LUKA 10

O Jesu ki hagatorangenira vê na mane tangahuru gi pi matarerua

1I murina ngekana na Araha ki atera, nikâ na mane tangahuru gi pi matarerua, ma ki hagatorangenira vê, ka râ na vererua ma na vererua, hanana ga nanago tarana i na ara ni hinua ma i na ara ni agua, ngaia marena i kahu vatugigi. 2Ngaia ki vi tangara, ki vi: “Na mu ni harisi ki raha ma ki mêa, ma ka pe rako na enoni tagara, hanana vi ge opaopa. Ma nungia na avanuna na mu ni harisi, ki kasira me nikâ tani na enoni tagara, hanana ga opaopa. 3Mu râ! Inê kê hagatorangenigamu mangara na kareta na sipi i guputa na o vasiga. 4Siana kamu migirâ na kato, se vi na anga, se vi na buti. Siana kamu rêra so i tara, hanana vigamu meratamasi na enoni. 5Na ara ni matena mu bêbanu i ruma, mu vi tanga i nago na ruma, kamu vivi, ‘God ke vategamu na marapeha.’ 6Manga vi na enoni ga haritagi ma ka marape, ma ka gâga i ngekana, na nunginungiha iami tanga na marapeha ki koro i angarira nga. Manga i mareha, mu hagapurusia na nunginungiha iami tanga na marapeha tenira. 7Mu gâga nga i ruma ngekana, mu ngêngê ma kamu totono na marâ, ga vategamu, renia na enoni tagara ki oto tanga, i nahunia na mena na tagaraha iana. Siana kamu huhura ma banu. 8Na ara ni matena mu bêbanu i hinua, ma na enoni i ngekana ka unigamu banu, mu ngêngê na ngêra, ga vategamu. 9Ma kamu hagakomagara na enoni, ga maeha, i hinua ngekana, ma kamu vi tangara na enoni i ngekana, kamu vivi, ‘Na Araha God ki sugi marungigamu.’ 10Ma na ara ni matena mu bêbanu i hinua, ma na enoni i ngekana ka pe unigamu banu, mu pania na hinua, ma kamu vivi, 11‘Igami kami kangigi râ nikâ na momo i hinua iami, ga puru me i êgamami, hanana mu girara, vi i era na parongami. Ma kamu takusia na tarana ikê: na Arahanga iana God ki hagarangigamu me noga!’ 12Be vi tangagamu: igê na Tangiana na Suriha Raha God ki page takuira ngavê na enoni i Sotomo teharira na enoni i hinua ngekana!

Na hinua ga pe tongesuria o Jesu

(Mt 11.20-24)

13“I era ngavê tangagamu, igamu na enoni ni Gorasini! Ma ki era ngavê tangagamu nikâ, igamu na Ai ni Betesaita! Manga na enoni i Taire ma i Sitone, ma ka bâsigi na mena, mu bani bâsigi igamu, ngaira na enoni i hinua i ngekana ka bani oga so ma ki rugu na obata, ma ka bani hagesuru renigi na tarisigani na gahu, ma ka bani kuira mareta renigi na rahu, hanana ga hagabângenia, vi ngaira ka angitenigi, na tasi iata! 14Igê na Tangiana na Suriha Raha God ki page takuira ngavê na Ai i Taire ma i Sitone teharigamu igamu. 15Ma tangagamu, igamu na enoni i Kapenamu: vari igamu kamu obania, vi ga kasigamu akê? Hoi, ga page kasigamu so!”

16Ngaia ki vi tangara na kariana, ki vi: “Manga na enoni, ma ki têtê viteami igamu, ngaia ki tê viteaku nogaku. Manga na enoni, ma ki usitenigamu igamu, ngaia ki usiteniê nogaku; ma na anima na enoni, i usiteniê inê, ngaia ki usitenia nogana na ani nga, i hagatorangeniê.”

Ga aporo me na kariana tangahuru gi pi matarerua

17Na mane tangahuru gi pi matarerua ka aporo me, ma ka vagevage bâraha. Ngaira ka vi: “Araha, hoi, na ataro era nikâ ma ka tê viteamami, matena mi paira igê na raramohamu!” 18O Jesu ki aramira, ki vi: “Inê kê bâsia Satana, i vota so manga na marangea tenia na vavearo. 19Mu rongo! Inê kê bani hagatarêngenia tangagamu na ramoha, hanana mu girara, mu purira na ma ma na garagara pinihi. Ma na ramoha, gê bani vategamu, ki teharia na raramohana na Merongana God, ma ki asa nga vê ta na marâ, vi ge page erasigamu. 20I koro, kamu vagevage, renia vi na ataro era ka tê viteami; ma ki koro, kamu vagevage hete, renia vi igamu ka na kariana God.”

O Jesu ki obakoro

(Mt 11.25-27; 13.16-17)

21I na bevoana ngekana na Higona Apu ki hagakoro obana bâraha o Jesu. Mo Jesu ki vi: “Vaemaku, igo ki na Araha, i nahungigi na vavearo ma na ano. Inê kê visigo koro, renia go bani hagabâsira na enoni purua renigi na marâ, go bani pinihigi tenira na enoni raha, ga hagesuri. Vaemaku, i monari, igo ko katoa na tarana ngekê, suria go obania ma ko obakoro renia.

22“O Vaemaku ki bani hagatarêngenigi na ara ni marâ hato tangê. Mareha ta na enoni, ge girara, vi o ti ki no Karena, nga noga ma o Vaemana. Ma ki mareha ta na enoni, ge girara, vi o ti ki no Vaemana, nga noga ma o Karena ma na enoni, o Karena i obania, vi hagagirarara renia.”

23Ma hemuri o Jesu ki maatira na kariana, ma ki vi tangara ngaira getera, ki vi: “I koro teha ngavê tangagamu, mu bâsigi na marâ, mu bâsigi! 24Bâ, rako na poropete ma na maneraha, ga bani pasi bâsigi na marâ, mu bâsigi, ma ki mareha, ma ka bani pasi rongogi na marâ, mu rongogi, ma ki mareha.”

Na maramaraveta renia na mane koro ni Samaria

25Ma ta mane ni hagesuringa ni Rotu ki râ me ki uhungia o Jesu. Ngaia ki hagatea, ki vi: “Araha, na ta ki tuguhiê, ve katoa, hanana ve nahunia renia na mêriha mora ma tarema?” 26O Jesu ki aramia, ki vi: “Na ta kaniga bani visia igê na Buka Apuna? Na ta kanigo tomania igê?” 27Na mane ki arami, ki vi: “ ‘Go takuia na Araha God iamu i mêrihamu hagenani’, ma ‘Ko takuia na tamamu manga igo maremu.’” 28O Jesu ki arami, ki vi: “Go vi koro. Go katokato vikana ma hanana go page mauri.”

29Ma na mane ni hagesuringa ni Rotu obania, vi totorapusia marena. Tahema ngaia ki hagatea o Jesu, ki vi: “Ti ki na tamaku?” 30O Jesu ki arami, ki vi: “Ta na mane ki tavoraha tenia i Jerusaleme ki so tanga i Jeriko. Ma na manero ka ranguia, ma ka hanagogi na marâ iana, ka tahurua ma ka pania so, i bagamame. 31I na matena ngekana ta na mane ni vogasiha ki so suria na tara ngekana. Matena i bâsia na mane ngekana, ngaia ki râ hariri tenia. 32Ma ki tagenana ma na mane ni hagarahenga, ngaia ki râ me nogana i ngekana. Ngaia ki râ ki bâsia, ma ki râ hariri nogana tenia. 33Ma ta na mane ni Samaria, i râ nogana i tara i ngekana. Ngaia ki tarahua ma na matena i bâsia na mane ngekana, ngaia ki takuia teha ngavê. 34Ngaia ki râ tanga, ma ki ringigi na meresini na oile ma na vaini igê na maara, ma ki baraigi. Ma hemuri ngaia ki hagagâgasia igê na gerina na tonki iana marena, ma ki merâ tanga na ruma ni mahuara, ma ki marupea igê. 35Na tangiana i muri ngaia ki tavorerua na haga gi rua, ma ki vatea so na avanuna na ruma ni mahuara, ki vi, ‘Go marupea, ma ki manga i pe arari na haga, inê kê page urusi aporo tangago na haga, go kasi kê nikâ renia, matena gê rugurugu aporo me nikâ ikê.’”

36Matena o Jesu ki sihonga hato vikana, ngaia ki hagate, ki vi: “O ti na hitangita na vera oru ngegana kanigo takusia, vi katoa manga na tamana na mane, na manero ga nahuia?” 37Na mane ni hagesuringa ni Rotu ki arami, ki vi: “Ngaia ki no vani i takuia.” O Jesu ki arami, ki vi: “Go arâ ma ko katokato vikana.”

O Jesu ki vatugirerua ka Mata ma ka Maria

38Matena o Jesu ma na kariana ka uria na râha iata, ngaia ki ata i ta na hinua. I ngekana ki oga igê ta na gete, ga hêtana renia vi ka Mata. Ngaia ki unia banu o Jesu i pasina. 39Ka Maria kesina, ki oga so i pasina na Araha, ma ki karinga na hagesuringa iana. 40Ka Mata ki aruma, ma ki tako bâraha renia i hagamako ma renigi na ani getigi na tagaraha. Vikana ngaia ki râ me ma ki vi: “Araha, go takusia, vi i koro vari, kani kesiku i pe tamaniê igê tagaraha? Gu vi tanga, ke râ me ke tamaniê!” 41Na Araha ki aramia, ki vi: “E Mata! Igo ko tako bâraha ma ko barisurigi rako na marâ. 42Na ani gi tage ma na marâ kani arari. Ka Maria ki bani atea na tarana koro teha, ma ki asa, vi ge page tavoa tenia.”

Currently Selected:

LUKA 10: KCB

Highlight

Copy