ESEKIELE 44
44
Na tarâto bêkê ki purupuru tare
1Na mane ki meêrâ tanga na tarâto i na tarihana bêkê na mahera na Ruma ni Rotu. Na maana na tarâto ki purupuru. 2Na Araha ki tamasi tangê, ki vi: “Na tarâto na ani ikê ki purupuru tare. I apu hagetage ta na enoni, vige tangahia. I apu hagetage ta na enoni, vige banu suria, renia ngaia ki na tarâto iaku. Inê nga na Araha God iata na Isiraelita kani gê bêbanu suria. Tahema ngaia ki purupuru tare. 3Na maneraha ngaia getea ma ki oto tanga, vi arâ igê, hanana i ngaua na ngêra apuna, i tagarenia tangê. Ngaia ki tuguhia, i bêbanu ma ki huhura me igê na tarâto igê na kiboru raha, i maa tanga na Ruma ni Rotu.”
Na ramata tanga na banuha i Ruma ni Rotu
4Na mane ki meêbanu suria na tarâto i na tarihana bêrâ tanga i Tamasiko, ma kamuru ura i maana na Ruma ni Rotu. Matena gê râ, inê kê bâsia, vi na mavetana na raramohana na Araha ki raro i Ruma ni Rotu. Inê kê tubê so hatara i ano. 5Na Araha ki tamasi tangê, ki vi: “Igo, karena enoni ma, gu hahutugigi maninga na ara ni marâ, go bâsigi ma ko rongogi. Inê be hagarongogo renigi na mangata ma na ramata tanga na Ruma ni Rotu. Go girarara maninga, vi ti ki oto tangara, viga bêbanu i Ruma ni Rotu, ma ti ki apu tangara.
6“Gu hagarongora na Isiraelita, ga guguruga tare, vi inê na Araha God kê bonasira, hanana viga hatungigi râ hagetage na bagatauhata, gê kitenigi ngavê. 7Ai ni Isiraele, matena mu vogasiê renigi na ubeni ma na gapuni na ganiani, igamu kamu hagaerasia na Ruma ni Rotu iaku, suria mu unira banu igê na ai mahuara, na ani ga pe retegi râ na gavoni na varata, na enoni ga haritoheê. Vikana igamu kamu aharêngia na suruheri iaku henigamu renigi na bagatauhami, gê kitenigi. 8Igamu kamu pe bâsurigi maremi hete na mani mangata i Ruma ni Rotu, ma kamu kasira ma na ani ga mahuara ka bâsurigi.
9“Inê nga na Araha God kê manimania, vi na ai mahuara, se vi na ani ga pe retegi râ na gavoni na varata, se vi na ani ga haritoheê, vige page banu i Ruma ni Rotu. I apu nikâ tangara na ai mahuara, na ani ga oga henigamu na ai ni Isiraele.”
Na Levita
10Na Araha ki tamasi tangê, ki vi: “Inê kê hagaitangira na Levita, na ani ga kasi reniê ma ka vogasira na ataro mangara na Isiraelita getera. 11Ngaira ki koro ma tangara, viga tagara i Ruma ni Rotu iaku, hanana ga anumasigi na tarâto ma ka katogi na tagaraha getigi igê na mahera ni Ruma ni Rotu. Ngaira ki koro ma, viga nahuira na ganiani, ga torera me na enoni tangagi na vogasiha ma tanga ga susu renira, ma ki tuguhira, viga tamanira na enoni. 12Inê na Araha God kê tohe, vi na hagaitangiha ki page tarahura, suria ngaira ka bêngenira na ai ni Isiraele igê na vogasiha ni ataro, ma ngaira ka hagatasira igê na tarana ngekana. 13Ngaira ki apu tangara, vige tagara tangê mangara na mane ni vogasiha iaku, se vige hatarigi na marâ apuna i Ruma ni Rotu, se vige banu igê na Agua Apuna Teha. Ngaigi nga ka na hagaitangiha meni na bagatauhata. 14Inê kê atera tangagi na tagaraha purua i Ruma ni Rotu.”
Na mane ni vogasiha
15Na Araha God ki vi: “Na mane ni vogasiha, na ani igê na varo ninuni iana o Levi ma na hagosi ni nuni iana o Satoke, ngaira nga ka na ani, ga ama ni tagara maninga nga tangê i Ruma ni Rotu, naka ma na Isiraelita getera ka kasi reniê. Ngaira nga ka na ani i oto tangara, viga tagara tangê ma ka rêra i maaku, hanana ga vogasiê renigi na ubeta ma na gaputa na ganiani. 16Ngaira getera ma kani oto tangara, viga bêbanu i Ruma ni Rotu iaku, ka vogasiê igê ma ka bêngenia igê na hagarahenga i Ruma ni Rotu.
17“Ngaira ki tuguhira, viga tuguni maraherahe, matena ga bêbanu suria na tarâto tanga na mahera ni Ruma ni Rotu. I apu tangara, vige tuguni renigi na tuguni na varehuta na sipi, matena ga katogi na tagaraha iata igê na mahera ni Ruma ni Rotu, se vi i rarona na Ruma ni Rotu. 18Ngaira ki tuguhira, viga surusuru i bêta na gahu maraherahe ma ka tarausisi borahu renigi, ma ki apu tangara, vige hogosira mareta renigi na hogosita. Vikana ki asa, vige mava. 19Hagenago tarana ga huhura tanga na mahera na Ruma ni Rotu, ga hakuhaku igê na enoni, ngaira ki tuguhira, viga tasigi râ noga na gahu ni tagaraniha iata i Ruma ni Rotu, ma ka nakagi igê na kiboru apuna. Ngaira ki tuguhira, viga hagesuru renigi na tuguni getegi, hanana siana na tuguni apuna ka erasira na enoni, matena ga hatarigi.
20“Na mane ni vogasiha i apu tangara, vige goro bê huri, se vige gagahi na bêta. Ngaira ki tuguhira ma, viga tapuru bê. 21Na mane ni vogasiha ki apu tangara, vige tono i nago na vaini, ma hemuri ke banu igê na mahera ni Ruma ni Rotu. 22Na mane ni vogasiha ki apu tangara, vige êragira na gete kasikasi. Ma ki oto tangara hete, viga auragira na kare viru na Isiraelita, se na gete na nâta na mane ni vogasiha getera.
23“Na mane ni vogasiha ki tuguhira, viga hagesurira na kariaku renigi vi na ta kani ga apuna ma na ta ki mareha, ma renigi na ta kani ga matarotaro suria na rotu ma na ta ki mareha. 24Matena ga hetuguri igê na tamasinga, na mane ni vogasiha ki tuguhira, viga hagaotoa surigi na ramata iaku. Ngaira ki tuguhira, viga marupegi na tangiani raha ni rotu surigi na ramata ma na mangata iaku, ma na Tangiana ni Mamaroha nikâ.
25“Na mane ni vogasiha ki apu tanga, vige hataria na gahua, i era ma ki pe matarotaro suria na rotu. Nga noga ma na hitangiterua na enana, se na hitangita na karena, se na goana mane, se na gete na kare viru, kani hataria na gahua. 26I murina i matarotaro aporo, ki tuguhia, i gâga surigi na tangiani gi pi, 27ma hemuri ki kahu bêbanu igê na mahera ni Ruma ni Rotu tanga na vogasiha ni kasi mena, hanana i araria, i tagara aporo i Ruma ni Rotu. Ngaia kani gê visia, inê na Araha God.
28“Na mane ni vogasiha ki pe oto tangara, vige nahunia mareta na mako. Ngaira ka na mane ma tanga na hagarahenga tare, ki bê ki arâ. Ngaira ki apu tangara, vige nahunia na mako i Isiraele. Ngaira ki tuguhira hete, viga tagara tangê inê ma. 29Ngaira ki oto tangara ma hete, viga mauri renigi na ngêra ni vogasiha, renigi na vogasiha ni bonoteniha ni tasi ma ni kasi meni. Ma ki oto tangara nikâ, viga taugi na ara ni marâ i Isiraele, na marâ ga tagarenigi tangê na enoni. 30Na mane ni vogasiha ki oto tangara, viga mauri renigi na ani koro na naguni na mu ma renigi na ara ni marâ, ga tagarenigi tangê na enoni. Matena na enoni ka hahahi na bereti, ki tuguhira, viga tagarenia na guana hagenago tangara na mane ni vogasiha, hanana na korohaku ki tarahura na ahemata iata.
31“Na mane ni vogasiha ki apu tangara, vige ngaura na manu se vi na ganiana, i meme marena, se vi na ani getera râ ga garagara hunia na tamana.”
Currently Selected:
ESEKIELE 44: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific