1 Jṉ. 4

Yusa Wakaní̱ tura yajauch wakan

1Aneamu yatsuru, untsurí shuar wáitruiniak “wi Yúsnan etserniuitjiai” tuíniawai. Tuma asamtai ashí shuar “wi Yusa Wakaní̱n takakun chichaajai” tuinia nu péṉker nekaptsuk enentáimtusairap. Antsu íisrum nekas Yusa Wakanímpiashit tura chíkich wakaniashit nu nekaatarum. 2Ju̱ja̱i̱ nekapsarum ya nekas Yusa Wakaní̱n takaka nu nekaattarme, shuar “Jesus Yusa Uchirí̱ Krístuitiat nekas aents ajas aya̱shimkiamiayi” tana nu Yusa Wakaní̱n nekas takakui. 3Tura Jesusan tu enentáimtatsna nuka Yusa Wakaní̱n takaktsui antsu Kristu nemasrí̱ wakaní̱n takakui. Kame Kristu nemasri̱ wakan tátin tama ántichukaitrum. Nu wakan yamaikia ju̱ nuṉkanam táwiti.

4Uchiru, átumka Yusna asarum Yus atumí enentái̱n pujawai. Tura ju̱ nuṉkanmaya̱ shuara enentái̱n íwianch pujawai. Atumíin pujana nuka niji̱a̱i̱ naṉkaamas kakaram asamtai wáitrin ainia nu nupetkaitrume. 5Nisha ju̱ nuṉkanmaya̱ ásar aya ju̱ nuṉkanmaya̱n áujmatainiawai. Túmainiakui ju̱ nuṉkanmaya̱ shuar tí peṉker anturainiawai. 6Antsu iikia Yúsnaitji. Tuma asakrin Yusan nékainia nu anturtamainiaji. Tura Yúsnachu ainia nu anturtamainiatsji. Nuja̱i̱ nekas Wakanin takakusha tura wáitrin wakaní̱n takakusha nekaamniaiti.

Yus tuke aneṉkratniuiti

7Aneamu yatsuru, anenaitin Yusai̱ya̱ asamtai mái̱ anenai ajartai. Shuar aneṉkratniua nuka Yusa uchirí̱ asa Yúsnancha nékawai. 8Shuar aneṉkratcha nuka Yúsnanka nékatsui. Kame Yuska tuke aneṉkratniuiti. 9Tuma asa ni Uchirí̱ chikichkiniak ju̱ nuṉkanam akuptúrmakmiaji. Iisha ni túrunamuja̱i̱ nekas iwiaaku pujaji. Nuja̱i̱ Yus iin yáintmak ni aneṉkrattain paant iniakturmasmiaji. 10Ju̱ja̱i̱ nekas aneṉkrattaiṉkia paant nekanamniaiti, ii Yus aneaj núchaiti. Antsu ii ti tunáa árini̱ṉ Ni aneachmaitiataṉ Yuska ti anenma asa ni Uchirí̱n ii tunaari̱n asakárat tusa akuptúrmakmiaj nuja̱i̱ nekas nekanamniaiti.

11Aneamu yatsuru, Yus núnis anenma asakrin iisha núnisrik mái̱ anenai ajartai. 12Chikichkisha Yusan wáinkiachuiti. Túmaitiat mái̱ anenai ajakrikia Yus ii enentái̱n pujurtamkui Niji̱a̱i̱ métek aneṉkratin ajaji. 13Yus ni Wakaní̱n suramsa asakrin Yus iiji̱a̱i̱ tsaniṉ wekaana nusha tura ii Niji̱a̱i̱ tsaniṉkia wekaajnia nusha nuja̱i̱ nékaji. 14Yus Apa ni Uchirí̱n ashí shuaran uwemtikrarat tusa ju̱ nuṉkanam akupkámia nu wainkia asarⁱ étsereaji. 15“Jesus Yusa Uchirí̱nti” tana nu shuarja̱i̱ Yus tsaniṉ wekaawai tura nisha Yusja̱i̱ tsaniṉ wekaawai. Mai̱ chikichik ajasu áiniawai.

16Yus iin anenmajnia nu ti nekas nékaji. Yus tuke aneṉkratniuiti. Tuma asamtai shuar anenkartakka Yusja̱i̱ tsaniṉ wekaawai tura Yussha niji̱a̱i̱ tsaniṉ wekaawai. Mai̱ chikichik ajasu áiniawai. 17Núnisar tí peṉker anenkartin ajaji. Túrarⁱ sumamtikiatin tsawantai̱ natsamtsuk wajastatji. Kame ju̱ nuṉkanam pujayatrik Jesukrístuja̱i̱ méteketji. 18Nekas anenaiyamunam sápij atsawai. Antsu nekas anenaiyamunam sápij meṉkaawai. Aya asutiátin akui sapijmiaktinaiti. Tuma asamtai ántar sapijmiana nu nekas aneṉkratchaiti.

19Yus emka iin anenma asakrin iisha Ni aneaji. 20Tura shuar “wi Yusan aneajai” táyat chíkich Yus shuaran nakitiakka nuka wáitriniaiti. Kame Yus shuaran tuke wainnia nuna aneachkuṉka ¿itiurak Yusan wáinchasha aneat? 21Yus iincha ju̱na turammiaji, Yusan anea nu shuar chíkich Yus shuarnasha aneatniuiti.

Currently Selected:

1 Jṉ. 4: jiv

Highlight

Copy