JEREMIA 6
6
Na meronga ka oga rihia i Jerusaleme
1Raraha iana o Benamino,
mu gava tanga na manavami!
Mu gava pania i Jerusaleme!
Mu uhigi na ahuri i Tekoa.
Mu tanga na gi ni hagararinga i Bete Hagereme.
Na eraha, i page erasigi na ara ni marâ hato,
ki sugi râ me tenia i Babilonia.
2Na hinua i Sione, i bâkoro ngavê,
ngaia ki page aruhuruhu.
3Na maneraha henira na kariata
ka page taunga ngekana.
Sione ki manga na bena ni go koro era.
Na avanu ni sipi ka torera me igê na sipi iata.
Ngaira ka page tagarahigi tonganira
na ruma ni gahu iata rihia na hinua.
4Ngaira ka page vivi:
“Nanê! Ke taharia Jerusaleme!
Nanê! Ke taharia igê na ritovagana!”
Ma hemuri ka vivi:
“E, i bani teha na matena.
Na tangiana ki sugi hato.
Bâ, i borahu na mamaruganiha.
5Nanê! Ke taharia igê na bungiana.
Ke ruhuruhugi na ruma nganganihaga igê!”
6Ngaira ka tamasi vigana,
suria na Araha raramohaga hunia ki bani vi:
“Tapigi so na apinige.
Rapia i Jerusaleme, hanana ga raua.
Inê be hagaitangia na hinua ngekana,
suria i aharêsia na hagamamasiaganiha.
7Na bagatarihata na ai ni Jerusaleme
ki manga na ve banga, i ama ni gogogo nga.
I ngekana inê ke rongogi ma igê
na hearihatana ma na hagamamasiaganiha.
I ngekana inê kê bâsigi ma igê
na maeha, na maara ma na mera.
8Jerusaleme, inê kê haganunugamu,
hanana vigamu aitangi.
I era ma kê kasikasi renigamu
ma kê ruhuruhua na hinua iami,
ki manihêga ma ki hihiruga.”
Na Isiraelita ka guguruga
9Na Araha raramohaga hunia ki vi tangê, ki vi: “Gu garira maninga na Isiraelita koro, ga hita so mêngara, ma ko hagatahira, manga na mane i garigari maninga na guani na vaini, ga hita so mêngagi.”
10Inê kê kê hagate, kê vi: “Ti kê hagatarêngenia tanga na tamasinga iamu? Ti ki pasi rongoa? I pungu na karingata! Ngaira ka pe mage ni karinga. Ngaira ka rurusigi ma na tamasinga iamu, gê hagatarêngenigi tangara. 11Araha, inê kê mangariaga ngavê nogaku tangara. Na mangariaganiha ki manga na gi igê na aitangihaku. I asa be hahutogo.”
Ma na Araha ki vi tangê, ki vi:
“Nakara ma, renia na mangariganiha iaku
inê be nahuira na kare igê na mahera
ma na enoni haoru igê na tavani hakuta.
Na enoni êragi, na mane ma na gete,
na meraha ma na gemêa,
ka page henahuraura vê ngaira hato.
12Na enoni getera ka page raugi na ruma iata,
na mu iata, ma na gete iata nikâ.
Inê be hagaitangira na enoni i na agua ngekê.
13Ngaira hato, na enoni raha,
na enoni purua ma na kare,
ngaira ka vanasigi ma na haga,
ma ka ravarava haga.
Na poropete ma na mane ni vogasiha nikâ,
ngaira ka hagabekasira na enoni.
14Ngaira ka pe râ surigi maninga na tagaraha iata.
Ngaira ka vi ma, vi na maara iata na kariaku,
ki manga na kere garogaroha ma.
Ngaira ka vi, vi ngaira ka koro era vê,
ma ka vi, viga râ surigi maninga na mani tarani.
Ma hete i mareha ngavê!
15Ngaira ka maki vari,
matena ga katogi na tarani, ga era ngavê?
Mareha! Ngaira ka pe maki surigi.
Ngaira ka hitenia ngavê na makiha.
Tahema ngaira ka page votavota tatage,
igê na matena gê page hagaitangira igê.
Ngaira ka page hatohato hagetage.
Ngaia kani gê visia, inê na Araha.”
16Na Araha ki vi tangara na kariana, ki vi:
“Mu bâbâ tarami. Mu takotako maninga.
Mu hagategami so maremi.
Na uvarimi ka râ bâ hega?
Na tara ta ki koro?
Mu arâ suria,
ma hanana mu page gâga igê na ramana.”
Ma ngaira ka vi: “Mareha. Igami kami usi.”
17Ma hemuri na Araha ki kasira na mane ni anumasiha,
hanana viga hagananêra na kariana.
Ngaia ki vi tangara, ki vi:
“Mu karinga na ringena na ahuri ni hagananêha.”
Ma ngaira ka vi: “Mareha. Igamu kami usi.”
18Tahema na Araha ki vi:
“Igamu na enoni getegamu i maveta, mu karinga,
hanana mu giraragi na tarani,
ga page tarahura na kariaku.
19Maveta hagenani, gu rongo!
Inê be hagaitangira na kariaku ngegana
renigi na bagatarihata,
suria ngaira ka usitenigi na hagesuringa iaku
ma ka aharêngegi na ramata iaku.
20Inê ki asa be aganarira,
matena ga susu tangê renigi na marâ ga sigini koro,
ga vurigi me i Seba se i na agua hagatê.
Inê ki asa be aganarira, matena ga susu tangê.
Inê ki asa be vagevagesira, matena ga vogasiê.
21Tahema inê be katora, ke tapasu ma ke vota.
Ngaira hato ka page me:
na enani kare henira na kareta,
na enoni hato henira na tamata.”
Na me i Babilonia ka taharia i Jerusaleme
22Na Araha ki vi:
“Na me ka râ me tenia i Babilonia.
Ngaira ka râ me hagatê, ga rako ma ka ramo teha,
ma ka hagarêa na hearihatana.
23Ngaira ka migirâ me na epage ni me
ma na tatapa borahu iata.
Ngaira ka katogi na hagamamasiaganiha,
ma ki asa hagetage vige hetaki.
Ngaira ka hebungi, manga na asi i arobo,
matena ga râ me igê na hosi ni me iata.
Ngaira ka nanê, hanana viga taharia Jerusaleme.”
24Na ai ni Jerusaleme ka vi:
“Igami kami bani girara na rongoha.
Igami kami bubununuga ma kami tugupu.
Na anumanumaha ma na mamasiaganiha ka tarahugami.
Igami kami manga na gete i harate kare.
25Igami kami magu,
vigami râ i bemu se igê na tara,
suria na merongamami ka tangaru
ka têgami me ma ka oga rihigami.”
26Na Araha ki vi tangara na kariana, ki vi:
“Mu hagesuru tatari.
Mu hurihuri igê na rahu.
Mu angi maramara ngavê,
mangarerua na enani kare
garu angisia o kare i tage iaterua.
Na merongami ka page hagakakangi me ka taharigamu,
ma ka page hagaerasigamu ngavê.
27“Igo Jeremia, gu uhungira na kariaku,
ma ku hagakitakitara, vi ngaira ka bâ mara ta.
28Ngaira ka guguruga, ka togeaga,
ma ka parisihêga ngavê.
Ngaira hato ka bagatarihata,
ma ka hagatoraira na enoni.
29Naka ma na gi raramohaga ngavê,
ngaia ki asa, vige hagamatarotaroa na siliva.
Inê kê hagamatarotarora ma hagaborâ na kariaku,
suria na ani ga era ka pe râ tenira na ani ga koro.
30Ga page visira vi na momogani,
suria inê nga na Araha kani gê usitenira.”
Currently Selected:
JEREMIA 6: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
