1 MAKABEO 15
15
Na pita o Antioko ki nungia o Simone ki tamania
1O Antioko karena na maneraha o Temeterio ki segea tenigi na marê na leta tanga o Simone na mane ni vogasiha i teha ma ki marungira na Siu, ma tangara na Siu hato. Ngaia ki sege vikê:
2“Inê na maneraha o Antioko, inê kê hagamauru koro tangago o Simone na mane ni vogasiha i teha ma ko marungira na Siu, ma tangagamu hato na Siu. 3Igamu kamu bani girara, vi na enoni erataga ka bani rêa na apanena iata na êvariku. Inê kê obania vigê taua aporo, hanana i gâga manga i nago. Inê kê bani hagahakura na mane ni me gahu, gê vatevatera ma kê bani hagarêgi na haka ni hearihatana. 4Inê kê kato, vigê bêbanu igê na agua, hanana vigê meraheariha na me, ga bani ruhuruhugi na agua ma na hinua igê.
5Hoi, tahema inê kê hagagatagatanigi na tamasinga hato iata na maneraha i nago taraku, ga kasigamu hura tenigi na takesi. 6Inê kê hagamarumungenigamu, kamu tagarahigi na haga iami maremi tanga na apanena iami. 7I Jerusaleme ma na ruma ni rotu karu page hato tenia na takesi. Na tangaruha hato, mu bani tagarahigi, ma na ara ni hinua na para nganganihaga, mu ogasigi, kaniga page oga nga vi na animi. 8Nikâ inê kê taruhi kasigi tare ki bê ki arâ na hagaba hato ga oga i pasimi i ngekê se i hemuri me tenia na maneraha. 9Pusina ma gê taua na apanena iaku, inê kê hagarahasigamu, igo ma igamu na Siu henia na ruma ni rotu, hanana i rongo raha na atami suria na maveta hagenani.”
10Igê na harisi 174 o Antioko ki banu igê na apanena iata na êvarina. Na mane ni me hato iana o Tiripone ka pane henia o Antioko, nga noga ma ta kereani kani oga ga so henia o Tiripone. 11O Antioko ki tarigenia o Tiripone ki gava tanga i Tore na hinua igê na tarasini. 12Ngaia ki girara, vi ngaia ki bagahagêguri, suria na mane ni me hato iana ka bani râ pania. 13O Antioko henira na 120.000 na mane ni me ramo ga tavo uga ma henira na 8000 na mane ni me igê na hosi, ngaia ki ogarihia i Tore. 14Na haka iana ka hagabara i asi. Vikana ngaia ki hagabarasia rihia ngavê na hinua. Na enoni ki bara ngavê vige huhura se vige bêbanu.
I Roma ki pane henira na Siu
15I na matena ngekana o Numenio ma na kariana ka aporo me i Jerusaleme tenia i Roma. Ngaira ka tora me na leta tangara na maneraha hehegitigi ma na agua hehegitigi. Na leta ki manga ikê:
16“Inê o Lusio, na bêna na gavumane i Roma, inê kê hagamauru koro tangago na maneraha o Potolemeo. 17Na Siu, ga bani naka na suruheri ni hekomaniha ma ni panepaneha henigami, ka hagatorangenira me na mane tora tamasinga, hanana ga hagagatagatania na suruheri ngekana. O Simone na mane ni vogasiha i teha, ma na Siu kaniga hagatorangenira me. 18Ngaira ka merâ me na mahatanga na bêata na golo, na higahigana ki 500 kilo. 19Tahema igami kami kato, vigami segesege tangara na maneraha hehegitigi ma na agua hehegitigi, hanana siana hagetage, vige hagaerasira na Siu, se vige taharigi na hinua iata se vi na marâ iata. Siana ka meraheariha na Siu se vige panepane henira na ani ga taharira na Siu. 20Igami kami aganaria na bêata iata ma kami suru vigami anumasira nga. 21Tahema, manga vi tani na eragani nuni ma ka gavagava tenia i Jutea, hanana viga rukuruku i pasimu, hoi, go tagarenira tanga o Simone na mane ni vogasiha i teha, hanana i hagaitangira surigi na ramata iata na Siu.”
22O Lusio ki kasia na leta ngekana tangara na maneraha o Temeterio, o Atalu, o Ariarate mo Arasake, 23ma tangagi na agua igê: i Samapasame, i Saparata, i Telose, i Minitose, i Sikione, i Karia, i Samose, i Pamipilia, i Lisia, i Halikaranaso, i Rotesi, i Paselisi, i Kose, i Site, i Aratu, i Gorotina, i Kineto, i Saipero me Sairini. 24Ta na leta ngaia ki kasia nikâ tanga o Simone na mane ni vogasiha i teha.
Na pita o Antioko ki kasi renia o Simone
25Igê na matena ngekana na maneraha o Antioko ki ama ni ogarihia nga i Tore. Ngaia ki bonasira na mane ni me iana ka ama ni taharia nga. Ngaia ki tagarahigi na bea ni tahariha. Ngaia ki hagabarasira banu o Tiripone ma na me iana, hanana vi siana ka huhura se vige bêbanu. 26O Simone ki hagatorangenira na 2000 na mane ni me ramo henigi na siliva ma na golo ma rako na tangaruha, hanana i tamania o Antioko renigi. 27Ma o Antioko ki usitenira. Vige manga ngekana ma ki purigi so ma i ano na bani suruheri iana henia o Simone ma ki haganega ki merongasia.
28Hemuri o Antioko ki hagatorangenia o Atenobio na mane ni hagaotonga i tako togo renia, hanana i metamasi o Simone, ki hagarongoa, ki vi: “Igo ko têgi i Jopa, i Gesere ma na ruma na para nganganihaga i Jerusaleme. Ngaigi ka na hinua iaku, mareha vi igo. 29Igo ko ruhuruhugi na apaneni ngegana. Igo ko hagamamasiaga ngavê na apanena iaku. Igo ko henahuraugi rako na agua iaku. 30Hoi, gu vateê me aporo na hinua go henahuraugi ngegana. Gu vateê nga na haga na takesi, go tavogi tenigi na hinua, go têgi i na apanena hura i Jutea. 31Manga i mareha, hoi, go vuriê renigi na 15.000 kilo na siliva henigi na 15.000 kilo na siliva nikâ, baruna na ruhuruhuani go katogi, ma na haga na takesi ga pe tarahuê. Manga i mareha nikâ, hoi, igami kami page megoheariha.”
32Matena o Atenobio ki ata me i Jerusaleme ma ki bâsigi na bâkorohani na ruma raha iana o Simone, na apira ma na kâkâ na golo ma na siliva igê na kiboru raha ni ngêra ma na ruruguha raha iana, ngaia ki kone ngavê. Ngaia ki hagatarêngenia na tamasinga iana na maneraha tanga o Simone. 33O Simone ki arami, ki vi: “Igami ki mareha rârâ, vigami parênigi na mako tenira na enoni getera se vigami rêgi na anima na nahuninga iata na enoni getera. Igami kami têgi aporo ma hete na nahuninga iata na êvarimami, na mako na merongamami ga bani rêgi tenigami i nago. 34I ngekê nga ki na matena iamami mi taugi aporo igê na nahuninga iata na êvarimami. 35Tangarerua i Jopa ma i Gesere, go pusirerua, igami kami agana, hanana mi vatego na 3000 kilo na siliva, henaka vi na enoni igê na hinua ngegana ka hagamamasiagagami ngavê na Siu ma ka ruhuruhua na apanena iamami.”
36O Atenobio ki pe arami bê aporo rârâ. Ngaia ki mangariaga ma ki aporo i pasina na maneraha o Antioko. Ngaia ki hagarongoa na maneraha renia na aramiha iana o Simone ma renigi na bâkorohana na ruma raha iana o Simone henigi na ruruguha igê, ma renigi na ara ni marâ hato i bâsigi i ngekana. Na maneraha ki mangariaga raha teha ngavê.
O Kentebeo ki merongasia i Jutea
37I na matena ngekana o Tiripone ki tage igê ta na haka ma ki gava ki râ i Orotosia. 38Na maneraha o Antioko ki naka na tarasini i ruguhana o Kentebeo. Ngaia ki vatea renira na mane ni me ga tavo uga ma na mane ni me igê na hosi. 39Ngaia ki bonasia ki taharia i Jutea ma ki tagarahia aporo na hinua i Kiterone ma ki hagagatagatanigi na maani para igê, hanana i girara i meraheariha na Siu. Ngaia na maneraha ki râ ki tarigenia o Tiripone.
40O Kentebeo ki râ i Jaminia ma ki haganega ki merongasira na Siu. Ngaia ki gaha banu i Jutea ki taharia. Ngaia ki henahuraura na enoni ma ki mutera. 41Ngaia ki tagarahia aporo i Kiterone ma ki nakara igê ta na apaneni na mane ni me igê na hosi ma ta na apaneni ma mane ni me ga tavo uga, hanana ngaira ka gaha banu ka taharia i Jutea ma ka hagabarasigi na tara igê, suria na bonasiha iana na maneraha tanga.
Currently Selected:
1 MAKABEO 15: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific