RAMATA 33
33
O Moise ki nungia God tangara na Isiraelita
1O Moise na kariana monari God, ki nunginungi tangara na Isiraelita i nago tarana i me. O Moise ki vi:
2“Na Araha ki râ me tenia na hungana i Sinai.
Ngaia ki akê manga na arito, i raboa kerekê i Etome.
Ngaia ki mavesira na kariana i hungana i Parane.
Rako na rehagaro na angero ka takua.
Na marangea ka gaha tenia na rimana na otona.
3“Na Araha ki takuira na kariana
ma ki anumasira na anina.
Vikê igia ka susure ma ka bêrusu i maana
ma ka têtê viteana maninga.
4Igia ka marupegi na ramata hato
o Moise ki vategia renigi.
Igia ka makuanigi bâraha.
5Matena na Isiraelita ma na bêni na varo ninuni iata ka bani hakuhaku me,
na Araha ki nakara i ruguhana.”
6O Moise ki nunginungi vikê tanga na varo ninuni iana o Rubeni:
“Na varo ninuni iana o Rubeni
ke gâga tare ki bê ki arâ,
henaka ga pe rako.”
7O Moise ki nunginungi vikê tanga na varo ninuni iana o Juta:
“Araha, gu aganarigi na avarasiha iaku.
Gu hagahakura aporo henira na varo ninuni getera.
Araha, gu rohe pusira ma ku urapusira na merongata.”
8O Moise ki nunginungi vikê tanga na varo ninuni iana o Levi:
“Araha, renigi na hê ni girarasiha
gu hagagirarara na mane ni hagarahenga
ga toto surigo maninga henigi na katoha iamu.
Igo ko uhungira i Masa ma igê na ve i Meriba.
9Ngaira ka tototo surigo
teharira na enata, na goata ma na kareta.
Ngaira ka tê viteamu
ma ka toto suria na suruheri iamu.
10Ngaira ka page hagesurira na kariamu,
hanana ga marupegi na ramata iamu.
Ngaira ka page susu igê na bea ni vogasiha iamu.
11Araha, gu hagaramonira,
hanana ga hagakoro obamu igê na ogaha iata.
Gu menamenarira na merongata hato
hanana i hatohato iata.”
12O Moise ki nunginungi vikê tanga na varo ninuni iana o Benamino:
“Na Araha ki takuira ngavê na varo ninuni iana o Benamino.
Ngaia ki anumasira.
Ngaia ki marupera na tangiani ma na bungiani
ma ki ngahisira tare.”
13O Moise ki nunginungi vikê tanga na varo ninuni iana o Josepo:
“Na Araha ke hagarangisigi na mako iata
Na ve i rarona na ano ke hagamagarohagi.
14Na arito ke sinarigi na apinige ni ngauha ke taka ma ke hungu bâkoro
igê na ara ni mateni tangagi.
15Na apinige ni ngauha ke manasigi
na hungani hagahu iata.
16Na ngêra mora hato ke manasia na apanena iata.
Ke aharêsira na korohana na Araha,
i tamasi igê na vavatana na gi
igê na kere apinige i suru.
Na marâ koro hato ngegana ke tarahua
na varo ninuni iana o Josepo,
suria ngaia ki raha tangara na goana.
17O Josepo ki ramo manga na puruka mane,
mangagi na honi na puruka vasiga.
Na honi iana ngaira ka na rehagaro ma na rehagaro
na mane ni me iana o Manase
ma na rehagaro tangahuru na mane ni me iana o Eparaimi.
Renigi na honi ngaia ki sipangira na apaneni me
ma ki bugurenira tanga na apanena hura na maveta.”
18O Moise ki nunginungi vikê tangarerua na varo ninuni iaterua hegitigi o Sebuluni mo Isakare:
“Na varo ninuni iaterua hegitigi o Sebuluni mo Isakare
ke tavoraha bâkoro igê na tagaraha iata i asi
ma nikâ matena ga gâga i hinua iata.
19Ngaira ka unira me na mahuara,
hanana ga vogasia God igê na hungana
renigi na vogasiha ga hagakoro obana.
Ngaira ka vagevagesigi na ruruguha,
ga râ me tenigi na asi, na one, ma na tarasini.”
20O Moise ki nunginungi vikê tanga na varo ninuni iana o Gati:
“Ge hagarahasia God,
i haganahunira renia na apanena i raha.
O Gati ki manga na laione, i hâa
na rimana na merongana se na ratana bêna.
21Ngaira ka atea na apanena na mako koro tangara mareta.
Ga vatera renia na apanena i araria na maneraha.
Ngaira ka marupegi na ramata ma na hagesuringa iana na Araha,
matena na enoni raha iata na Isiraelita ka oga haku.”
22O Moise ki nunginungi vikê tanga na varo ninuni iana o Tane:
“O Tane ki manga na bêhâgana na laione.
Ngaia ki reke tenia i Basani.”
23O Moise ki nunginungi vikê tanga na varo ninuni iana o Napatali:
“Na korohana na Araha ke aharêsira ngavê
na raraha iana o Napatali.
Na apanena iata ki haganega
tenia na rano i Galilea tariha i Negeve.”
24O Moise ki nunginungi vikê tanga na varo ninuni iana o Asere:
“Na Araha ke koro ngavê
tanga na varo ninuni iana o Asere teharira na varo ninuni getera.
Na raraha iata na goana ke tê surira.
Na apinige ni olive ke manasia na apanena iata.
25Na hinua iata ke nganganihaga
renigi na maani para na aiani.
Ngaira ke oga suri parongata tare.”
26“Isiraelita, i mareha rârâ na ataro,
vige maratorana na God iami.
Ngaia ki bâ hahanetaga ngavê.
Ngaia ki oga igê na vaha i vavearo.
Ngaia ki tagirigi me hanana i tamanigamu.
27God ki bani rohe pusigamu me.
Ngaia ki tamanigamu tare
renia na raramohana, i asa vige page hato.
Ngaia ki tarigenira hura na merongami tarami.
Ngaia ki bonasigamu, kamu mutera hato.
28Igamu na raraha iana o Jakobo,
igamu kamu page oga igê na ramana.
Igamu kamu page oga suri parongami igê na apanena iami.
Na ngêra ma na vaini ka aharêsigamu.
Na kârupu ke hagavokarigi na mako iami.
29E, Isiraelita, igamu kamu babarisi ngavê.
I mareha tani na apaneni me vige maratorami,
suria na Araha ki hagatahigamu.
Na Araha marena ka na bêata ma na tatapa borahu iami.
Ngaia ki ngahisigamu ma ki katogamu kamu tehateha.
Na merongami ka page angoango me
ka avarasigamu hanana vigamu takira.
Ma igamu kamu page pupu huritagenira hete.”
Currently Selected:
RAMATA 33: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
