1 Kur. 2

Kristu krúsnum jakamu étserma

1Wisha yatsuru, atumíin jeamaj nui̱ Yus Chichaman ti neka chichainia áintsaṉ tura íwiasanak ujakchamajrume. 2Tura atumji̱a̱i̱ pujakun aya chikichkiniak nekaatniun enentáimpramjai. Ju̱i̱ti, Jesukrístu tura Jesukrístu krúsnum jakamu. 3Nékayatan kakarmachu sapijmiashím jearmiajrume. 4Yus Chichaman ujaakun ti neka chichainia áintsaṉ nupetkataj tu enentáimturchamajrume. Antsu Yusa kakarmari̱ncha tura ni Wakaní̱ncha paant iniakmasan Yus Chichaman ujakmajrume. 5Aentsu nekatairi̱ji̱a̱i̱ Yus enentáimtuschatniuiti antsu Yusa kakarmari̱ paant nekaarum Yus enentáimtustiniaitrume. Nuní̱ asamtai Yus Chichaman tu ujakmajrume.

Yusa Wakaní̱ Yúsnan jintintiawai

6Túmaitiat Yusa nekatairi̱ átsuk. Yúsnan unuimiáraruja̱i̱ Yusa nekatairi̱n áujmatji. Tura Yusa nekatairi̱ṉkia aentsu nekatairi̱ áintsachuiti. Ju̱ nuṉkanam akupin ainia nuna nekatairi̱nchuiti Yúsnaka. Ju̱ nuṉkanam akupniúka ishichik pujus amukachartatuak. 7Yaunchu ju̱ nuṉka atsa̱i̱ṉ Yus iin uwemtikrampratniun enentáimpramiayi ti shiir pujusármi tusa. Ju̱ Yusa enentáimmiari̱ yaunchu nekanachmiayi tura yamaikia nu nekaar áujmatji. 8Ju̱ nuṉkanam akupniúka nuna peṉké nekaacharmiayi. Nékainiakka ii Uuntri̱ timiá shiira nuna krúsnum mácharu a̱a̱yi. 9Yaunchu Yus Papinium áarchamukait

“Shuar Yusan aneana nuna Yus tí shiiran susattawai.

Susattana nuka timiá péṉker asamtai ‘shuar wáinkiachman, antukchamuncha, enentáimtachmancha’ Yus susattawai.” Isa. 64:4

10Tura Yusa Wakaní̱ ii enentái̱n pujurtamuk Yus suramsattajnia nuna yamái paant jintintramji. Nu Wakancha imia Yus enentáimmiancha mash nékawai.

11Shuar enentáimna nuna chíkich shuar nekaamniakait. Antsu aya ní enentái̱ji̱a̱i̱ṉ nékatsuk. Núnisaṉ aya Yusa Wakaní̱ Yúsnan paant nékawai. 12Ju̱ nuṉkanmaya̱ aents enentáimiainia nuja̱i̱ Yusna nekaachminiaiti. Antsu Yusa Wakaní̱n iin súramaj nuja̱i̱ Yus shiir tsaṉkatramajnia nu nekaamniaitji. 13Yusa Wakaní̱ jintintramji Yúsnan chichastinian Ni wakera áintsaṉ. Ni chichame̱n súramji. Túramtai ii nékamuja̱i̱ Yúsna étsertsuji. Tuma asamtai imia Yusna nuka Yusja̱i̱ péṉker wekainia nu jintíaji.

14Yus shuarcha Yusa Wakaní̱niun ántatsui ántraiti tusa. Aya Yusa Wakaní̱ jintintiámniaitkiui Yus shuarcha nuna peṉké nekaachmin áiniawai. 15Antsu Yusa Wakaní̱n takaku ashí mash iis péṉkera nuna nekaamniaiti. Ni túrana nunasha chíkich shuar sumamtikiachminiaiti. 16Yus Papinium yaunchu áarmaiti “¿Yusa enentáimmiari̱ ya neka. Tura Yusan ya jintintiámniait?” Isa. 40:13 tu áarmaiti. Tuma ai̱ṉ iikia Yus shuar ájinia nu, Kristu enentáimna núnisrik enentáimji.

Currently Selected:

1 Kur. 2: jiv

Highlight

Copy