2 MANERAHA 19
19
O Hisikia ki rongo tarana i pasina o Isaia
(Isaia 37.1-7)
1Matena o Hisikia ki rongora, ga hagarongoa, ngaia ki tarisia na tuguni iana marena, suria i hata era na obana. Ngaia ki hagesuru renigi na tarisigani na gahu, ma ki banu igê na ruma ni rotu iana na Araha. 2Ngaia ki hagaguhira o Eliakimo i bâsuria na ruma raha iana, mo Sebena na mane segesege igê na hagatamasiha ma na bêni iata na mane ni vogasiha tanga na poropete o Isaia karena o Amose. Ngaira hato ka hagesuru renigi na kakagani na gahu. 3Ngaira ka vi vikê tanga o Isaia, ka vi: “O Hisikia ki vi, ‘I ngekê ki na matena ni mamasiaganiha, ni hagaitangiha ma ni makiha. Igami kami manga na gete i riki na gerina ma ki bara vige apara, suria i pe ramo na apena. 4Na maneraha i Asiria ki hagatorangenia me na mane ni hagaotonga iana i teha, hanana i tamasi erasia God mamauri. I arari ma, vi na Araha God iamu ke rongogi na guhata ngegê ma ke hagaitangira renigi na ani ga tamasi vikana. Tahema gu nungia God tangagami na ani mi tahitahi mêngagami.’”
5Matena o Isaia ki rongoa na tamasinga iana na maneraha o Hisikia, 6ngaia ki arami, ki vi: “Mu hagarongoa o Hisikia, vi na Araha ki vi, ‘Siana ko magutenigi na tamasinga iana na maneraha i Asiria, i vi, vi i asa iaku ve hagatahigo. 7Bâ, inê na Araha, inê be katoa na maneraha i Asiria ke tongesuria ta na rongoha, hanana ngaia ki page aporo i pasina ma ka page nahuia igê ki meme.’”
Na ai ni Asiria ka haganunua nikâ i Jerusaleme
(Isaia 37.8-20)
8Na mane ni hagaotonga ni Asiria ki rongoa, vi na maneraha i Asiria ki bani pania i Lakisi ma ki meheariha na hinua i Libina i ngekana. Vikê ngaia ki râ i ngekana, hanana i rongo tarana i pasina. 9Na me ni Asiria ka rongo, vi o Tirihaka i marungia i Nubia, ki bêngenira na mane ni me i Esipito, hanana viga meraheariha. Matena na maneraha i Asiria ki rongo vikana, ngaia ki hagatorangenia na tamasinga tanga o Hisikia na maneraha i Juta. 10Ngaia ki vi tanga o Hisikia, ki vi: “Siana ko tongesuria na ataro go hagarapea. Ngaia ki hagabekasigo, ki vi, vi na maneraha i Asiria ki bara, vige henahuraugo. 11Bâ, igo ko bani girara na tarana i katoa na maneraha i Asiria tanga na ani mavê na agua, i obania vi hagasuhia. Go takusia vari, vi igo ko girara go tahitahi tenia? 12Na êvariku ka bani hagasuhigi na hinua i Gosani, i Harani ma i Resepe ma ka bani mutera na ai ni Beteteni ga oga i Telasare. Ma na harasita ki asa, vige hagatahira. 13I he ngaira nga na maneraha surigi na hinua i Hamata, i Arapata, i Separavaimi, i Hena ma i Iva?”
14O Hisikia ki tavoa na leta tenira na mane tora tamasinga ma ki tomania. Ma hemuri ki râ i ruma ni rotu ma ki naka na leta i maana na Araha. 15Ngaia ki nunginungi, ki vi: “Araha God iata na Isiraelita, igo ko oga bê vato renira na angero. Igo getego ma ko God. Igo getego ma ko Araha tangara na maneraha hato i maveta. Igo ko hagavorarerua na vavearo ma na ano. 16Araha, gu bâsigi na tarani ga tarahugami. Gu takusigi na tamasinga iana o Saneribi i guharigo renigi. Igo nga na God mamauri. 17Araha, igami kami bani girara, vi na maneraha i Asiria ka bani mutera rako na enoni igê na agua getigi ma ka bani hagasuhigi na agua ngegana. 18Ngaira ka bani sungigi na nunuta na harasita. Ngaira ka mareha vi na ataro. Ngaira ka na apinige ma na hê purua ma ga tagarahigi. Tahema i pe bara vige sungigi. 19Vikê Araha God iamami, gu hagatahigami tenira na ai ni Asiria, hanana na enoni hato i maveta ka page girara, vi igo, Araha, igo getego ma ko God.”
Na tamasinga iana o Isaia tanga o Hisikia
(Isaia 37.21-38)
20Ma hemuri o Isaia ki kasi tamasinga tanga na maneraha o Hisikia, ki vi: 21“Na Araha ki tamasi vikê: ‘Igo ko avarasiê. Ikê nga na aramiha iaku. Na hinua i Jerusaleme ki rurusigo, igo Saneribi ma ki manavatenigo. 22Go takusia vi o ti kanigo tamasi erasia ma ko guharia. Igo ko guhariê, inê na God apuna iata na Isiraelita. 23Na tamasinga ga torea me na kariamu, igo ko tamasi paroparo, ko vi, ‘Henigi na kati ni me iaku inê kê tagere igê na barani i Libanone.’ Igo ko tamasi paroparo, ko vi, ‘I ngekana inê kê tapigi so na apinige igê, na ani ga borahu ma ka koro ngavê. Inê kê arâ hagatê ngavê i toro.’ 24Igo ko tamasi paroparo, ko vi, ‘Inê kê oparigi na vekaru ma kê totono igê na ve igê na apanena iata na enoni getera.’ Igo ko vi, vi na êgata na mane ni me iamu ka puria râ na ve i Nile ki mamata ngavê. 25I hega, igo ko pe bani girara vari, vi inê kê bani kato vikana i nago kere vê noga? I ngekê inê kê akê me henigi. Inê kê hagamarumungenigo, hanana go ruhuruhugi na hinua nganganihaga. 26Na enoni igê ki bara tangara. Ngaira ka bubununuga ma ka tugupu ngavê. Ngaira ka mangagi na go i mu se mangagi na rauga ga akê i gerina na ruma ma ka maria, matena igê na roga mahana i rogatenigi tenia i kerekê. 27Ma inê kê bani girara erasigo ngavê, naka ma na marâ go katogi, naka ma i he ko arâ igê, naka ma go mangariaga ma ko guhariê. 28Suria igo ko tamasi erasiê ngavê ma ko paroparo bâraha, tahema inê be naka na ringi i barisumu ma be barogo manga na hosi ma be oke paririgo aporo tanga na agua go râ me igê.”
29Hemuri o Isaia ki vi tanga o Hisikia na maneraha, ki vi: “Ikê nga na girarana na tarana i page voravora me. I na harisi ngekê ma i na ani i muri me igamu kamu page ngêngê ma na marâ ga akê mareni i mu. Ma i na harisi i muri vê igamu kamu kahu hasihasi ma kamu kahu opaopa, ma kamu kahu ngaugi na guani na vaini mu hasigi. 30Na ai ni Juta ga tahitahi mêngara ka page mangagi na apinige ni ngêra ga vagavagaraga bâkoro ma ka hunguhungu. 31Na enoni ka page gâga i Jerusaleme ma igê na hungana i Sione, renia ngaira ka page tahitahi, suria na Araha ki togeaga, hanana vi voravora me na tarana ngekana. 32Tahema na Araha ki vi, ‘Na maneraha i Asiria ki asa, vige page henahuraua na hinua ikê, se vige page hanasia renia na apena gi tage ma na mage. Na mane ni me ki asa, vige page kari me hagarangia na hinua henigi na bêata iata, se vige page rapia na hinua. 33Na maneraha i Asiria ki page aporo suri ugana, ma ki asa vige page henahuraua na hinua ikê. Ngaia kanigê visia, inê na Araha. 34Inê kê page roherohe pusia na hinua ikê ma kê page anumasia, hanana gê hagabângenia na raramohaku ma kê hagamonaria na suruha iaku tanga o Tavite na kariaku.’”
35Igê na bungiana nga na angero iana na Araha ki banu igê na tênga iata na me ni Asiria ma ki nahuira ka me na mane ni me na 185,000. Matena i tangi mahogo, ngaira ka me hagetage ma ka tâ totoko na gahuata. 36Vikê o Saneribi na maneraha i Asiria ki apariri aporo tanga i Nineve. 37Ta na tangiana ngaia ki vogasi igê na ngêsu tanga Nisiroko na harasina. O karena gi rua o Atarameleki mo Saresere karu nahuia ki me renigi na tatapa borahu iaterua ma hemuri karu gava tanga na apanena i Ararata. O Esaratone tani o karena ki maneraha urusia.
Currently Selected:
2 MANERAHA 19: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
