LUKA 15

Na sipi i tarupe

(Mt 18.12-14)

1Ta na tangiana rako era na mane, ga totora takesi, ma na enoni, ga aharê igê na ramata, ka râ me, hanana vi ga karinga o Jesu. 2Na Pariseo ma na mane ni hagesuringa ni Rotu ka haganega ka tamasi ngurunguru renia, ka vi: “Bâsia, i unira banu na enoni, ga aharê igê na ramata, ma ki merabêrihu!” 3Tahema o Jesu ki tamasi maramaraveta vikê tangara, ki vi:

4“E vora re ta na hitangimi, ma ke nahunira na sipi tangarê gi tage, ma na ani gi tage ke tarupe. Na ta kani ge katoa? Ngaia ke panira so na sipi tangahuru gi siva matara gi siva igê na bena ni go, ma ke arâ ke garia na sipi, i tarupe, mataro me ke tarahua. 5Matena i tarahua, ngaia ki vagevage teha ngavê, ki ragea ma ki kasia i gaparana. 6Ngaia ki torea aporo i hinua, ma ki unira haku me na tamana ma na enoni i pasina, ma ki vi tangara, ki vivi, ‘Mu vagevage heniê, suria gê tarahua na sipi iaku, i bani tarupe!’ 7Be vi tangagamu: i tagenana ma, na vagevageha i pasina God renia na ani gi tage na enoni tasi, i urusi parongana, ki teharia na vagevageha renira na enoni tangahuru gi siva matara gi siva, ga pe urusi parongata, renia ga vi ngaira, vi ga koro.

Na haga i tasi

8“Se ge vora re na gete, ma ke nahunigi na maani na haga tangahuru gi tage, ma ke hagatasia na hitangini. Na ta kanige katoa? Ngaia ke tanga na laiti, ke sinoa na ruma, ma ke bâbâ maninga i na ara ni agua, mataro me ke tarahua. 9Matena i tarahua, ngaia ki unira haku me na tamana ma na enoni i pasina, ma ki vi tangara, ki vivi, ‘Mu vagevage heniê, suria gê tarahua na maana na haga, i bani tasi!’ 10Be vi tangagamu: i tagenana ma, na angelo iana God ka vagevage renia na ani gi tage na enoni tasi, i urusi parongana.”

Na mane i takuia o karena

11O Jesu ki tamasi nikâ, ki vi: “Ta na mane, i aparerua o karena gi rua. 12Na kere mane i muri ki vi tanga o vaemana, ki vi, ‘Mama, gu paneê nga i ngekê renia na apanena na nahuninga iamu.’ Vikana o vaematerua ki panererua o karena gi rua renigi na nahuninga iana. 13I murini na tangiani haritamani na kere mane i muri ki hagavuringenia na apanena iana na nahuninga, ki pania na hinua, ma ki migirâ na haga. Ngaia ki râ igê na marê, i hagatê. Ma i ngekana ngaia ki kasi purua ma na haga iana igê na ataka mavê na marâ. 14Ngaia ki kasi hato na ara ni marâ, i nahunigi. Ma hemuri na magêha raha ki tarahua na marê ngekana, ma ngaia ki pe nahunia rârâ ta na marâ. 15Tahema ngaia ki râ ki tagara tanga ta na mane i na marê ngekana. Na mane ngekana ki hagatora ki tagara igê na para iana, hanana i marupera na bo. 16Ngaia ki obania bâraha vi ngêngê na nganga iata na bo, ma ki mareha rârâ ta na enoni, vi ge vatea na ngêra iata na bo. 17Hoi, me hemuri ngaia ki kahu tako rugu aporo, ma ki vi, ‘Na enoni hato, ga tagara tanga o mama iaku, ngaira ka ngêngê kasigi tare na ngêra, ma inê ikê kê haga ni meme nga renia na hioronga. 18Inê be tavoraha be aporo i pasina o mama iaku, ma kê vi tanga, kê vivi: “Mama, inê kê haritohea God ma igo. 19I pe ararigo, vi gu hêtaku nikâ vi o karemu kani inê; go katoê hete manga vi na enoni tagara iamu.” 20Ngekana ngaia ki tavoraha ma ki aporo i pasina o vaemana.

“Ngaia ki hagatê mênga me tenia na hinua, mo vaemana ki bâsia râ i arâ me, ma ngaia ki takuia ngavê, ma ki tango vurusia, ki ruia ma ki nunugua. 21O karena ki vi, ‘Mama, inê kê haritohea God ma igo. I pe ararigo, vi gu hêtaku nikâ vi o karemu kani inê.’ 22Ma o vaemana ki unira na enoni tagara, ki vi, ‘Mu garigari! Mu torea me na tuguni bâkoro ngavê, ma kamu hagatugunia renia. Kamu naka na bangobango ni rima i rimana, ma kamu hagabutia. 23Ma hemuri kamu merâ me na bêhâgana na puruka i manoenoe kamu nahuia, ma ka magoto! 24Renia o kareku ikê ki me i nago, ma i ngekê ngaia ki mêri aporo; ngaia ki tarupe i nago, ma i ngekê ngaia ki aporo me!’ Hoita, ngaira ka magoto.

25“Na kere mane i nago ki mênga me i mu i na matena ngekana. Matena i aporo me ki hagarangia noga na ruma, ngaia ki rongogi na êhihi ma na mâha. 26Ngaia ki karuhia na hitangita na enoni tagara, ma ki hagatea, ki vi, ‘Na ta kanimu katoa?’ 27Na enoni tagara ki arami, ki vi, ‘O vesimu ki aporo me, ma o vaemamu ki nahuia na bêhâgana na puruka i manoenoe, suria i bâsia, i aporo me bâkoro ma, ma ki apekoro.’

28“O veogana ki mangariaga bâraha, ma ki usi, vi ge banu i ruma. Tahema o vaemana ki hura, ma ki tutuguria, ki banu me. 29Ma ngaia ki aramia bê aporo o vaemana, ki vi, ‘Gu bâ, na ara ni harisi rako me inê kê tagara tangago manga na enoni vurivuri, ma ki asa, vi ve haritohego rârâ. Ma na ta kanigo vateê? Mareha vê, henaka ma vi na goti ma igo ko pe vateê, hanana vive magoto henira na tamaku! 30Ma o karemu ikê ki bani kasi purua hato na ara ni nahuninga iamu renira na gete era, ma na matena i aporo me, igo ko magoto tanga renia na bêhâgana na puruka i manoenoe!’ 31O vaemana ki arami, ki vi, ‘O kareku, igo ko oga tare nga heniê ikê ma na ara ni marâ, gê nahunigi, ka na ani mu. 32Ma ki ararigia ga magoto ma ka vagevage, renia o vesimu ki me i nago, ma i ngekê ngaia ki mêri aporo; ngaia ki tarupe i nago, ma i ngekê ngaia ki aporo me.’”

Currently Selected:

LUKA 15: KCB

Highlight

Copy