TOBITI 3
3
Na nunginungiha iana o Tobiti
1Inê kê tangahuriê ngavê ma kê maki bâraha. Inê ki rugu ngavê na obaku ma kê angi. Inê kê matamatoaniê ma hemuri kê nunginungi, kê vi:
2“Araha, igo ki oto na parongamu.
Na tauhamu hato ka oto.
Na parongamu ka hagabângenigo
vi igo ko hetaki
ma ko hagamonarigi tare na tamasinga iamu.
Igo ko surira tare na enoni igê na otoha.
3Tahema Araha, gu takusiê ma ku takiê.
Siana ko hagaitangiê meni na tasi iaku,
henaka vi na ani gê pe giraragi vi ngaigi ka na tasi,
se meni na bagatauhata na êvariku.
4Ngaira ka murisigego
ma ka aharêngigi na ramata iamu.
Tahema igo ko nakara na merongamami
ka rurugu tenigami
ma ka henahuraugami
ma ka mutegami.
Igo ko tokorenigami surigi na agua getigi.
Na enoni ngegana ka tamasigami,
ka megamimarabe ma ka hagamakigami.
5Na suriha hato iamu ka oto,
matena go hagaitangiê meni na tasi iaku
ma meni na bagatauhata na êvariku,
suria igami kami pe toto surigo
ma kami pe râ surigi na ramata iamu.
6Hoi, gu katoê manga go takusia.
Gu torea vê na rogaroga teniê
be magahuru tenia na maveta ikê.
Na apeku ke vora aporo re na mako.
Inê kê pe obania vi ve tahitahi mênga.
Inê kê obania hete ve me.
Na enoni ka guhariê purua ma.
Inê ki rugu ngavê na obaku.
Hoi Araha, gu hagatahiê nga
tenigi na ara ni mamasiaganiha iaku.
Gu nakê be râ be mamaro hagahu.
Manga gê meme ki koro teharia gê tahitahi
ma kê oga igê na mamasiaganiha
ma ka tarahuê na guhata raha.
Gu aganaria na nunginungiha iaku.”
Na mamasiaganiha iana ka Sara
7Igê nga na tangiana ngekana i hinua i Ekebatana i Metia na hitangita na kere gete tagara iana o Raguele o vaemana ka Sara, ki guharia ka Sara. 8Ka Sara ki bani êragi hagepi noga ma o Asemoteo na ataro era, ki nahuira tatage ka me o vaniana i nago tarana vige memêru. Na kere gete tagara ki vi tanga ka Sara, ki vi: “Igo ko hagamute mane! Bâ! Igo ko bani êragira noga na verepi na mane. Ma hagepi ko nagia ve re na kare. 9Suria o vaniamu ka me, i pe oto tangago, vigu hagaitangigami igami. Hega ko pe râ ku hakunira o vaniamu ga me? Igami kami page vagevage, manga go pe apara kare rârâ!”
10Ka Sara ki hataera ngavê renia. Ngaia ki angi bâraha ma ki tagere tanga na kiboru iana o vaemana, hanana vi rigorigo igê. Ma i ngekana ngaia ki tako herua ma ki vi: “Mareha! Naka ma vê. I era ma na enoni ka hagamakia o vaemaku, ka vivi, ‘Igo ko apara ma na kare gi tage, ka karemu go takuia bâraha. Ma ngaia ki rigo, suria i hataera na apena.’ Naka ma vê, i era ma na makiha ngekana ki nahuia ki me o vaemaku gohogohoraga. Siana be rigo. Be nungia ma hete na Araha ke nakê be me. Vikana ki page hato vi ve rongogi nikâ na guhatani ngegana!”
Na nunginungiha iana ka Sara
11Ka Sara ki ura râ igê na mabaha, ki gasigi na rimana ma ki nunginungi, ki vi:
“God ni takiha, na enoni ke hagahigasigo
ma ke hagarahasigo tare.
Na marâ hato go hagavorara
ke kasigo akê tare ki bê ki arâ. 11
12Araha, inê kê avarasigo.
13Gu toreê vê tenia na maveta ikê,
hanana siana kê rongogi nikâ
na guhata ngegana.
14Araha, igo ko bani girara,
vi inê kê oga matarotaro,
ma kê pe memêru rârâ na mane.
15Inê kê pe katoa ke rongo era
na ataku se na atana o vaemaku
igê na agua ga henahurauê tanga.
Inê ki na kare i tage iana o vaemaku.
I marehasia ta na kare nikâ,
hanana vige urusia,
se ta na goana hanana vi ve êragia.
Inê ka bani me teniê noga o vaniaku gi pi.
Tanu hega kani vigê tahitahi?
Ma ki manga go pe obania vigu hagamesiê,
gu takiê nga,
hanana siana ka tamasi erasiê nikâ.”
God ki aganarigi na nunginungiha iaterua o Tobiti ma ka Sara
16Matena o Tobiti ma ka Sara karu nunginungi, na Araha God ki aganarigi na nunginungiha iaterua. 17Ngaia ki hagatorangenia na angero o Rapaele, hanana i tamanirerua. Ngaia ki hagatora ki râ ki hagamagahurugi râ na reo i maana o Tobiti, hanana i marava aporo na maana. Ma ngaia ki hagatora nikâ, hanana i hagauragingenirerua ka Sara ka karena o Raguele ma o Tobiasi o karena o Tobiti. I oto tanga o Tobiasi hanana vi auragia ka Sara, suria ngaia ki no goana. God ki bonasia nikâ o Rapaele, hanana i paia hura o Asemoteo na ataro tenia ka Sara. Igê nga na matena ngekana o Tobiti ki aporo banu i ruma iana tenia na mamarupa, ma ka Sara i ruma iana i Ekebatana ki so me tenia na kiboru i haha.
Currently Selected:
TOBITI 3: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific