2 Tim. 2

Kakaram ajasta

1Amesha, uchiru, Jesukrístuja̱i̱ tsaniṉkiu asam Yus amasma nuja̱i̱ kakaram ajasta. 2Untsurí ántuiniamunam wi etserkamaj nu, shuar umikmin ainia nuna jintintiáwaram chikichnasha jintintiáwarat tusam akupkarta.

3Ame tí peṉker Jesukrístu suntari̱ asam wáitsatin katsuntrata. 4Suntarka ni uuntri̱ tana nunak umiktin asa chíkich takatan pachintiukchatniuiti. 5Núnisaṉ nakurincha nakurústinia nuja̱i̱ métek nakurachkuṉka nekas péṉkeran awakmakun súsatniua nuna achikchamniaiti. 6Ataksha núnisaṉ shuar ajan takaana nu, ashí shuara naṉkaamas nuya̱n yúashtinkiait. 7Wats, ju̱ menaintiú métektaku chicham áiniawai. Péṉker enentáimtakmin ii Uuntri̱ Kristu paant awajtúrmastatui.

8Jesukrístu jaka nantakmia nu enentáimprata. Tura Uunt akupin Tawit ni we̱a̱tri̱ asamtai Jesussha úunt akupin átiniaiti. Núiti wi uwempratin chichaman étsereaj nu. 9Nuna étsereakun sepunam jiruja̱i̱ jiṉkiamu pujakun wáitiajai. Túrasha Yus Chicham jiṉkiachminiaiti. 10Ashí shuar ni shuari̱ ártí tusa Yus achikiárua nuna yáiṉtajtsan ashí itiurchatan katsunteajai. Nuja̱i̱ Jesukrístuja̱i̱ tsaniṉkiaru ásar uwemprar tuke shiir pujusártatui Yusja̱i̱.

11Ju̱ imiá nekasaiti,

Jesukrístuja̱i̱ jákaitkiurkia Níji̱a̱i̱sha tuke iwiaaku pujustatji.

12Wáitiakrisha Niji̱a̱i̱ akupkáttaji.

Natsantakrinkia Nisha natsantramprattaji.

13Umichuitkiurnisha Niṉkia tuke uminiaiti.

Warí, Yuska ni enentáimmiaja̱i̱ṉ yapajniátsuk tuke umiktiniaiti.

Yusai̱ natsa̱a̱ra̱i̱j tusam ashí túrata

14Shuar jintintiakum ju̱ enentáimtikrata. Ii Uuntri̱ Yus íimmianum chichamja̱i̱ yajauch tunaiyara̱i̱ṉ tusam chicharkarta. Nu tunaitin peṉké antraiti antsu ántuiniana nuna yajauch awajénawai. 15Yus Chicham tuke ásump enentáimji̱a̱i̱ péṉker unuimiátram naka jintintiáwarta. Túrakum Yus péṉker íirsat tusam péṉker takarin atá. Túramka Yusai̱ natsa̱a̱rchattame. 16Jú̱ nuṉkanmaya̱nak ántar áujmatin ainia nuja̱i̱ kanaktia. Shuar nuna áujmatainiak tunaanum nuna naṉkaamas wá̱i̱niawai. 17Ni jintiniamusha suṉkurja̱i̱ métek pampaawai. Iminíusha tura Piritiusha nu shuar áiniawai. 18Nisha nekas chichaman iniaisar tura ashí Yus shuar nantaktincha naṉkaamasai tuíniakui chíkich chíkich shuar Yusan naka enentáimtuiniatsui yamaikia. 19Túrasha Yus ashí naṉkaamas enentáimtustinia nuna paant awajsaiti. Jú̱nisaiti “Uunt Yus ni shuari̱n nékainiawai” tura nuyá̱ “Ashí Kristu shuari̱ ainia nu tunaanumia̱ kanakiarti.”

20Kuítrinniu je̱e̱n kuriji̱a̱i̱ najanamusha kuitji̱a̱i̱ najanamusha írunui. Núja̱i̱ṉkia ti shiira nu takastin áiniawai. Tura numiji̱a̱i̱ najanamusha nuweja̱i̱ najanamusha írunui. Antsu núja̱i̱ṉkia nekasmiancha ainia nu takastin áiniawai. 21Núniskete Yusa takatrí̱ji̱a̱i̱. Ashí tunaanumia̱ kanakir péṉker wekasar shiira nu takasmin átatji. Kame ashí péṉkera nu takasmin asakrin ii Uuntri̱ Jesukrístu wakerak péṉker takata nui̱ apujtamsamniaitji.

22Natsá wakerutai̱nmaya̱ pisaram esetram péṉker wekasata. Amesha ashí shuar shiir enentáiji̱a̱i̱ Yusan áujena nuja̱i̱ Yus nekas enentáimtakum aneniakum ti shiir pujusta. 23Enentáimtsuk chichainiak aya ántar tunaitinian chichainia nu pachisairap. Nusha aya némasmanainiawai. 24Ii uuntri̱ Jesukrístu takarniuka chíkich shuarja̱i̱ nemasmanaikiashtiniaiti antsu ashí shuarja̱i̱ péṉker nawamnaikiatniuiti. Tura waitnentáimturar péṉker jintintiátniuiti. 25Tura umircha shuarnasha Yus ni enentái̱n yapajtiakui nekas chichaman shiir enentáimturarat tusa péṉker enentáiji̱a̱i̱ jintintiátniuiti. 26Nuja̱i̱ íwianch ni wakeramu túrawarat tusa achikmaitiataṉ uwemprartatui.

Currently Selected:

2 Tim. 2: jiv

Highlight

Copy