MATEO 18

O ti ki teha

(Mk 9.33-37; Lk 9.46-48)

1I na matena ngekana na kariana ka râ me tanga o Jesu, ma ka hagatea, ka vi: “O ti kani teha igê na Arahanga iana God?” 2O Jesu ki unia me na kere kare, ma ki hagêrasia so i matota, 3ma ki vi: “Mu rongo! Manga mu pe urisi parongami ma kamu pe vora mangara na kare, i asa iami, vi gamu page oga igê na Arahanga iana God. 4Na ani, i tehateha igê na Arahanga iana God, ngaia ki na ani, i kasia so marena ma ki voravora manga na kere kare ikê. 5Ma na anima na enoni, i unia banu na kere kare manga na ani ikê reniê inê, ngaia ki uniê banu inê.

Na heuhungiha na tasi

(Mk 9.42-48; Lk 17.1-2)

6“Mu bâsira na kare igê, ga tongesuriê. Manga ta na enoni, ma ki hagesuria bera na ani gi tage na hitangita na kare igê, ngaia ki araria ma, ga baroa i riona na hê raha, ma ka kunia so igê na matava tara, ki totono. 7I maveta ka oga igê na marâ, ga hagavotarira na enoni igê na tasi. Tahema ki era ngavê tangara na enoni. Ma na heuhungiha ka akê me tare. Ma ki era ngavê tanga na enoni, i katogi na heuhungiha ngegana!

8Manga vi na rimamu se na êgamu, ma ki hagavotarigo igê na tasi, go retea ma ko kasia râ. Ma ki koro hete tangago, vi go nahunia na mêriha mora henia na rimamu gi tage se na êgamu gi tage; ma ki pe koro tangago, vi gu nahunirerua na rimamu gi rua ma na êgamu gi rua, matena ga kasigo igê na agua ni hagaitangiha, i oga tare. 9Ma ki manga vi na maamu, ma ki hagavotarigo igê na tasi, go akangia ma ko kasia râ. Ma ki koro hete tangago, vi go nahunia na mêriha mora henia na maamu gi tage togo; ma ki pe koro tangago, vi gu nahunirerua na maamu gi rua, matena ga kasigo igê na agua ni hagaitangiha.

Na maramaraveta renia na sipi i tarupe

(Lk 15.3-7)

10“Siana kamu ruhia na hitangita na kare igê. Be vi tangagamu: na angero iata i pasina God ka goga tare i maana God Vaemaku. 11Suria o Karena Enoni ki râ me, hanana i hagatahira na enoni, ga tasi.

12“Na ta kamu takusia? Manga vi na mane, ma ki nahunira na tangarê na sipi, ma na ani gi tage ki tarupe, na ta ki katoa renia? Ngaia ki panira so na sipi tangahuru gi siva matara ki siva, ga ngêngê igê na bena ni go igê na tarihana na hungana, ma ki arâ, ki garia na sipi, i tarupe. 13Be vi tangagamu: na matena i tarahua, ngaia ki vagevage ngavê renia na ani gi tage na sipi ngekê teharira na sipi tangahuru gi siva matara ki siva, ga pe tarupe. 14I tagenana ma God Vaemami ki pe obania na ani gi tage na kare ngegê, vi ge tasitasi.

Ko hagaotoa na goamu i tasitasi

15“Manga vi na goamu, ma ki erasigo renia ta na marâ, i pe koro, gu arâ nga i pasina ma ko hagagirara pinihi, igo ma ngaia, hanana i girara, vi ngaia ki tasi. Manga vi ngaia, ma ki têtê viteamu, igamurua kamuru hekorokoro aporo. 16Manga vi ngaia, ma ki pe têtê viteamu, gu merâ na vere tage se gi rua, ‘hanana na enoni gi rua se gi oru ka hagatanga monari renigi na ara ni tamasinga’, manga i bani visia na Buka Apuna. 17Ma ki manga i pe têtê viteata nogata, hoi, go hagarongoa na hakuta ninuni, ga tongesuri, renigi na ara ni marâ. Ma ki manga vi ngaia, ma ki pe têtê viteana na hakuta ninuni, ga tongesuri, hoi, go katoa nga, manga vi ngaia ki na mahuara se vi na enoni i totora takesi.

18“Inê be vi tangagamu, igamu hato: na marâ, mu manimanigi i maveta, God ki page manimanigi nogana; ma na marâ, mu hagamarumungenigi i maveta, God ki page hagamarumungenigi nogana.

Na nunginungiha haku

19“Hoi, be vi tangagamu nikâ: manga na vererua na hitangimi i maveta, ma karu obâbahaku renia na marâ, garu nungia, God Vaemaku ki page katoa tangarerua. 20Suria manga na vererua se gi oru, ma ka hakuhaku me igê na raramohaku, inê kê goga henira nogaku.”

Na maramaraveta renia na bonoteniha na tasi

21Mo Petero ki râ tanga o Jesu, ma ki hagatea, ki vi: “Araha, hagehita na goaku ki girara i erasiê renia ta na marâ, i pe koro, ma ki tuguhiê, vi gê bonotenia? Hagepi vari?”

22O Jesu ki arami, ki vi: “Mareha vi hagepi ma, ma tare ma tare ma hete. 23Renia na Arahanga iana God ki manga na maneraha, i obanira na kariana viga barubaru na hagaba iana tangara. 24Matena i kahu haganega, ngaia ki unia banu me na vere tage na hitangita, i bani hagaba tanga renigi na bera rako na haga. 25Na kariana ki pe nahunigi rârâ na haga, hanana vi ge barua renia na hagaba. Tahema na araha iana ki vi, ka hagavuringenia, manga na kare vurivuri, henia na gete iana ma henira na karena ma henigi na nahuninga hato iana, baruna na hagaba. 26Na kariana ki susure i maana na araha iana, ma ki nungia, ki vi: “Gu piringiape reniê, ma hanana gê page barubaru vê na ara ni marâ hato.” 27Na araha iana ki takia. Vikana ngaia ki bonotenia na hagaba ma ki naka vê ki râ.

28“Na mane ki hura vê ma ki tarahua na vere tage na hitangita na tamana, i bani hagaba nogana tanga renigi tani ma na haga. Ngaia ki ranguia ma ki haganega ki konokonoa. 29Na tamana ki vota so ma ki avaravara, ki vi: ‘Gu piringiape reniê ma hanana gê page barubaru aporo! 30Ma na tamana ki usi. Tahema na tamana ki kasia ma igê na ruma ni hagaitangiha, mataro me ki barubaru hato na haga. 31Matena na tamana getera ka rigia, i kato vikana, ngaira ki era ngavê na obata, ma ka râ i pasina na araha iata, ma ka hagarongoa renigi na ara ni marâ. 32Ngekana na araha ki unia me na kariana, ma ki vi: ‘Igo na eragani nuni! Inê kê bonotenia na hagaba hagenani, gê vatego, suria go nungiê, kê bonotenia. 33Tanu i hega kanigo pe takuia na tamamu, tagenana manga inê gê takuigo?’ 34Na araha ki mangariaga bâraha ma ki hagatorangenia na kariana tanga na ruma ni hagaitangiha, hanana ga hagaitangia igê mataro me ki barua na hagaba hagenani.”

35Mo Jesu ki vi: “God Vaemaku ki page katogamu nogami na ara ni hitangimi, igê na tarana vikana, manga vi igamu ma kamu pe bonotenigi i mêrihami hagenani na marâ, na goami ga erasigamu renigi.”

Currently Selected:

MATEO 18: KCB

Highlight

Copy