MATEO 4

Satana ki uhungia o Jesu

1Hoi, na Higona Apu ki katoa o Jesu, ki râ igê na manihê, hanana vi Satana ki uhungia. 2Ma i ngekana o Jesu ki hari surigi na tangiani tangahuru gi he ma na bungiani tangahuru gi he, ma ki magê. 3Satana ki râ me tanga, ma ki vi: “Manga vi igo ki no Karena God, gu vi tangagi na hê igê ke voravora renigi na bereti.”

4O Jesu ki arami, ki vi: “Na Buka Apuna ki bani vi, vi ‘Na enoni ki pe mauri renia ma na ngêra, ma ki mauri renigi na ara ni tamasinga iana God.’ ”

5Me muri Satana ki merâ o Jesu i Hinua Apuna i Jerusaleme, ma ki akê hagêrasia i kerekê ngavê igê na gerina na Ruma ni Rotu. 6Ma ngaia ki vi tanga, ki vi: “Manga vi igo ki no Karena God, hoi, gu reke so i ano. Suria na Buka Apuna ki vi,

‘God ki page bonasira na angero iana,

ka bâbâ surigo.

Ngaira ka page torego i rimata,

hanana siana ko tapasu igê na hê.’ ”

7O Jesu ki arami, ki vi: “Ma na Buka Apuna ki vi nikâ, ‘Siana ko uhungia na Araha God iamu.”

8Ma hemuri Satana ki meakê o Jesu igê na barana, ma ki hagabâsia renigi na arahanga hato i maveta ma na ruruguha hato surigi. 9Ma Satana ki vi: “Inê be vatego renigi na ara ni marâ hato ngegana, manga vi go susure ma ko rahesiê.”

10Mo Jesu ki arami, ki vi, “Muni vê, Satana! Na Buka Apuna ki vi,

‘Ngaia getea ma na Araha God iamu

ko rahesia ma ko bêtuhia.’ ”

11Vikê Satana ki râ vê pania, ma na angero ka râ me ma ka tamania o Jesu.

O Jesu ki haganega na tagaraha iana i Galilea

(Mk 1.14-15; Lk 4.14-15)

12Matena o Jesu ki rongoa, vi o Joane ki oga i ruma ni hagaitangiha, ngaia ki râ vê tanga i Galilea. 13Ngaia ki pania na hinua i Nasarete, ma ki râ ki oga i Kapenamu, na hinua i hagarangia na Rano i Galilea, igê na apanena iaterua o Sebuluni mo Napatali. 14Na tarana ngekê ki hagamonaria na tamasinga iana na poropete o Isaia, i vi:

15“Enoni igê na mako iana o Sebuluni!

Enoni igê na mako iana o Napatali!

Enoni i tara ataha tanga na asi,

i na apanena tarê na ve i Jotano,

i Galilea, ga oga igê na enoni, ga pe Siu!

16Na enoni, ga oga igê na roto,

ka bani rigia na marara raha!

Na marara ki mavesira na enoni,

ga oga igê na roto hono, na agua ni mera.”

17Haganega na matena ngekana, o Jesu ki haganega ki ateate renia na taroha iana, ki vi: “Mu murisigegi na tasi iami, ma kamu urisi parongami! Na Arahanga iana God ki hagarangi me noga.”

O Jesu ki unira na mane hugohugo ge he

18Matena o Jesu ki ritare i one igê na Rano i Galilea, ngaia ki bâsirerua o hegoana: o Simone, ga hêtana nikâ vi o Petero, mo Anterea o vesina. Ngairerua ka na mane hugohugo, garu hugora na siare igê na Rano. 19O Jesu ki vi tangarerua, ki vi: “Muru râ me, ma be hagesurigamurua, hanana mu hugora na enoni.” 20Ngairerua karu panigi ototo râ nga na hugo iaterua ma karu takua.

21Ngaia ki râ vê sisite, ma ki bâsirerua nikâ tani o hegoana, o Jakobo mo Joane, na karena o Sebeteo. Ngairerua mo Sebeteo, o vaematerua, ka goga igê na kere haka iata, ma ka hagarêgi na hugo iata. O Jesu ki unirerua. 22Ngairerua karu panirerua ototo râ nga na kere haka mo vaematerua, ma karu takua o Jesu.

O Jesu ki ateate ma ki hagesurira ma ki rikira na enoni

(Lk 6.17-19)

23O Jesu ki râhia i Galilea hagenani. Ngaia ki hagesurira na enoni i ruma ni sukuru iata. Ngaia ki ateate renia na Taroha Koro renia na Arahanga iana God, ma ki rikira na enoni tenigi na ani mavê na maeha ma na mera.

24Ma na tarotarohana ki râhia na apanena i Siria hagenani. Vikê na enoni ka merarâ me tanga o Jesu na enoni, ga maeha, ga tarahura na ani mavê na maeha ma na mera: na enoni, ga atataroga, ma na enoni, ga manumanuga, ma na enoni, ga tavi. Mo Jesu ki rikira ngaira hato. 25Rako era na enoni ka takua: na enoni ni Galilea, na enoni ni Hinua Tangahuru, ma na enoni ni Jerusaleme, mi Jutea, ma na enoni tenia na apanena tarê na ve i Jotano.

Currently Selected:

MATEO 4: KCB

Highlight

Copy