MATEO 2

Na maneraha ga râ me ka bêtuhia o Jesu

1O Jesu ki vora i hinua i Beteleme, i na apanena i Jutea, igê na matena o Herote i maneraha. I na kere matena i muri tani na mane, ga hagesuringenigi na higu, ka râ me tenia i kerekê ma ka so tanga i Jerusaleme. 2Ngaira ka hagate, ka vi: “I he nga na kare, i vora me, hanana vi maneraha iata na Siu? Igami kami rigia na higu iana, i akê i kerekê, ma kami râ me, hanana vi gami bêtuhia.”

3Matena na maneraha o Herote ki rongo vikê, ngaia ki era nga vê na obana, ma ka bagatatako nogata na enoni hato i Jerusaleme. 4Ngaia ki hagahakura na mane hato ni hagarahenga ga teha ma na mane ni hagesuringa ni rotu ma ki hagatera, ki vi: “I he nga ki page voravora me igê o Kirisito?” 5Ma ngaira ka arami, ka vi: “I hinua i Beteleme, i na apanena i Jutea. Suria na poropete ki bani sege, ki vi:

6‘Igo, Beteleme, igê na apanena iana o Juta,

ko pe hagemurira na hinua iana o Juta.

Renia tenia i pasimu ki page ura na maneraha,

i page bêngenira na kariana, na Ai ni Isiraele.’ ”

7Vikê o Herote ki unira na mane, ga râ me tenia i kerekê, ma ki meratamasi pinihi, ma ki tarahua tenira nga na matena, na higu i vora me igê. 8Ma hemuri ngaia ki hagatorangenira vê tanga i Beteleme, ki vi: “Mu arâ, ma kamu garigari maninga renia na kare, ma na matena mu tarahua, mu hagarongoê, kê girara, hanana gê arâ nogaku kê bêtuhia.” 9Matena ngaira ka rongoa hato na tamasinga iana na maneraha, ngaira ka râ vê. Ma ke bâ, matena ga arâ, na higu, ga bani rigia i kerekê, ki hagenago tarata, mataro me ki oga tonge so i avorana na agua, ki oga igê na kare. 10Ma na matena ga rigia nikâ na higu, ngaira ka vagevage bâraha ma ki koro era na obata. 11Ma ngaira ka banu vê i ruma ma ka bâsirerua na kare ma ka Maria kenana. Ma ngaira ka susure ma ka bêtuhia na kare. Ma hemuri ngaira ka tangahigi na anga iata ma ka tagarenigi na votovoto iata tanga: na golo, ma na marâ, i sigini koro, matena ga sungia, ma na totogana na apinige na mira, i sigini koro.

12God ki hagamarutera ma ki hagapêpura, vi siana ka aporo i pasina o Herote. Vikê ngaira ka aporo i pasita suria na tara getea.

O Josepo ma na ahemata iana ka gava tanga i Esipito

13Matena ga bani râ na maneraha, na angero iana na Araha ki vora me tanga o Josepo, matena i marute, ma ki vi: “Gu aharaga, ma ko mererâgava na kare ma kenana, ma kamu arâ i Esipito, ma kamu goga i ngekana, mataro me kê hagarongogamu renia na matena mu arâ tenia. Suria o Herote ki kahu garia na kare, hanana vi nanahuia.” 14Vikê o Josepo ki aharaga ma ki mererârua na kare ma kenana suria na bungiana, ma ka râ tanga i Esipito.” 15Ma ngaira ka oga i ngekana, mataro me ki me o Herote.

Na tarana ngekê ki hagamonaria na marâ, na Araha i bani tamasi i harana na poropete renia, ki vi: “Inê kê unia hura o Kareku tenia i Esipito.”

Na me iana o Herote ka nahuira na kere kare mane

16Matena o Herote ki tarahua, vi na maneraha i kerekê ka hagaparua, ngaia ki mangariaga ngavê. Ngaia ki bonasira na mane ni me iana, ka râ i Beteleme ma i na hinua hagarangia, ma ka nahuira na ara ni kere kare mane hato, ga tonga na harisi gi rua iata, ma na ani, ga sisite mêngara. Ngaia ki naka vikana, hanana i hagararia suria na matena, i tarahua tenira na maneraha.

17Na tarana ngekê ki hagamonaria na tamasinga iana o Jeremia na poropete, i vi:

18“Na enangiha ki rongo raha i hinua i Rama,

na akêkuha ma na angiha maramara.

Ka Rakele ki angisira na karena,

suria ngaira hato ka bani magahuru.

Ngaia ki usi vige haganaku parongana.”

O Josepo ma na ahemata iana ka aporo tenia i Esipito

19I murina i me o Herote, na angero iana na Araha ki vora me tanga o Josepo i Esipito, matena i marute. 20Ngaia ki vi: “Gu aharaga, ma ko mererârua na kare ma kenana, ma kamu aporo i Isiraele, renia na mane, ga obania, vi ga nahuia na kare, ngaira ka bani me.” 21Vikê o Josepo ki aharaga, ma ki mererârua na kare ma kenana, ma ka aporo i Isiraele.

22Matena o Josepo ki rongoa, vi o Akelao ki marungia i Jutea, urusina o Herote o vaemana, ngaia ki magu, vi ge oga i ngekana. Ma God ki tamasi nikâ tanga, matena i marute. Vikana o Josepo ki râ i na apanena i Galilea. 23Ma ngaia ki oga so i hinua i Nasarete. Na tarana ngekê ki hagamonaria na tamasinga iana na poropete, i vi: “Ga page hêtana vi Nasarene.”

Currently Selected:

MATEO 2: KCB

Highlight

Copy