JEREMIA 1
1
God ki atea o Jeremia ki poropete
1Igê na buka ikê ka oga igê na marâ, i visigi o Jeremia, ma na marâ, i katogi. O Jeremia ngaia ki no karena o Hilikia, na mane ni vogasiha i hinua i Anatote i na apanena, ga oga igê na raraha iana o Benamino. 2Na Araha ki tamasi tanga o Jeremia, matena o Josia karena o Amone ki bani marungia me i Juta surigi na harisi tangahuru matare oru. 3Ma ngaia ki tamasi tanga nikâ igê na matena, i maneraha igê o Jehoiakimo karena o Josia. Ma i hemuri na Araha ki ama ni tamasi hagarako nga tanga, mataro me igê na matena iana o Setekia karena o Josia, i bani maneraha surigi na harisi tangahuru matare tage. Igê na rimata na hageha i na harisi ngekana ka henahuraura igê na ai ni Jerusaleme.
4Na Araha ki tamasi tangê, ki vi:
5“Inê kê bani atego
i nago tarana gê hagatotogo i obana kenamu.
Matena i mamênga, vigu voravora me,
inê kê bani atego tangê mareku,
ma kê bani kasigo, ko poropete iaku
hanana go totora tamasinga iaku
tangara na enoni i maveta.”
6Inê kê arami, kê vi: “E, inê kê pe girara, hanana ve tamasi. Inê kê kahu mane ma.”
7Ma na Araha ki aramiê, ki vi: “Siana ko vi, vi igo ka na mane haoru ma. Gu râ i pasita na enoni, gê hagatorangenigo tangara, ma ko hagarongora renigi na marâ, gê bonasigo re. 8Siana ko magutenira. Inê be ngahisigo ma be anumasigo. Ngaia kani gê visia, inê na Araha.”
9Ma na Araha ki gusia na rimana ma ki hataria na haraku, ma ki vi tangê, ki vi:
“Bâ, inê kê hagagirarago renigi na tamasinga,
i tuguhigo, vigo visigi.
10I ngekê inê kê vatego renia na ramoha,
go marungigi na marâ i maveta
henigi na raramohata,
hanana go pirigi akê ma ko okegi vato,
hanana go hogegi ma ko horogi,
hanana go hagêrasigi aporo
ma ko kasigi igê na atohani.”
Na maruteha gi rua
11Na Araha ki hagateê, ki vi: “Jeremia, na ta ko bâsia?” Inê kê aramia, kê vi: “Inê kê bâsia na arana na hara.”
12Na Araha ki vi: “Go vi koro. Tagenana ma na hara i takataka igê na matena tanga, na tamasinga iaku nikâ ka voravora me monari vikana.”
13Ma hemuri na Araha ki hagateê nikâ, ki vi: “Na ta nikâ ko bâsia?” Inê kê aramia, kê vi: “Inê kê bâsia na kuki i agobogobogo i Babilonia, ma ki sugia ma, vige mea me.”
14Na Araha ki vi: “Tenia i Babilonia na bagabevoana ki page mea hurira na enoni hato, ga oge igê na marê ikê, 15suria inê kê unira me ngaira hato na enoni i Babilonia. Na maneraha iata ka page nakagi na âgâga iata igê na maani na maa ni para i Jerusaleme, ma ka page rihuigi na para igê, ma ka page rihuigi nikâ na hinua getigi i Juta. 16Inê be hagaitangira na kariaku, suria ngaira ka tasi. Ngaira ka kasi reniê inê, ma ka vogasira ma na harasita na enoni getera. Ngaira ka tahegi na nunuta na ataro ma ka rahesira. 17Jeremia, gu tavoraha. Ku hagarongora renigi na ara ni marâ, gê bonasigo re. Siana ko magutenira, i era ma, kê kahu katogo, ko magu ngavê i maata. 18Bâ Jeremia, inê kê katogo, ko manga na hinua nganganihaga, manga na u ma na apê na aiani pusia na agua hagenani, pusira na maneraha i Juta ma na kariata, pusira na mane ni vogasiha ma na enoni. 19Ngaira hato ka page ura pusigo, ma ki asa, vige page teharigo, suria inê be ngahisigo ma be anumasigo. Ngaia kani gê visia, inê na Araha.”
Currently Selected:
JEREMIA 1: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
