JOSUA 8
8
Na Isiraelita ka henahuraua na hinua i Ai
1Na Araha ki vi tanga o Josua, ki vi: “Gu meratagere na mane ni me hato iamu tanga i Ai. Siana ko magu. Go ramoramo hete. Inê kê katogo, ko teharia na maneraha i Ai. Igo ko page nahunira na kariana, na hinua iana ma na mako iana. 2Go katoa tanga i Ai ma tanga na maneraha igê na tarana go bani katoa noga tanga i Jeriko ma tanga na maneraha igê. Ma i ngeke ki ararigamu ma, vigamu nahunira na togoha ma na nahuniga iata. Mu nanê, hanana mu gamorahia ma kamu taharia na murina na hinua.”
3Hoita, o Josua ki hagananêra na mane ni me hato iana, hanana viga arâ tanga i Ai. Ngaia ki atera na 30, 000 na mane ni me ramo iana. Ngaia ki hagatorangenira, ka râ igê na bungiana. 4Ngaia ki bonasira, ki vi: “Mu ahiahi i murina na hinua. Mu ngahisia râ nga. Mu nanê kamu taharia. 5Inê ma tani kami page guruguru hagarangia na hinua. Matena na mane ni me i Ai ka huhura me ka megamiheariha, hoi, igami kami gavagava bê aporo manga i nago. 6Ngaira ka page tarigenigami. Vikana igami kami hagatarera tenia na hinua. Ngaira ka page vivi ma, vi igami gavatenira manga i nago. 7Hoi, ma igamu rêra mave me ma kamu henahuraua na hinua. Na Araha God iami ki page tagarenia na hinua ngekana tangagamu. 8Matena mu henahuraua hato, mu susu hagamakaka manga i bani bonasigamu na Araha. Mu arâ suria vikana!” 9Hoi, o Josua ki hagatorangenira ka râ. Ngaira ka râ tanga na agua, hanana viga ahiahi igê, ma ka oga ma i ngekana, kereso i Ai, i berarogaterua i Ai me Betele. O Josua ki mêru so igê na tênga.
10Igê na mahogotana i tangi me, o Josua ki rite ma ki hagahakura na mane ni me. Hemuri ngaia ma na enoni raha iata na Isiraelita ka bêngenira tanga i Ai. 11O Josua ma na mane ni me iana ka oto râ tanga na maana na maani para na hinua. Ngaira ka tênga igê na apanena i tatara, hanana vi na me i hinua ka bâsira me. Na maruguna ki oga i berarogaterua na tênga ma i hinua i Ai. 12O Josua ki merarâ na rehagaro gi rima na mane ni me, ma ki kasira ka ahi i na apanena so na hinua i berarogaterua i Ai me Betele. 13Na mane ni me ka nanê ni hearihatana. Na apanena raha na mane ni me ka tênga i maana na hinua, ma ta na hitangita ka oga i na apanena bêso na hinua. O Josua ki mêru so igê na maruguna. 14Matena na maneraha ni Ai ki bâsira na mane ni me iana o Josua, ngaia ki pe hagarihu. Ngaia ma na mane ni me hato iana ka hatani hura tenia na hinua ma ka râ tanga na maruguna i Jotano, hanana ga meraheariha na Isiraelita igê na agua, ga bani meraheariha noga igê i nago. Ngaira ka pe hagare rârâ, vi na Isiraelita ka gamorahira me i murina na hinua. 15O Josua ma na mane ni me iana ka hagaparu, viga gava. Ngaira ka gava tanga na masusu. 16Na maneraha i hinua ki hagahakura na mane ni me hato iana, hanana viga tarigenira. Matena ga tarigenia o Josua, ngaira ka ama ni arâ hagatê nga tenia na hinua. 17Na ara ni mane ni me hato i Ai ka tarigenira na Isiraelita. Ma na hinua ki baguru renira na mane ni me igê, ma ki mataku ma viga henahuraua.
18Hoi, na Araha ki vi tanga o Josua, ki vi: “Gu usia i Ai renia na ora iamu. Inê kê tagarenia na hinua tangago.” O Josua ki kato vikana. 19Ma pusina ma o Josua ki tagarenia akê na rimana, ma na mane ni me ga ahi ka heasesi, ka tango banu i hinua ma ka henahuraua. Ngaira ka sungia ototo râ nga na hinua. 20Matena na mane ni me ni Ai ka sira aporo, ngaira ka bâsia na asêsuna na gi, i akê i vavearo. Vikana ki bara tangara, vige hura i he, suria na Isiraelita ga gava tanga na masusu, ka arigu aporo ka meraheariha. 21Matena o Josua ma na mane ni me iana ka bâsira na tamata ga bani henahuraua na hinua ma ka bani sungia, ngaira ka ahoro aporo ma ka nahuira ka me na mane ni me ni Ai. 22Na Isiraelita ga henahuraua na hinua ngekana, ngaira ka vato ka tamanira na tamata igê na hearihatana. Vikana na mane ni me ni Ai ka tahetara, vi na Isiraelita ka rihuira ki taku. Na Isiraelita ka mutera ngavê. I mareha rârâ tani vige tahi. I asa rârâ tani vige hita so, 23nga noga ma na maneraha i Ai. Ngaira ka ranguia ma ka merâ tanga o Josua.
24Na Isiraelita ka nahuhunira hato na merongata igê na masusu, i na agua ga tarigenira igê. Hemuri ngaira ka aporo i Ai ma ka mutera hato na enoni igê. 25-26O Josua ki ama ni usia nga i Ai renia na ora iana. Ngaia ki usia rârâ mataro me ka me na enoni hato igê. Na enoni hato i Ai ka me igê na tangiana ngekana. Ngaira hato ka vora na 12, 000, na mane ma na gete. 27Na Isiraelita ka nahunira na togoha ma na nahuninga, ga henahuraugi i ngekana, manga i bani visia na Araha tanga o Josua. 28O Josua ki su hagamakaka i Ai. I Ai ki aruhuruhu mataro me i ngekê. 29Ngaia ki riguia na maneraha i Ai igê na apinige. Ngaia ki naka vê na gahuana ki kuku rârâ ma ki su noga na arito. Matena i su noga na arito, o Josua ki bonasira na me iana, ka torea vê na gahuana ma ka kasia vato igê na maana na maani para ni hinua. Ngaira ka uria renigi na hê raha era, ga tâtâ mêngagi mataro me i ngekê.
O Josua ki tomanigi na ramata iana God tangara na Isiraelita
30Hoi, o Josua ki tagarahia na panga na bea ni vogasiha tanga na Araha God iata na Isiraelita i hungana i Ebale. 31Ngaia ki tagarahia surigi na tamasinga, o Moise na kariana koro na Araha ki bani vatera renigi na Isiraelita. Suria na ramata iana o Moise ki vi, “Tagarahia renigi na hê na panga na bea ni vogasiha, ga pe tahegi renigi na aiani.” Ngaira ka susu igê tanga na Araha ma ka vogasia renigi na ngauha, ga ngê haku renigi. 32I ngekana nikâ i maata na Isiraelita o Josua ki sege surigi na ramata iana o Moise igê na hê. 33Na Isiraelita, na enoni raha iata, na araha iata na mane ni me ma na mane ni hagaotonga henira na mahuara i berarogata, ngaira ka ura hetangenia na bokesi na suruheri iana na Araha. Ngaira ka maatira na mane ni hagarahenga ga tugia na bokesi na suruheri. Tapaneni nuni ka ura murisigea na hungana i Gerisimi ma tapaneni nuni ka ura murisigea na hungana i Ebale. O Moise na kariana koro na Araha kani bani bonasira ka ura vikana, hanana vi na mane ni hagarahenga ke nungia God ke tamanira. 34Hemuri o Josua ki tomanigi mave na ramata hato henigi na koroha tenia God tangara na ani ga marupegi, ma na hagaitangiha tangara na ani ga aharêngigi, manga ga bani oga igê na buka na ramata. 35O Josua ki tomanigi na ara ni ramata hato iana o Moise tangara na Isiraelita hato henira na gete, na kare ma na mahuara ga oga i berarogata.
Currently Selected:
JOSUA 8: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
