HAGARAHENGA 13
13
Na ramata renigi na mera ni gavona apena na enoni
1Na Araha ki vatererua o Moise mo Aroni renigi na ramata igê. 2Manga vi na enoni ma ki nahunia na guguha se na agua i harahara se i siki i gavona apena, i girara i voravora re vari na mera era i gavona apena, ka merâ nga tanga na mane ni vogasiha tenia na raraha iana o Aroni. 3Na mane ni vogasiha ki hahariria nga na mera iana na enoni ngekana, ma ki manga na varehu igê ma ka siki ma na agua i harahara ki so i ruguhana na gavona, hoi, na agua ngekana ka na mera era ni gavona apena, ma na mane ni vogasiha ki visia nga, vi na enoni ngekana ki pe matarotaro suria na ramata. 4Manga vi na agua i harahara ma ki siki ma ki bâ manga i pe so i ruguhana na gavona ma na varehu igê ka pe siki, hoi, na mane ni vogasiha ki kasia ki gâga hariri nga tenira na enoni surigi na tangiani gi pi. 5Na mane ni vogasiha ki hahariria nga nikâ igê na pita na tangiana. Ma ki manga i takusia vi na agua i harahara ki bâbâ tagenana ma manga i nago ma ki mareha vige amani raharaha nga ke arâ, hoi, na mane ni vogasiha ki kasia nga ki gâga hariri nikâ surigi na tangiani gi pi. 6Na mane ni vogasiha ki hahariria nga nikâ igê na pita na tangiana. Manga i pe siki bâraha manga i nago ma ki pe amani raharaha nga ke arâ, hoi, na mane ni vogasiha ki visia nga, vi na enoni ngekana ki matarotaro, suria ngaia ki na agua i harahara ma. Na enoni ngekana ki tananigi nga na gahu iana ma ki kahu matarotaro aporo. 7Manga vi na agua i harahara ma ki raharaha ki arâ i murina na mane ni vogasiha i hahariria ma ki visia na enoni ngekana vi matarotaro, hoi, ngaia ki arâ nga tanga na mane ni vogasiha. 8Na mane ni vogasiha ki hahariria nga nikâ, ma ki manga i amani raharaha nga ki arâ, ngaia ki visia nga na enoni ngekana vi pe matarotaro, suria ngaia ki na mera ni gavona apena i era ngavê.
9Manga vi na enoni ma ki nahunia na mera ni gavona apena i era ngavê, ka merâ nga tanga na mane ni vogasiha, 10hanana i hahariria. Manga vi na agua i harahara i gavona apena ma ki siki ma na varehu igê ka siki ma ki vunu renigi na naana, 11ngaia ka na mera era i bani oga me. Na mane ni vogasiha ki visia nga, vi na enoni ngekana ki pe matarotaro ma ki mareha vige kasia ke gâga hariri, suria na enoni, matena ga bâsia, ngaira ka girara ototo râ, vi ngaia ki pe matarotaro. 12Manga vi na mera ngekana ma ki amani raharaha nga ki arâ ma ki gahuia na apena hagenani, haganega i bêna ki vato, 13na mane ni vogasiha ki hahariria nga nikâ. Manga i tarahua, vi na mera ngekana ma ki gahuia hagenani na apena, na mane ni vogasiha ki visia nga, vi na enoni ngekana ki matarotaro, suria na apena hagenani ki siki. Tahema ngaia ki matarotaro. 14Ma ngaia ki pe matarotaro igê na matena i raboa igê na agua i harahara. 15Na mane ni vogasiha ki hahariria nga nikâ, ma ki manga i tarahua vi na agua i harahara ngekana ki bani raboa, hoi, ngaia ki visia nga, vi na enoni ngekana ki pe matarotaro. Manga vi na agua i harahara ngekana ma ki bani raboa, ngaia ka na mera era ngavê igê na gavona apena, ma na enoni ngekana ki pe matarotaro. 16Manga vi na agua i harahara ngekana, ki bani raboa ma ki mavo ma ki siki aporo, na enoni ngekana ki arâ nga tanga na mane ni vogasiha, 17hanana i hahariria nikâ. Manga vi na agua i harahara ngekana ma ki siki aporo, na enoni ngekana ki matarotaro, ma na mane ni vogasiha ki visia nga vi ngaia ki matarotaro.
18Manga vi na enoni ma ki mavo aporo na agua i harahara, 19ma i murina me na agua i harahara ngekana ki siki se i siki memera ngaia usuraro igê na agua i bani raboa ki mavo, ngaia ki arâ nga tanga na mane ni vogasiha. 20Na mane ni vogasiha ki hahariria nga, ma ki manga na agua i siki ngekana ma ki so i ruguhana na gavona apena ma na varehu igê ka siki, hoi, ngaia ki visia nga, vi na enoni ngekana ki pe matarotaro, suria ngaia ki na mera i era ngavê i usuraro igê na agua i bani sugu ki mavo. 21Manga vi na mane ni vogasiha ma ki hahariria ma ki tarahua, vi na varehu igê ka pe siki ma na mera ngekana ki pe so i ruguhana na gavona apena ma ki pe siki manga i nago, hoi, ngaia ki kasia nga ki gâga hariri tenira na enoni surigi na tangiani gi pi. 22Manga vi na mera ngekana ma ki amani raharaha nga ki arâ, na mane ni vogasiha ki visia nga, vi na enoni ngekana ki pe matarotaro, suria na mera ki tarahua. 23Manga vi na agua ngekana ma ki pe totora getea ma ki pe amani raharaha nga ke arâ, ngaia ki na orena ma na agua i sugu i nago, ma na mane ni vogasiha ki visia nga, vi na enoni ngekana ki pe matarotaro suria na ramata.
24Manga vi na enoni ma ki nonoro ma ki na agua i abagoragora, ki siki se siki memera, 25na manne ni vogasiha ki hahariria nga. Manga vi na varehu igê ka siki ma na mera ki so i ruguhana na gavona apena, ngaia ka na mera i era ngavê igê na gavona apena, i haganega igê na agua i noro. Vikana na mane ni vogasiha ki visia nga, vi na enoni ngekana ki pe matarotaro. 26Manga vi na varehu igê ma ka pe siki ma na mera ki pe so i ruguhana na gavona apena, ma na agua ngekana ki pe siki manga i nago, hoi, na mane ni vogasiha ki kasia nga na enoni ngekana ki gâga hariri tenira na enoni surigi na tangiani gi pi. 27Na mane ni vogasiha ki hahariria nga nikâ igê na pita na tangiana, ma ki manga vi na mera ma ki amani raharaha nga ki arâ, ngaia nga ka na mera i era ngavê. Vikana na mane ni vogasiha ki visia nga vi na enoni ngekana ki pe matarotaro. 28Ma ki manga vi na mera ngekana ma ki tagenana ma manga i nago ma ki pe raha ke arâ ma ki pe siki manga i nago, ngaia ki mareha vi na mera era. Vikana na mane ni vogasiha ki visia nga, vi na enoni ngekana ki matarotaro, suria ngaia ki na orena ma na agua i noro.
29Manga vi na mane se na gete ma ki nahunia na agua i harahara igê na bêna se igê na paratena, 30na mane ni vogasiha ki hahariria nga. Manga vi na mera ngekana ma ki bâ manga i soso i ruguhana na gavona apena ma na varehu igê ka hereherega ma ka pe rako igê, ngaia nga ka na mera era ni gavona apena. Vikana na mane ni vogasiha ki visia nga, vi na enoni ngekana ki pe matarotaro. 31Manga vi na mera ngekana ma ki bâ manga i pe soso i ruguhana na gavona apena, matena na mane ni vogasiha ki hahariria, ma na varehu igê ka pe bâ manga hanani, ngaia ki kasia nga ki gâga hariri tenira na enoni surigi na tangiani gi pi. 32Na mane ni vogasiha ki hahariria nga nikâ igê na pita na tangiana. Manga vi na mera ma ki pe amani raharaha nga ke arâ ma na varehu igê ka pe hereherega ma na mera ki pe bâ manga vige i ruguhana na gavona apena, 33na enoni ngekana ki gorogoro nga na varehu rihia na agua i harahara. Na mane ni vogasiha ki kasia nga ki gâga hariri tenira na enoni surigi na tangiani gi pi nikâ. 34Na mane ni vogasiha ki hahariria nga nikâ igê na pita na tangiana. Manga vi na mera ma ki pe amani raharaha nga ke arâ ma ki mareha vige soso i ruguhana na gavona apena, ngaia ki visia nga vi na enoni ngekana ki matarotaro. Na enoni ngekana ki tananigi nga na gahu iana ma ngaia ki kahu matarotaro aporo. 35Manga vi na mera ma ki amani raharaha nga ki arâ i murina na mane ni vogasiha i bani visia vi na enoni ngekana ki matarotaro, 36hoi, na mane ni vogasiha ki hahariria nga nikâ. Manga vi na mera ngekana ma ki amani raharaha nga ki arâ, ngaia ki pe arari vige bâbâ renigi na varehu vi ga hereherega se mareha, suria na enoni ka bâsia ototo râ vi ngaia ki pe matarotaro. 37Ma ki manga na mane ni vogasiha ma ki takusia vi na mera ngekana ki pe amani pe raharaha nga ke arâ ma na varehu igê ka bâ manga bani hanani, na mera ngekana ki mavo, ma na mane ni vogasiha ki visia nga, vi na enoni ngekana ki matarotaro.
38Manga vi na mane se na gete ma ki nahunigi na agua ga siki igê gavona apena, 39na mane ni vogasiha ki hahariria nga. Manga vi na agua ngegana ma ka pe siki bâraha, ngaigi ka na marâ purua ma igê na gavona apena. Na enoni ngekana ki matarotaro.
40-41Manga vi na mane ma ki anunu na varehu i muri bêna se i raena, na tarana ngekana ki pe katoa na mane ke pe matarotaro. 42Manga vi na mera i siki memera ma ki voravora igê na agua ni hare, ngaia ka na mera era ni gavona apena. 43Na mane ni vogasiha ki hahariria nga. Manga vi ngaia ka na mera i siki memera monari, 44na mane ni vogasiha ki visia nga vi na enoni ngekana ki pe matarotaro, suria i nahunia na mera era ngekana i bêna.
45Na enoni, i nahunia na mera era ni gavona apena, ngaia ki gahugahu tatari nga. Siana ki surasura bê. Ngaia ki hugusia nga na gahu pusirerua na barisuna ma na harana ma ki ngerengere nga, ki vivi, “Pematarotaro! Pematarotaro!” 46Ngaia ki ama ni pe matarotaro nga mataro me ki hatohato na mera tenia ma ki gâga tarege râ nga tenia tênga ma tenira na enoni.
Renigi na tongo ga raharaha ka arâ igê na marâ
47Manga vi na tongo i raharaha ki arâ ma ki goga igê na tuguni siki se igê na gahu na varehuta na sipi 48se igê na anima na tuguni siki se na gahu na varehuta na sipi, se igê na gavona na ganiana se igê na anima na marâ na gavota na ganiani, 49ma ki maravarava se i memera, hoi, ngaia ka na tongo i raharaha ki arâ ma ka hagabâsia nga na mane ni vogasiha renia. 50Na mane ni vogasiha ki hahariria nga ma ki naka ki gâga tarege râ surigi na tangiani gi pi. 51Ngaia ki hahariria nga nikâ igê na pita na tangiana. Manga vi na tongo ngekana ma ki ama ni raharaha nga ki arâ, na marâ i oga igê na tongo ngekana, ki pe matarotaro. 52Na mane ni vogasiha ki sungia nga, suria ngaia ki na tongo i raharaha ki arâ ma ki makaka nga igê na gi.
53Manga vi na mane ni vogasiha ma ki hahariria ma ki tarahua vi na tongo ngekana ki pe raha ke arâ igê na marâ i oga igê, 54ngaia ki haribona nga, ka tanania na marâ ngekana ma ka naka râ ki tâtâ tarege râ surigi na tangiani gi pi nikâ. 55Igê na pita na tangiana ngaia ki hahariria nga nikâ. Manga vi na tongo ma ki bâbâ tagenana ma manga i nago, henaka vi pe raharaha kê arâ, ma na marâ i oga igê na tongo ngekana, ki pe matarotaro. Ga sungia nga, henaka vi na tongo ma ki oga i na apanena akê se i na murina so.
56Manga vi na mane ni vogasiha ki hahariria nikâ ma ki tarahua, vi na tongo ma ki kere bâ vê, ngaia ki retea râ nga tenia na gahu se tenia na marâ na gavona na ganiana. 57Manga vi na tongo ma ki akê me aporo nikâ ma ki raharaha ki arâ, na avanuna na marâ, i oga igê na tongo ngekana, ki sungia nga. 58Manga vi ngaia ma ki tanania na marâ ngekana ma na tongo ki magahuru, ngaia ki tanania nikâ ma ki kahu matarotaro aporo. 59Ngaia nga ka na ramata renia na tongo i akê me igê na tuguni siki se igê na gahu na varehuta na sipi se igê na anima na marâ na gavota na ganiani.
Currently Selected:
HAGARAHENGA 13: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
