HAGONEGAHANI 21

I vora o Isako

1Na Araha ki koro tanga ka Sara, manga i bani suru tanga. 2Tahema ka Sara ki obara ma ki apara na kare mane tanga o Abarahamo i gemêa. Na kere mane ki vora igê na matena God i bani visia, vi voravora igê. 3O Abarahamo ki hêtana vi o Isako. 4Matena o Isako ki hato huria na tangiana ge varu, o Abarahamo ki retea râ na gavona na varana na kere mane, suria God ki bani bonasia vikana. 5O Abarahamo ki tonga na tangarê na harisi iana, matena i vora o Isako. 6Ka Sara ki vi: “God ki hagakoro obaku kê mamana. Na enoni hato ga rongoa, ngaira ka mamana nogata.” 7Ma ki vi tanga o Abarahamo ki vi: “I nago ki mareha rârâ ta na enoni, vige vi tangago, vi inê ka Sara kê page hagasusu kare. Ma ku bâ, inê kê apara na kare mane tangago, naka ma go gemêa ngavê.” 8Matena i raharaha na kare ma igê na tangiana i kasikasi susu igê, O Abarahamo ki magoto.

O Abarahamo ki kasirerua hura ka Hagara mo Isimaele

9I ta na tangiana o Isimaele, o karena ka Hagara ni Esipito i apara tanga o Abarahamo, ngaia ki barebare henia o Isako o karena ka Sara. 10Ka Sara ki bâsirerua ma ki vi tanga o Abarahamo, ki vi: “Gu kasia hura na gete vurivuri akana henia o karena. O karena na gete ngekana ki pe araria, vige nahunia ta na apanena na nahuninga iamu. Nga noga ma o Isako na kareku kani oto tanga, vi page nahunigi na ara ni nahuninga hato iamu.” 11O Abarahamo ki tako bâraha renia na tarana ngekana, suria o Isimaele ka no karena nikâ. 12Ma God ki vi tanga o Abarahamo, ki vi: “Siana ko tako bâraha vikana renirerua na kere mane ma ka Hagara na gete vurivuri iamu. Gu râ surigi na tamasinga iana ka Sara, suria na apaparaha iana o Isako ka page vora na raraha iamu, manga gê bani surua. 13Inê kê page hagarakonira nikâ na apaparaha iana o karena na gete vurivuri, hanana ga voravora na hakuta raha ninuni, suria ngaia ki no karemu nikâ.”

14I na mahogotana i tangi me nikâ, o Abarahamo ki tavo tani na ngêra ma na anga ni ve ma ki vatea ka Hagara. Ngaia ki têa na kare ma ki hagabaha renia ka Hagara, ma ki kasirerua hura. Ka Hagara ki râ, ma ki sivangia na bagamasusu raha i Bereseba. 15Matena i hato na ve igê na anga, ngaia ki naka so o karena i mamarugana na kere apinige sisite ma ki râ pania. 16Ngaia ki râ ki oga so hagatê râ na ararina na 100 mita. Ngaia ki tako ki vi: “Inê kê pe pasi bâsia o kareku i meme.” Ngaia ki angi, matena i oga i ngekana.

17God ki rongoa na kere mane i angi. Vikê na angero iana God ki tamasi tanga ka Hagara, ki vi: “Ka Hagara, na ta ko tako bâraha renia? Siana ko magu. God ki rongoa na angiha iana na kere mane. 18Aharaga ku râ ku ragea o karemu ma ku hagamunia. Inê kê page hagarakonira na raraha iana, hanana ga voravora na hakuta raha ninuni.” 19God ki katoa ka Hagara ki sira râ ma ki bâsia na ve karu. Ngaia ki ura râ ki tia na anga ni ve, ma ki vatea o karena ki tono. 20God ki marupea rârâ na kere mane ma ki raha. Matena i raha, ngaia ki oga igê na bagamasusu raha i Parana ma ki aresuria ngavê na hagavasinga. 21Kenana ki torea na gete ni Esipito tanga ki êragia.

O Abarahamo mo Abimeleki karu heaganari

22Igê na matena ngekana o Abimeleki mo Pikolo i bêngenira na me iana o Abarahamo karu râ i pasina o Abarahamo. O Abimeleki ki vi tanga o Abarahamo, ki vi: “God ki tamanigo tare igê na ara ni tagaraha iamu. 23Gu tohe i ngekê nga i maana God, vi igo ki asa, vigu page hagabekasigami, inê ma na kareku ma na raraha iaku. Inê kê bani totosurigo me. Hoi, gu tohe, vi igo nogamu ko tototo suriê ma ko ototo surigi na tauhata na enoni, go henira.”

24O Abarahamo ki vi: “Hoi, be tohe.”

25Ngaia o Abarahamo ki tamasi tanga o Abimeleki renia na vekaru, ga rêa na kariana o Abimeleki. 26O Abimeleki ki vi: “Inê kê pe girara vi o ti. Igo ko pe hagarongoê rârâ renia. Inê kê kahu rongoa so ma i ngekê.” 27Vikê o Abarahamo ki vatea o Abimeleki tani na sipi, na goti ma na puruka ma ngairerua karu heaganari. 28O Abarahamo ki kasira getera na karena sipi gi pi tenia na totoha iana. 29O Abimeleki hagatea, ki vi: “Hega go kato vikana?”

30O Abarahamo ki arami ki vi: “Gu aganarira na karena sipi gi pi agê. Vikana igo ki asa vigu hagaigê, vi inê kanigê oparia na vekaru ngekana.” 31Tahema na agua ngekana ka hêtana vi Bereseba, suria ngairerua karu toheheri i ngekana.

32I murina na heaganariha iaterua i Bereseba o Abimeleki mo Pikolo karu aporo i Pilisitia. 33Mo Abarahamo ki hasia na apinige na tamarisiki i Bereseba ma ki rahesia igê na Araha God i mauri tare ma tarema. 34O Abarahamo ki oga arihu ngavê i Pilisitia.

Currently Selected:

HAGONEGAHANI 21: KCB

Highlight

Copy