HOSEA 14
14
Urisi parongami
1Isiraelita, mu aharia na Araha God iami.
Na bagaparongami ka bani katogamu,
kamu tapasu ma kamu votavota.
2Mu angitenigi na tasi iami ma kamu urisi parongami.
Mu vogasia na Araha renia na nunginungi ikê:
“God, go bonotenigi na tasi hato iamami,
ma ku aganaria na nunginungi iamami,
ma igami kami page hagarahasigo,
manga mi bani surua.
3Asiria ki asa hagetage, vige hagatahigami.
Igami kami pe tako togo renira na hosi ni me,
suria ngaira ki asa, vige anumasigami.
I asa iamami, vigami visigi nikâ
na marâ, mi tahegi, viga god iamami.
Araha, igo nga nga na ani go takuira na kare banogo
ma na enoni ga varomu.”
Na Araha ki surua na mauriha tangara na Isiraelita
4Na Araha ki vi:
“Inê be katora na kariaku,
ke toto suriê aporo.
Inê be takuira i mêrihaku hagenani.
I hato be mangariaga tangara.
5Inê be hagamaurira na Isiraelita,
manga na rangi i rangisia na mako avagavaga.
Ngaira ka page mauri mangagi na mahe, ga taka.
Ngaira ka page nganganihaga
mangagi na vagani na apinige raha i Libanone.
6Ngaira ka page nahunia na mauriha haoru
mangagi na apinige na olive,
ga baogo ma ka bâkoro.
Ngaira ka page sigini koro
mangagi na takani na ago igê na hungani.
7Ngaira ka page rukuruku aporo i pasiku,
ma inê be anumasira.
Ngaira ka page tagarahigi nikâ na mu ni ngêra.
Ngaira ka page rakorako manga na pariki ni vaini, i rasirasi.
Ki page rongo raha na atata manga na vaini ni Libanone.
8Na Isiraelita ki asa, vige page gagêmaga nikâ renira na ataro.
Inê nga kê page aganarigi na nunginungi iata.
Inê nga kê page marupera.
Inê nga kê page anumasira,
manga i hagamamarusira na apinige,
i asa, vige turituri.
Inê nga na hunana na korohata hato.”
Hagatarobê
9Na enoni, i tako mataha,
ki tuguhia, i takotako renigi.
Na enoni, i aitangisigi maninga,
ki tuguhia, i arâ surigi.
Na tarani iana na Araha ka oto,
ma na enoni, ga koro ma oto, ka arâ surigi,
ma na enoni, ga aharê igê,
ka tapasu ma ka votavota.
Currently Selected:
HOSEA 14: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
