JOSUA 3
3
Na Isiraelita ka tarêhia na ve i Jotano
1Ki tangi me, ma o Josua ma na Isiraelita hato ka bani rite, ka hagarurugu tenia na tênga i Sitimi ma ka râ tanga i Jotano. Ngaira ka tênga i ngekana mataro me na matena ga tarê igê. 2Ngaira ka oga i ngekana surigi na tangiani gi oru, matena na enoni raha iata ka râhia na tênga, 3ma ka vi tangara na enoni, ka vi: “Matena mu bâsira na mane ni hagarahenga ga tugia na bokesi na suruheri iana na Araha God iami, mu hagarurugu tenia na tênga ma kamu mumurira. 4Ngaira ka page hagabâsigamu renia na tara, suria igamu kamu kahu râ me ikê. Siana kamu purupuru i murina na bokesi na suruheri. Mu kasikasi bevoa na kilomita gi tage.”
5O Josua ki bonasira na enoni, ki vi: “Mu hagamatarotarogamu maremi, suria i gomaha na Araha ki page katogi na mena i berarogami.” 6Ma hemuri ngaia ki vi tangara na mane ni hagarahenga, ka tugia na bokesi na suruheri ma ka nanago tarata na enoni. Ngaira ka kato vikana.
7Na Araha ki vi tanga o Josua, ki vi: “Na tarana gê page katoa i ngekê, ngaia ki page katora na Isiraelita hato, ka hagahigasigo, vi igo ka na maneraha iata. Ngaira ka page tahetara, vi inê kê ngahisigo manga gê bani ngahisia o Moise. 8Go bonasira na mane ni hagarahenga, ga tugia na bokesi na suruheri, vi matena ga mataro râ i ve i Jotano, ki tuguhira, viga soso igê ma ka rêra hagarangia na akerena.”
9Hoi, o Josua ki vi tangara na enoni, ki vi: “Râ me kamu karinga na tamasinga iana na Araha God iami. 10Ngaia ki page tarigenira hura na Kananita, na Hitita, na Givita, na Perisita, na Girigasita, na Amorita ma na Jebusita tarami. Igamu kamu page tahetara, vi God Mamauri ki ngahisigamu, 11matena i nanago tarami ki tarêhia i Jotano na bokesi na suruheri iana na Araha, i marungia na maveta haganani. 12Hoi, mu atera na mane tangahuru matarerua tenira na varo ninuni hegitigi iana o Isiraele. 13Matena na mane ni hagarahenga, ga tugia na bokesi na suruheri iana na Araha i marungia na maveta hagenani, ka pupu so i ve i Jotano, na ve ki page hato vige ogogo. Na ve i arâ me ki birobiro susu ma i na agua gi tage.”
14Na enoni ka pania na tênga, hanana ga tarêhia na ve i Jotano. Na mane ni hagarahenga, ga tugia na bokesi na suruheri, ka nanago tarata. 15Ngaia ki na matena ni hagahisi. Na ara ni matena vikana na ve i Jotano ki maganu. Pusina ma na mane ni hagarahenga ka pu so i ve, 16na ve ki kahu hato vige ogogo. Na ve ki râ me ki biro susu i hinua i Atame na hinua hagarangia i Saretane. Na ve ki ogogo ki so tanga na Asime, ki ruka ngavê. Vikana na enoni ki kahu mataku tangara ka tarêhia i Jotano tanga i Jeriko. 17Matena na enoni ka râ igê na agua i mamata ka tarê, na mane ni hagarahenga, ga tugia na bokesi na suruheri, ka ura igê na agua i mamata i gupuna na ve i Jotano, mataro me na enoni ka pane tarê hato.
Currently Selected:
JOSUA 3: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific