MAREKO 11

O Jesu ki banu i Jerusaleme

(Mt 21.1-11; Lk 19.28-40; Jn 12.12-19)

1Matena ga râ me hagarangia Jerusaleme, igê na hinua i Betepage mi Betani, ngaira ka ata igê na Hungana ni Olive. O Jesu ki hagatorangenirerua na vererua na kariana, karu nanago. 2Ma ngaia ki vi tangarerua, ki vi: “Muru arâ igê na hinua ikana. Matena muru atata vê i ngekana, muru page tarahua ototo râ nga igê na bêhâgana na tonki, ga pe tagiria noga na enoni, ma ka baroa. Kamuru rupasia, ma kamuru urua me. 3Ma ki manga ta na enoni, ma ki hagategamurua, ki vivi, ‘Muru he nakao?’ Muru vi tanga, kamuru vivi, ‘Na Araha iamami kani obania noga, ma ki page hagatorangenia aporo me rêrê.’”

4Hoi, ma ngairerua karu râ, ma karu tarahua na bêhâgana na tonki i tara i hinua, ga baroa i maa ni ruma. Matena garu ruhasia, 5tani na enoni, ga rêrâ i ngekana, ka hagatererua, ka vi: “Muru he nakao? Muru rupasia na bêhâgana na tonki iê?” 6Ngairerua karu arami tagenana ma manga o Jesu i bani vi tangarerua, ma vikana na mane ka nakarerua mavê. 7Ngairerua karu urua na bêhâgana na tonki tanga o Jesu, ma karu vatarangenigi na gahu iaterua igê na gerina na bêhâgana na tonki, mo Jesu ki hane ki oga igê. 8Rako na enoni ka vatarangenigi na gahu iata i tara, ma tani ka retegi na arani na apinige i na akerena na tara, ma ka vagatari i tara. 9Na enoni, ga nanago, ma na enoni, ga mumuri, ka haganega ka ngerengere, ka vivi: “Ge visia raha God! God ke kasia akê hete na urusina na Araha! 10God ke hagagatagatania hete na arahanga iana na êvarika o Tavite. Na arahanga ki page arâ me! Ge visia raha God!”

11O Jesu ki banu i Jerusaleme ma ki râ i Ruma ni Rotu, ma ki haharirigi na ara ni marâ. Ma renia i bungi noga, ngaia ma na kariana tangahuru matarerua ka hura tenia Jerusaleme tanga i Betani.

O Jesu ma na apinige na fiki

(Mt 21.18-19)

12Igê na tangiana i muri, matena ga aporo me tenia i Betani, o Jesu ki magê. 13Ngaia ki rigia râ hagatê na apinige na fiki, i suru bâraha na arani. Vikana ngaia ki râ ma ki bâbâ renigi na guani, ma na matena i râ me hagarangia, ngaia ki bâsigi ma na arani, renia ki mamênga na matena, vi ge hunguhungu igê. 14O Jesu ki tamasi tanga na apinige na fiki, ki vi: “I asa ta na enoni, vi ge page ngêa nikâ na guamu!” Ma na kariana ka rongoa.

O Jesu ki râ i Ruma ni Rotu

(Mt 21.12-17; Lk 19.45-48; Jn 2.13-22)

15Matena ngaira ka ata i Jerusaleme, o Jesu ki râ i Ruma ni Rotu, ma ki haganega ki tarigenira hura na enoni, ga vurivuri ma ka hagavuri igê na Ruma ni Rotu. Ngaia ki horogi na bea iata na enoni, ga urisi haga igê, ma na âgâga iata na enoni, ga hagavuri igê na kuvê. 16Ma ngaia ki hagapêpura na enoni, siana ka migiri matena ga totora ta na marâ i Ruma ni Rotu. 17Ma ngaia ki hagesurira na enoni, ki vi: “I na Buka Apuna God ki bani, vi, ‘Na ruma iaku ki na ruma tangara na enoni hato i maveta, ga nunginungi igê.’ Ma igamu kamu katoa renia na agua tangara na enoni hanago!”

18Na mane ni vogasiha ga teha ma na mane ni hagesuringa ni rotu ka rongoa na tarana ngekana. Vikê ngaira ka haganega ka garia ta na tarana, hanana vi ga nanahuia o Jesu ki meme. Ngaira ka magutenia, renia na enoni hato ka konekonetenia igê na hagesuringa iana.

19Matena i su na arito, o Jesu ma na kariana ka pania na hinua raha.

Na hagesuringa renia na nunginungiha

(Mt 21.20-22)

20Igê na mahogotana na tangiana i muri, matena ga arâ i tara, ngaira ka rigia na apinige na fiki. Ngaia ki maria hagenani, na apena ma na vagani nikâ. 21O Petero ki takusia aporo na marâ, i bani vora me, ma ki vi tanga o Jesu, ki vi: “Bâ, Araha, na apinige na fiki, go visia bera ea ki me hagetage ngavê!”

22O Jesu ki aramira, ki vi: “Mu rongo! Manga igamu, ma kamu tongesuria God, 23igamu kamu girara mu vi tanga na hungana ikê, kamu vivi, ‘Gu aharaga ma ko kasigo ataha maremu i asi.’ Manga vi igamu, ma kamu pe takotako tugupu igê na aitangihami, ma ki manga igamu, ma kamu tongesuria gatagata, vi page voravora me na marâ, mu visia, ki page voravora me na marâ, mu obania. 24Tahema be vi tangagamu: matena mu nunginungi, ma kamu nungia God renia ta na marâ, ki tuguhigamu, mu raronitogo nga renia God, vi ngaia ki page vategamu, ma ngekana na ara ni marâ, mu nungigi, ka page tarahugamu. 25Ma na matena mu rêrâ ma kamu nunginungi, ki tuguhigamu, mu bonotenigi na ani mavê na eraha, ga katogi na enoni getera tangagamu, hanana God Vaemami ki page bonotenigi nogana na tasi iami.

26[Manga igamu, ma kamu pe bonotenigi na tasi iata na enoni getera, God Vaemami ki pe bonotenigi nogana na tasi iami.]”

Na hagatenga renia na raramohana o Jesu

(Mt 21.23-27; Lk 20.1-8)

27Vikê ngaira ka aporo i Jerusaleme. Matena o Jesu ki arârâ i na Ruma ni Rotu, na mane ni voagasiha ga teha ma na meraha, ma na mane ni hagesuringa ni rotu ka râ me tanga, 28ma ka hagatea, ka vi: “I koro ma tangago vari, vi go katogi na tarani ngegana? O ti kani vatego na ramoha, ko katokato vikana?” 29O Jesu ki aramira, ki vi: “Hoi, be hagategamu renia na ani gi tage ma na hagatenga, ma ki manga mu aramiê, hoi, inê kê girara, gê kahu visia tangagamu na ramoha ta kani gê nahunia, vigê katokato vikana. 30Hoi, visia me, o ti kani vatea re o Joane na ramoha ki hagabatesimo, God se na enoni?”

31Ngaira ka haganega ka hehagateri so mareta, ka vi: “Ga vivi marâ ta? Manga ga aramia, ka vivi, vi God, ngaia ki page vivi, ‘Hoi, tanu hega kanigamu pe bani tongesuria o Joane?’ 32Ma ki manga ga vivi, vi na enoni, e...” (Ngaira ka magutenira na enoni, renia na enoni hato ka tongesuria, vi o Joane ki na poropete.) 33Tahema ngaira ka aramia o Jesu, ka vi “Igami kami pe girara.”

Mo Jesu ki vi tangara, ki vi: “Hoi, inê nogaku kê pe obania ve visia tangagamu na ramoha, gê nahunia, kê katokato vikana.”

Currently Selected:

MAREKO 11: KCB

Highlight

Copy