1 SAMUELE 5
5
Na Pilisitina ka pirisia na Bokesi na Suruheri
1Matena na Pilisitina ka henahuraua hato na Bokesi na Suruheri, ngaira ka torea tenia i Ebenesere tanga i Asetote na hinua iata. 2Ngaira ka torea banu igê na ngêsu iana o Tagone na ataro iata ma ka naka ngahisia na nununa o Tagone na ataro. 3Igê na mahogotana i tangi me, na ai ni Asetote ka bâsia na nununa o Tagone i ehu so ki aba i ano i maana na Bokesi na Suruheri iana na Araha. Vikê ngaira ka ragea ma ka hagêrahasia aporo igê na atohana. 4Igê na mahohotana i tangi me nikâ, ngaira ka bâsia na nununa o Tagone i ehu so nikâ i maana na Bokesi na Suruheri. Matena ngekana na bêna ma na rimana ka baro ma ka ruka râ ka tâ i maani ruma. Na apena ma ki tâ so. 5Tahema na mane ni vogasiha iana o Tagone ma ngaira hato i Asetote ga vogasia, ngaira ka pupu aharêngia na agua ngekana, mareha vige pupu igê mataro me i ngekê.
6Na Araha ki hagaitangira ngavê na ai ni Asetote ma ki haganumanumara. Ngaia ki hagaitangira ngaira ma na enoni i hinua hagarangira renigi na garu. 7Matena ga bâsia vikana, ngaira ka vi; “God iata na Isiraelita kani hagaitangigia, igia ma o Tagone ma na ataro iaka. Na Bokesi na Suruheri ki pe araria hagetage vige gâga ikê.” 8Tahema ngaira ka hagatorangenira na mane tora tamasinga ka unira haku me ngaira hato na maneraha gi rima iata na Pilisitina ma ka hagatera, ka vi: “Ge henaka na Bokesi na Suruheri iana God iata na Isiraelita?”
Ngaira ka arami, ka vi: “Torea râ tanga i Gate.” Hoi, ngaira ka torea tanga i Gate, ta na hinua iata nikâ na Pilisitina. 9I murina ki ata vê na Bokesi na Suruheri i ngekana, na Araha ki hagaitangia na hinua ngekana nikâ ma ki haganumanuma. Ngaia ki hagaitangira renigi na garu. Na garu ki tarahura ngaira hato i hinua, na enoni haoru ma na bani nuni nikâ. 10Vikê ngaira ka hagatorangenia na Bokesi na Suruheri tanga i Ekerone ta na hinua nikâ iata na Pilisitina. Matena i ata vê i ngekana, na enoni ka ngere, ka vi: “E, ngaira ka torea me ikê na Bokesi na Suruheri iana God iata na Isiraelita, hanana viga mutegia hato!” 11Vikê ngaira ka hagahakura me nikâ ngaira hato na maneraha iata na Pilisitina ma ka vi tangara, ka vi: “Mu hagatorangenia aporo na Bokesi na Suruheri iata na Isiraelita tanga na agua i râ me tenia, i era ma ki mutegami igami ma na ahemata iamami. Na maguha ki râhia na hinua hagenani, suria na Araha ki hagaitangira ngavê. 12Na ani ga tahitahi mêngara, ki tarahura nogata na garu ma ka avarasira na ataro iata.
Currently Selected:
1 SAMUELE 5: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
