1 Tim. 4

Amuukatin tsawantin

1Yusa Wakaní̱ ti paant tawai amuukatin tsawant jeakui untsurí aents Yus enentáimtustinian iniaisar antsu yajauch wakaní̱n nemarsar íwianch jintíamun anturkartatui. 2Yajauch aentsun anturkartatui. Nu aents ni enentái̱ narúa áinin ásar ni tunáa túramun peṉké enentáimtichu áiniawai. Tuma asa shiir chichainiayataṉ wáitrin áiniawai. 3Nu aents nuatnaikiatniun suritiainiawai. Núnisaṉ chíkich chíkich yurumak yúatniuncha suritiainiawai. Warí, Yus ashí yurumkan najana asamtai Yus shuar nekas chichaman nékainia ásar Yusan yumiṉsar páchitsuk yuámin áiniawai. 4Ashí Yus najanamu péṉker asamtai nakittsuk antsu Yusan yumiṉsar yúatniuiti. 5Yus Chicham tana núja̱i̱sha tura yuíniak Yusan yumiṉkias áujsamuja̱i̱ ashí péṉker ajasuíti.

Jesukrístu péṉker takarin

6Wi tájamna nu chíkich Yus shuar jintintiakmeka Jesukrístu péṉker takarin átatme. Tura ashí Yus Chicham péṉker jintíamu unuimiáru asam nuja̱i̱ kakaram ajastatme. 7Ántar chichamsha tura netse chichamsha enentáimtutsuk nekas Yusna ana nu túratin kakaram ajasta. 8Kame aya̱sh kakaram awajsatniusha ishichik péṉkeraiti. Antsu Yusna nu túratin kakaram ajastinkia imiá péṉkeraiti. Yamái ju̱ nuṉkanmasha yáintmaji tura ukunmasha Yusja̱i̱ pujustin asakrin naṉkaamas péṉkeraiti. 9Nu imiá nekas asamtai ashí shuar nuna enentáimtustiniaiti. 10Nekas iwiaaku Yus ashí shuaran uwemtikramniaiti tura ashí Nin enentáimtuinia nú shuaran nekas uwemtikratniuiti. Nu chicham imiá nekasaiti tu enentáimtakur katsekramainiakrincha kakaram takaaji.

11Nuka ashí ame jintíakum akupkátniuitme. 12Ti úuntchaitkiumnisha nakitrámprara̱i̱ṉ. Antsu péṉker túrakum Yus shuar unuiniarta. Chichammiji̱a̱i̱sha, túramurmiji̱a̱i̱sha, aneṉkratmarmiji̱a̱i̱sha nekas Yus enentáimtamuja̱i̱sha tura esetra enentáimsam Yusna péṉker túramuja̱i̱sha nisha túrawarat tusam iniaktusarta. 13Wi jeatsa̱i̱ṉ Yus Chicham áujeakum shuar jintintiata. Túram Yus shuar ikiaká̱rarta. 14Yus shuara uuntri̱ Yúsnan takastin anaitiamak uwejé̱n awantramsarmai. Nuna turamainiak “Ju̱ shuar kakarman Yusai̱ya̱n takustatui” turamarmia nu, kakaram ajasam tímiatrusam túrata.

15Tuke enentáimji̱a̱i̱ wi tájamna nu enentáimtakmin ame péṉker túruki̱ wéamun ashí nekaawarti. 16Túramna nusha tura unuiniamna nusha péṉker wáinmamkata. Nu túratin pimpikip. Nu túrakmeka uwemprattame amesha tura ujainiam nusha uwemtikrattame.

Currently Selected:

1 Tim. 4: jiv

Highlight

Copy