1 Tim. 3
3
Yus shuara uuntri̱
1Shuar Yus shuaran wáinkiatniun wakerakka péṉker takatan achikiuiti. Nuka nekasaiti. 2Tura Yus shuara uuntri̱ ajastinian wakerakka chíkich shuar nin yajauch áujmattsachmin átiniaiti. Nuwá̱ apatka áchatniuiti. Nisha péṉker esetar enentáimin naka wekasatniuiti. Iraran ni je̱e̱n ti shiir itiaatniuiti. Péṉker jintinkratin átiniaiti. 3Nampechusha tura suir enentáimtichusha átiniaiti. Aya kuítian ikiauṉkatniun enentáimtuschatniuiti. Antsu tsaṉka átiniaiti. Kajechusha átiniaiti. Chikichnancha wakerutkashtiniaiti. 4Ní shuari̱n shiir akupeakui ni uchirí̱sha umin tura shiir awajkartin ártiniaiti. 5Kame ni shuari̱n akupkachminiaitkiuṉka ¿itiurak Yus shuaran wainkiat? 6Yus shuara úuntri̱ṉkia yama Yus shuar ajasu áchatniuiti. Túmaitkiuṉka ti naṉkamantu enentáimtumak iwianchji̱a̱i̱ métek tunaan túrak sumamattawai. 7Yus shuarchasha shiir enentáimtutai̱ átiniaiti. Núnischaitkiuiṉkia nin yajauch chicharainiakui íwianch wárik tunaanum aju̱a̱rtatui.
Yus shuaran yain
8Núnisaṉ Yus shuaran yaincha péṉker ásar ashí shuar shiir enentáimtutai̱ ártiniaiti. Ni tana nuna tímiatrusaṉ umin, nampechu, aya kuítniak ikiauṉkatniun enentáimtichu ártiniaiti. 9Yúsnan tí peṉker nekaatniuiti. Tura esetar enentáimsatniuiti. 10Emka péṉker íistiniaiti nuyá̱ péṉker wekaakka Yus shuaran yain átiniaiti. 11Nuwa̱sha péṉker ásar ashí shuarsha shiir enentáimtutai̱ ártiniaiti. Tsanumniuchu antsu esetar enentáimiar ashí ni túratin ainia nuna ímiatrusaṉ umin ártiniaiti. 12Yus shuaran yainkia nuwa̱n apatkachu tura ni uchirí̱ncha ní shuari̱ncha ashí shiir umimtikin ártiniaiti. 13Yus shuaran yaya̱k nekas péṉker takaaka shiir enentáimtusmin asa páchitsuk Kristu Jesus enentáimtamun arantsuk etserkamniaiti.
Yusna nu imiá peṉkeraiti
14-15Wárik íitniun wakerajme. Túmaitiatnak sétaknasha Yus shuarja̱i̱ takastin nekaak tusan ju̱na áatjame. Ashí Yus shuar, iwiaaku Yusna ainia nu, nekas chichaman tuke emetawar akasmatainiawai. 16Maa, imiá nekasaiti, Yus iwiaintiurmakma ashí naṉkaamas tí enentáimtustiniaiti. Tura ju̱i̱ti,
Yuska aents ajas aya̱shtiuk jú̱ nuṉkanam paant wantinkiamiayi.
Yus Wakancha “tuke peṉké mátrachuiti” Niin etserkamuiti.
Yusa suntarí̱sha Nin wáinkiarmiayi.
Ashí nuṉkanam nu etsernakmiayi.
Túramtai ashí nuṉkanmaya̱ aents nekas enentáiji̱a̱i̱ enentáimtusaruiti.
Tura nayaimpiniam iwiaintiurkamuyayi.
Currently Selected:
1 Tim. 3: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.
