱n chicharuk “Warí ashí aents Yusan inintrústaj tusar winí̱ kaunainiawai. 16Kame náṉkamas chicham ákuisha winia tarutainiawai. Túramtai wi jú̱nancha tura chikichnancha iwiartuiniajai núnisnak Yus akupkámuncha nékamtikiawaran jintintiáiniajai” tímiayi.

17Jitru Muisaisan chicharuk “Au áitkiamna nuka péṉkerchaiti. 18Amesha yawe̱tkiartatme tura aents ámiji̱a̱i̱ pujuinia nusha yawe̱tramkiartatui. Warí ju̱ takatka tí uunt asamtai amekka túrachminiaitme. Núnismek ju̱ takatcha amek túratin peṉké jeashtatme. 19Wátsek yamaikia winia chichamur anturtukta túrakminkia Yussha ámiji̱a̱i̱ pujuttawai. Ámeka aentsu chichame̱ Yusai̱ jú wetá túram aents tuíniana nu Yus ujakta. 20Nuya̱ṉka akupkámu umiktin chichamsha tura Yus jintíarma ainia nusha jintintiáwarta. Ántsamek itiur péṉker pujusártiniait núnisaṉ warinia túrawartiniait nusha ujakárta. 21Túrasha aents péṉker iisaram aents péṉker enentáimkia Yusan ashamin núnisaṉ nétsechu antsu kasamak kuítrintin ajastinian enentáimcha júuram chikichik mírnum chíkichkia siánnum tura chíkichkia seṉkuintianmasha núnismek chíkichkia tiásnumash uuntri̱ anairaram apujsarta. 22Tura chícham yúpichu iwiaramnia áinianka uuntri̱ anairarma tuke tsawant chichamnaka iwiartiarti. Antsu chícham itiurchataitkiuiṉkia aminí̱ taartí. Nu túrakmeka chikitcha ámin yáintmainia ásarmatai amesha ayamprattame. 23Kame Yus núnis túramkuiṉkia tura amesha nu túrakmeka antsu nuikia amesha yawe̱rchattame. Núnisaraṉ aentssha ni je̱e̱nkia aṉkant waketiartatui” tímiayi. 24Nuya̱ṉka ni we̱a̱rí̱ timia nuna mash antuk Muisaiska tímiatrusaṉ ashí umikmiayi. 25Tura ashí Israernumia̱n shuar péṉker enentáimkian juur chikichnaka mírnum chikichnaka siánnum tura chikichnaka seṉkuintianmasha núnisaṉ chíkichkia tiásnumash uuntri̱ anair apujsarmiayi. 26Túram chícham yúpichuch iwiaramnia áinianka uuntri̱ anairarma tuke tsawant iwiariarmiayi. Antsu chícham itiurchataitkiuiṉkia Muisaisai̱ taa wéarmiayi. 27Nuna tura Muisaiska ni we̱a̱rí̱n áujeakui Jitru ni nuṉke̱e̱n waketkimiayi.

Currently Selected:

Jiin. 18: jiv

Highlight

Copy