JOSUA 13
13
Na agua ga mamênga vige parênigi
1O Josua ki kahu merahaga ngavê. Na Araha ki vi tanga, ki vi: “Igo ko merahaga ngavê ma ka rako mêngagi na agua ga page parênigi. 2Ngaigi kani igê: i Pilisita hagenani, i Gesure haganani 3ma i Avimi hagenani, i haganega igê na kere ve i Sigore igê na pereperegana i Esipito ma ki râ ki tariha i Ekerone. Ngaia kani ta apanena i Kanani. Na maneraha i Pilisitia ka nahunigi hehegitigi na hinua igê: i Gasa, i Asetote, i Asekelone, i Gata me Ekerone. 4Nikâ i Kanani hagenani ki mamênga: haganega i Ara na hinua iata na ai ni Sitone, ki râ ki tariha i Apeke igê na perperegana na apanena iata na Amorita: 5nikâ na agua iata na Gibilita; na apanenana bêkê hagenani i Libanone, haganega i Balagata igê na taritarihana na hungana i Heremone ki râ ki tariha igê na teha i Hamata: 6nikâ na apanena hagenani iata na ai ni Sitone, ga ogasia na agua huhunganiga i Libanone ki râ ki tariha i Misirepote Maimi. Inê be taringenira hura na enoni hato ngegana, matena na Isiraelita ga gâga parera. Go votogi nga na agua ngegana tonganira na Isiraelita, manga gê bonasigo renia. 7Hoita, go votogi nga na agua ngegana tonganira na varo ninuni gi siva hehegitigi ma ta apanena na varo ninuni iana o Manase, hanana ga nahunigi hagahu.”
Na apanena bêkê na ve i Jotano
8O Moise na kariana na Araha ki bani haganahunira na varo ninuni iaterua hegetigi o Rubeni mo Gata ma ta apanena na varo ninuni iana o Manase renia na agua i na apanena bêkê na ve i Jotano. 9Na agua iata ki manga ikê: i haganega i Aroere i na akerena na maruguna i Aranone henia na hinua raha igê, na bena hagenani igê na hungana i Meteba ki râ ki tariha i Tibone; 10na hinua hato i marungigi o Sigone na maneraha iata na Amorita i oga i Gesebone, ki râ ki tariha igê na pereperegana i Amone; 11nikâ i Gileata; na agua tonganirerua i Gesure me Maka; na hungana i Heremone hagenani; i Basani hagenani ki râ ki tariha i Salaka; 12nikâ na agua hagenani iana o Ogo na maneraha i Basani, i nahunirerua na ruma raha gi rua: tani i Asatarote ma tani i Eterei. Ngaia ka na hagahatungina na varo ninuni iata na Repaimi. O Moise ki bani teharira na enoni hato ngegana ma ki bani ogasugarira. 13Na Isiraelita ka pe tarigenira hura na ai ni Gesure me Maka. Ngaira ka gâga mênga mataro me i ngekê akê.
14Na varo ninuni iana o Levi ka pe nahunia rârâ na mako, suria o Moise ki pe vatera renia, ma ngaira ka page nahunigi ma hete na apaneta na vogasiha tanga na Araha God iata na Isiraelita, manga na Araha i bani bonasia vikana o Moise.
Na agua iana na varo ninuni iana o Rubeni
15O Moise ki bani haganahunira na hagosi ninuni tenia na varo ninuni iana o Rubeni renia na agua tangara. 16Na agua iata ki haganega i Aroere i na akerena na maruguna na ve i Aranone henia na hinua i gupu igê ma henia na bena hagenani i Meteba igê na hungani; 17-20henigi i Gesebone ma na hinua hato igê na bena ngekana: i Tibone, i Bamote Bala, i Bete Balameone, i Jasa, i Ketemote, i Mepata, i Kiriataimi, i Sibima, i Serete Hasagare igê na hungana igê na maruguna, i Betepeore, na taritarihani na hungana i Pisiga ma i Bete Haiesimote. 21Ngaia ki vi, vi na hinua hato igê na bena ngekana ma na apanena hagenani, o Sigone na maneraha iata na Amorita i bani marungia i nago. Na ruma raha iana ki oga i Gesebone. O Moise ki meraheariha ma ki teharira ngaia ma na maneraha ga oga i ruguhana na maneraha o Sigone: o Evi, o Rekeme, o Sure, o Gure mo Reba. 22I bererogata na ani na Isiraelita ga mutera, ka no Bileama karena o Beore. Ngaia ka na mane ni girarasiha. 23Na pereperegana bêso na agua iana na varo ninuni iana o Rubeni ka na ve i Jotano. Ngaigi ka na hinua, na ani raha ma na ani sisite, o Moise i bani haganahunia na varo ninuni iana o Rubeni renigi.
Na agua iana na varo ninuni iana o Gata
24O Moise ki bani haganahunira na hagosi ninuni tenia na varo ninuni iana o Gata renia na agua tangara. 25Na apanena iata kani i Jasere, na hinua hato i Gileata, na apanena i Amone ki râ ki tariha i Aroere i na apanena bêkê i Raba. 26Na apanena iata ki haganega i Gesebone tanga i Ramata Hamisipe me Betonimi, ma tenia i Maganaimi tanga na pereperegana i Litibire. 27Henigi na hinua igê na maruguna na ve i Jotano: i Bete Harama, i Betenimira, i Sukote me Sapone, ma ta apanena na agua i marungia i nago o Sigone na maneraha i oga i Gesebone. Na pereperegana bêso na apanena iata ka na ve i Jotano ki tariha igê na rano i Galilea. 28Ngaigi nga ka na hinua, na ani raha ma na ani sisite, o Moise i bani haganahunira na hagosi ninuni tenia na varo ninuni iana o Gata renigi.
Na agua iana na varo ninuni iana o Manase i oga i na apanena bêkê i Jotano
29O Moise ki bani haganahunira na hagosi ninuni tenia na apapana na varo ninuni iana Manase renia na agua iata. 30Na apanena iata ki râ ki tariha i Maganaimi henia i Basani hagenani, na maneraha o Ogo i bani marungia i nago, ma henigi na 60 na hinua i Jairi i Basani; 31henia ta apanena i Gileata henirerua na hinua raha i Asatarote me Eterei, garu oga igê na ruma raha iana o Ogo na maneraha i Basani. Na agua ngekana o Moise ki bani haganahunia na apapana na hagosi ninuni na raraha iana o Makire karena o Manase renia.
32Ngaia nga hanana o Moise i voasia na agua i na apenaterua bêkê i Jeriko me Jotano, matena i oga igê na bena i Moaba. 33O Moise ki pe haganahunia rârâ na varo ninuni iana o Levi renia ta agua. Ngaia ki vi tangara, vi na nahuninga iata ka na apaneni na votovoto, na Isiraelita ga tagarenigi tanga na Araha God iata.
Currently Selected:
JOSUA 13: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
