HAGARAHENGA 25
25
Na pita na harisi, na harisi ni mamaroha
(Ramata 15.1-11)
1Na Araha ki tamasi tanga o Moise i hungana i Sinai ma ki bonasia, 2hanana i vatera na Isiraelita renigi na ramata igê. “Matena mu bêbanu igê na agua, na Araha i haganahunigamu renia, mu hagahigasia nga na Araha, hanana siana kamu tagarahigi na mu surigi na ara ni pita na harisi. 3Surigi na harisi ge ono mu hasihasi nga, mu uvegi na pariki na vaini iami, ma kamu totora ngêra. 4Ma na pita na harisi ka na na harisi ni mamaroha tanga na mako, na harisi mu hagapunaria tanga na Araha. Vikana siana kamu hasihasi, se vigamu uvegi na pariki na vaini iami. 5Na bani mu, mu pe hasigi ma ka akê mareni hete, siana kamu totora ngêra ma siana kamu husigi na guani na apinige na vaini, mu pe uvegi, suria ki na harisi ni mamaroha tanga na mako. 6Henaka mu pe tagara igê suria na harisi ngekana, na mako ki page vategi na ngêra tangagamu hato, igamu, na enoni vurivuri iami, na enoni tagara iami ma na mamahuara i berarogami, 7na togoha iami ma tangara na ani ga vasiga ga oga igê na mako iami. Na ngêra ga akê igê ki ararigamu vigamu ngaugi.
Na tangahuruta gi rima na harisi
8I murini na harisi gi pi hagepi, i vi i murina na 49 na harisi, 9igê na tangahuruta na tangiana igê na pita na hageha, na tangiana raha ni bonoteniha ni tasi, mu hagatorangenia na mane, hanana i uhia na ahuri suria na agua hagenani. 10Vikana igamu kamu hagapunaria na tangahuruta gi rima na harisi tanga na Araha, hanana mu rupasira aporo igê na enoni hato ga oga i pasimi. Suria na harisi ngekana na ara ni nahuninga hato, ga bani hagavuringenigi, ka aporo nga tangara na bani avanuni se tangara na raraha iata na avanuni, ma na ara ni kare vuruvuri mu rupasira, ka aporo i pasita. 11Siana kamu hasigi na mu iami se vigamu totora na koni ga akê mareni se vigamu husihusi na guani na apinige na vaini ga akê mareni mu pe uvegi. 12Na harisi hagenani ngekana ki apuna nga tangagamu. Mu ngaugi ma na ngêra ga akê mareni i mu.
13Suria na harisi ngekana na ara ni nahuninga hato, ga bani hagavuringenigi, ka aporo nga tangara na bani avanuni. 14Tahema, matena mu hagavuringenia na mako tanga na tamami na Isiraelita, se mu vuria na mako tenia, mu katoa nga igê na hekomaniha. 15Na mena na mako ki arâ surigi ma vi gi hita na harisi kaniga gâga mêngagi ma ki kahu mataro me na tangahuruta gi rima na harisi. 16Manga viga rakorako na harisi ga mêngagi, na mena na mako ki akê. Manga viga pe rakorako na harisi ga mêngagi, na mena na mako ki soso, suria na mena na mako ki arâ surigi na ngêra tenia na mako surigi na harisi ga mêngagi. 17Siana kamu hagabekasia na tamami na Isiraelita. Mu têtê hete viteana na Araha ma kamu hagahigasia, suria ngaia ka na Araha God iami.
Na hagatenga renia na pita na harisi
18Mu marupegi nga na ramata ma na bonasiha iana na Araha, hanana mu gâga suri parongami i pasimi. 19Na mako ki page vategamu re na ngauha. Igamu kamu page nahunigi rako ngavê na ngêra tanga mu ngaugi ma kamu page oga suri parongami.
20Ta na enoni vari ki hagate ki vivi: “Na ta kanimi ngaugi, suria na pita na harisi, matena mi pe hasigi na mu ma kami pe totora ngêra?” 21Na Araha ki page hagapua na mako igê na onota na harisi, hanana na ngêra igê ka rakorako ka ararirerua na harisi gi rua. 22Matena mu hasigi na mu iami igê na varuta na harisi, igamu kamu page ngaugi mênga na ngêra mu bani tora igê na onota na harisi, ma na ngêra ki page aharêsigamu mataro me kamu totora na ngêra mu hasihasi igê na varuta na harisi.
Na nahuninga ka aporo tangara na avanuni i nago
23Siana kamu hagavuringenigi ka arâ ngavê na mako iami, suria igamu kamu mareha vi na avanuni ma God hete. Igamu kamu mangara na mahuara. God ki nakagamu ma kamu tagara igê.
24Matena mu hagavuringenigi na mako, ki tâ tangagamu, vigamu vuria aporo, suria igamu ka na bani avanuna. 25Manga vi na Isiraelita i matareha ma ka tuguria, hanana i hagavuringenia na mako iana, na enoni i apena ki vuria aporo nga. 26Manga vi ngaia ma ki pe nahunia ta na enoni i apena, vari i hemuri ngaia ki page nahunigi na haga ga arari, hanana i vuria aporo ngaia marena. 27Vikana ngaia ki vatea nga na mane i vuria na mako tenia, renia na mena na mako i râ surigi ma vi gi hita na harisi ga gâga mêngagi ma ki kahu mataro me na tangahuruta gi rima na harisi, na mako ki atani aporo ma tanga igê. 28Manga vi ngaia ma ki pe nahunia na haga ge araria vige vuria aporo renia na mako, na mane i vuria na mako tenia, ki nahunia mênga mataro me na tangahuruta gi rima na harisi. Igê na harisi ngekana na mako ki atani aporo ma tanga na bani avanuna.
29Manga vi na mane ma ki hagavuringenia na ruma igê na hinua ga pararihia, ngaia ki tâ tanga vi vuria aporo suria na harisi gi tage igê na tangiana i hagavuringenia igê. 30Ma ki manga i pe vuria aporo i rarona na harisi gi tage, ngaia ki bara tanga vige vuria aporo, ma na ruma ki gâga nga tare tangara na mane i vuria ma na raraha iana, ma ki pe atani aporo ma igê na tangahuruta gi rima na harisi. 31Ma tangagi na ruma i hinua ga pe pararihigi, na ramata ka tâ tangagi mangagi na mako. Na bani avanuni ki tâ tangara viga vurigi aporo se ga hagaporosigi aporo igê na tangahuruta gi rima na harisi. 32Henaka, ma na raraha iana o Levi ki tâ tangara, viga vurigi aporo igê na anima na mateni na nahuninga iata igê na hinua raha iata. 33Manga vi ta na raraha iana o Levi ma ki hagavuringenia na ruma igê ta na hinua raha ngegana ma ki pe vuria aporo, na ruma ki atani aporo ma igê na tangahuruta gi rima na harisi, suria na ruma ga nahunigi na raraha iana o Levi ka na nahuninga hagahu iata mareta, mareha vi iata na Isiraelita getera. 34Nikâ na bena ni go rihigi na hinua raha iata na raraha iana o Levi, ki apu hagetage, vige hagavuringenigi. Ngaigi ka na nahuninga hagahu iata tare ki bê ki arâ.
Na kaune tangara na enoni ga matareha
35Manga vi ta na tamami na Isiraelita i matareha i berarogami ma ki bara tanga, igamu kamu tamania nga tagenana manga mu bâsuria na mane tagara iami, hanana ngaia ki ama ni gâga nga i berarogami. 36Siana kamu turia renia ta na marâ, ma kamu têtê viteana God hete, ma kamu naka na tamami na Isiraelita ngekana ki ama ni gâga nga i berarogami. 37Siana kamu turia renia na haga mu vatea renia se renigi na ngauha kamu hagavuringenigi tanga. 38Ngaia nga ka na ramata iana na Araha God iami, i bêngenigamu hura tenia i Esipito, hanana i haganahunigamu renia i Kanani ma ki God iami.
Rupasira na enoni vurivuri
39Manga vi ta na tamami na Isiraelita i berarogami ma ki hagavuringenia marena tangagamu ki kare vurivuri iami, suria vi ngaia ki matareha ngavê, siana kamu hagatagarahia manga na kare vurivuri. 40Ngaia ki gâga nga henigamu manga na mane tagara ma ki tagara tangagamu mataro me na tangahuruta gi rima na harisi. 41Igê na harisi ngekana ngaia ma na karena ka page arâ panigamu ma ka aporo i pasita ma tangagi na nahuninga iata tenira na êvarita. 42Na Isiraelita ka na enoni vurivuri iana na Araha. Ngaia ki bêngenira hura tenia i Esipito. Tahema ki apu vige hagavuringenira ke kare vurivuri. 43Siana kamu bagaramonira ma kamu têtê viteana God hete. 44Manga vigamu obanira na kare vurivuri, ki ararigamu ma vigamu vurira igê na agua iata na mahuara. 45I ararigamu nikâ, vigamu vurira na kareta na mahuara i berarogami. Na kare vigana ga vora i pasimi, ki ararira viga kare vurivuri iami, 46ma igamu kamu girara mu hagatarêngenira tangara o karemi, hanana ga tagara tangara mataro me ka meme, ma siana kamu bagaramonia ta na tamami na Isiraelita.
47Manga vi na mahuara i berarogami ma ki ruruguha ma ta na tamami na Isiraelita ki matareha ma ki hagavuringenia marena ki kare vurivuri iana na mahuara ngekana se iana na hitangita na ahemata iana, 48ngaia ki tâ tanga viga vuria aporo. Na hitangita o veogana se o vesina, 49se o mona se o veogana se o vesina tonge, se na anima na enoni i apena ki girara i vuria aporo. Se manga vi ngaia marena ma ki nahunigi na haga ga arari, ngaia ki girara i vatea re na avanuna, hanana i asitatara tenia vige kare vurivuri. 50Ngaia ma na mane i vuria, karu hekarigi nga ma karu tomanigi nga vi gi hita na harisi kaniga mêngagi mataro me na tangahuruta gi rima na harisi, haganega tenia na tangiana i hagavuringenia marena igê. Na mena tanga i aharupa aporo ki arâ suria na vuriha iana na mane tagara. 51-52Na mena ki arâ surigi na harisi ga mamêngagi. Manga viga rakorako na harisi na mena ki akê, ma ki manga ga pe rakorako na harisi na mena ki soso, 53suria na vuriha iana na mane tagara i rarona na harisi gi tage. Siana na avanuna ki bagaramonia manga na kare vurivuri ma manga hete na mane tagara. 54Manga vi pe asitatara tenia vige kare vurivuri, ngaia ma na karena ka atani asitatara râ nga igê na tangahuruta gi rima na harisi. 55Na Isiraelita ki asa vige kare vurivuri hagahu iana ta na enoni, suria na Isiraelita ka na kare vurivuri iana na Araha. Ngaia nga kani bêngenira hura tenia i Esipito. Ngaia nga ka na Araha God iata.”
Currently Selected:
HAGARAHENGA 25: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
