HAGONEGAHANI 35

O Jakobo ki aporo i Betele

1God ki vi tanga o Jakobo, ki vi: “Gu râ nga tanga i Betele ma ko gâga i ngekana. Go tagarahia igê na panga na bea ni vogasiha tangê, inê na God gê vora tangago, matena go gavatenia o veogamu o Esau.”

2Vikê o Jakobo ki vi tangara na me i ruma iana, ki vi: “Mu kasigi râ na nunuta na ataro iata na enoni getera mu migioga. Mu hagamatarotarogamu maremi, hanana mu korokoro ma kamu ototo aporo i maana God, ma kamu hagesuru haoru. 3Igia ka pania ikê ma ka arâ tanga i Betele. I ngekana inê kê page tagarahia igê na panga na bea ni vogasiha tanga God, i tamaniê me igê na mateni ni bagabevoani ma ki ngahisiê tare igê na ara ni agua, gê oga igê.” 4Vikê ngaira ka tagarenigi tanga o Jakobo na ara ni nunuta na ataro iata na enoni getera ma na mumu ni karinga i karingata nikâ. Ngaia ki ahunigi igê na hunana na apinige raha hagarangia i Sekemi.

5Matena o Jakobo ma ngaira o karena ka tavoraha noga, na enoni surigi na hinua hagarangi ka magu ngavê. Tahema ngaira ka pe tarigenira. 6O Jakobo henira na kariana hato ka ata râ i hinua i Luse i Kanani, na hinua ga hêtana i ngekê vi Betele. 7I ngekana ngaia ki tagarahia igê na panga na bea ni vogasiha ma ki hêtana na agua ngekana vi El Betele, i vivi ‘God ni Betele,’ suria God ki bani vora tanga i ngekana, matena i gavatenia o veogana. 8Ka Tebora, i marupea ka Rebeka matena i sisite, ngaia ki me ma ka bagia igê na hunana na apinige raha hagarangia i Betele igê na apanena tanga i Negeve. Vikê ka hêtana na apinige ngekana vi ‘Apinige ni Angiha.’

9Matena o Jakobo ki aporo me tenia i Mesopotamia, God ki vora tanga nikâ ma ki koro tanga. 10God ki vi tanga, ki vi: “Na atamu ki no Jakobo, ma haganega tenia i ngekê na atamu ki no Isiraele.” Vikê God ki hêtana vi o Isiraele. 11Ma God ki vi tanga nikâ, ki vi: “Inê nga ka na God raramohaga huniê. Ge rako teha ngavê na karemu. Na apaparaha iamu ka page vora na hakuta rako ninuni ma igo ko page vora na êvarita na maneraha. 12Inê kê page haganahunigamu igo ma na raraha iamu renia na mako, gê bani haganahunirerua renia o Abarahamo mo Isako.” 13Hemuri God ki râ pania. 14Igê na agua God ki tamasi tanga igê, o Jakobo ki hagêrasia igê na hê, hanana ga takusia na suruha iana God, ma ki hagapunaria igê God, matena i merigi igê na vaini ma na oile ni olive. 15Ngaia ki hêtana na agua ngekana vi Betele.

I me ka Ragele

16O Jakobo ma na me iana ka pania i Betele, ma na matena ngaira ka hagatêria mênga i Eparate, ka Ragele ki riki na gerina ma ki bagaapara. 17Matena i hara ngavê ni aparaniha, na gete ni hagaparaha ki vi tanga, ki vi: “Ragele, siana ko anumanuma. Ta na kare mane nikâ!” 18Ma ka Ragele ki sugi meme noga, ma na matena i me, ngaia ki hêtana o karena vi Benoni, ma o vaemana ki hêtana vi o Benamino.

19Matena i me ka Ragele, ngaira ka bagia i na akerena na tara i Eparate, ga hêtana i ngeke vi Beteleheme. 20O Jakobo ki hagêrasia na hê i ngekana, hanana ga hagatakusia renia. Na hê ki gâga mênga igê na anoanona ka Ragele mataro i ngekê.

21O Jakobo ki râ nga ma ki tagarahia na tênga iana i na apanena râ na bebetehe i Etere. 22Matena o Jakobo ki oga i ngekana, o Rubeni ki memêru ka Biliha na hitangita na gete getera iana o vaemana. O Jakobo ki rongo ma ki mangariaga ngavê.

Ngaira o karena o Jakobo

(1 Sihonga 2.1-2)

O Jakobo ki aparara o karena tangahuru matarerua. 23Ka Lea ki aparara o Rubeni na bêbê ni kare, o Simeone, o Levi, o Juta, o Isakara mo Sebuluni. 24Ka Ragele ki apararerua o Josepo mo Benamino. 25Ka Biliha na kare vurivuri iana ka Ragele, ki apararerua o Tane mo Napatali. 26Ka Silipa, na kare vurivuri iana ka Lea, ki apararerua o Gata mo Asere. Ngaira hato ngegana ka na kare mane o Jakobo ki aparara i Mesopotamia.

I me o Isako

27O Jakobo ki râ ki bâsia o Isako o vaemana i Mamere, hagarangia i Heberoni, na agua garu bani oga me igê o Abarahamo mo Isako. 28O Isako ki tonga na 180 na harisi iana, i gemêa ki araria ma ki me. O Esau mo Jakobo o karena gi rua karu bagia. 29I gemêa ki araria ma ki me. O Esau mo Jakobo o karena gi rua karu bagia.

Currently Selected:

HAGONEGAHANI 35: KCB

Highlight

Copy