HAGONEGAHANI 11

Na ruma i akê ngavê i Babele

1Hagenago na enoni i maveta hagenani ka nahunia na tamasinga gi tage ma, ma ka tamasi igê na tamasinga gi tage ma. 2Matena ga suga tanga i kerekê, ngaira ka ata igê na bena i Babilonia ma ka oga igê. 3Ngaira ka heaganari, ka vi: “Nika, ge tagarahigi na hê renigi na mako ma ka hanugi ki gatagata. “Vikê ngaira ki tonga na hê tangara, hanana viga tagarahia na ruma ma na marâ tanga i purupuru haku renigi. 4Ngaira ka vi: “Hoi, ge tagarahia na hinua raha henia ta na ruma i akê teha ngavê ki tariha i vavearo, hanana i rongo raha na ataka. I ngekana igia ki asa vige totoko suria na maveta hagenani.”

5Ma hemuri na Araha ki soso me ki rigia na hinua raha henia na ruma i akê teha ngavê na enoni ka tagarahia. 6Ngaia ki tako, ki vi: “Bâ, na tarana ga katoa ki kahu haganega, ma hemuri ngaira ka page girara ga katogi na ani mavê na marâ ga obanigi. Ngaira ka voravora mênga na enoni haku ma na tamasinga iata ki gi tage togo ma. 7Nika, ge râ ma ke katogi na tamasinga iata ke tora hegitigi, hanana siana ngaira ka giraragiheri na tamasinga iata.” 8Ngekana na Araha ki tokorenira suria na maveta hagenani, ma ngaira ka rumakaka vê renia na hinua raha. 9Na atana na hinua raha ngekana kani i Babele, suria i ngekana na Araha ki katogi igê na tamasinga iata na enoni hato ka tora hegitigi, ma tenia i ngekana ngaia ki tokorenira na enoni hato suria na maveta hagenani.

Na raraha iana o Semi

(1Sihonga 1.24-27)

10Ikê na raraha iana o Semi. Na harisi gi rua i murina na maganuha raha, matena o Semi ki tonga na harisi 100 iana, ngaia ki apara na kare mane o Arapakasata. 11I murina ngekana ngaia ki oga nikâ surigi na harisi 500 ma ki aparara nikâ tani na kare.

12Matena o Arapakasata tonga na harisi 35 iana, ngaia ki apara o Selaga. 13I murina ngekana ngaia ki oga nikâ surigi na harisi 403 ma ki aparara nikâ tani na kare.

14Matena o Selaga ki tonga na harisi 30 iana, ngaia ki apara o Ebere. 15I murina ngekana ngaia ki oga nikâ surigi na harisi 403 ma ki aparara nikâ tani na kare.

16Matena o Ebere ki tonga na harisi 34 iana, ngaia ki apara o Pelege. 17I murina ngekana ngaia ki oga nikâ surigi na harisi 430 ma ki aparara nikâ tani na kare.

18Matena o Pelege ki tonga na harisi 30 iana, ngaia ki apara o Reu. 19I murina ngekana ngaia ki oga nikâ surigi na harisi 209 ma ki aparara nikâ tani na kare.

20Matena o Reu ki tonga na harisi 32 iana, ngaia ki apara o Serugu. 21I murina ngekana ngaia ki oga nikâ surigi na harisi 207 ma ki aparara nikâ tani na kare.

22Matena o Serugu ki tonga na harisi 30 iana, ngaia ki apara o Nagore. 23I murina ngekana ngaia ki oga nikâ surigi na harisi 200 ma ki aparara nikâ tani na kare.

24Matena o Nagore ki tonga na harisi 29 iana, ngaia ki apara o Teraga. 25I murina ngekana ngaia ki oga nikâ surigi na harisi 119 ma ki aparara nikâ tani na kare.

26Matena o Teraga ki tonga na harisi 70 iana, ngaia ki aparara o Abaramo mo Nagore mo Harane.

Na raraha iana o Tarega

27Ikê na raraha iana o Teraga, i aparara o Abaramo mo Nagore mo Harane. O Harane ki apara o Loti. 28O Harane ki me i pasina i Uru i Babilonia, matena i tahitahi menga o vaemana. 29O Abaramo ki êragia ka Sarai. O Nagore ki êragia ka Milika ka karena o Harane, i apara nikâ ka Isika. 30Ka Sarai ki pe apara kare, suria i gomara.

31O Teraga ki merarâ o Abaramo o karena mo Loti o vesina o karena o Harane ma ka Sarai ka hungâna kaniana o Abaramo, ma ki mera aharaga tenia na hinua raha i Uru i Babilonia, ma ka râ tanga i Kanani. Matena ga tariha i hinua i Harane, ngaira ka oga igê. 32O Teraga ki me i ngekana, matena i tonga na harisi 205 iana.

Currently Selected:

HAGONEGAHANI 11: KCB

Highlight

Copy