Génesis 39

Yora JosÉ yantaveetaqueneri Potifar

1Ari yayeetantanacariri JosÉ anta Egiptoqui, ipimantapaaqueri. Irio amanantavaqueriri Potifar yora amitacotiriri pincatsaritatsiri Egiptoqui, iriotaque jivatacairiri manayetachari shentajeitiriri. 2Iro cantaincha quiso yoaqueri Tasorentsi JosÉ. Cameetsa isaviquimotapaaqueri nampitavacariri, yantaveetapaaqueneri. 3Impoiji iotanaqueri nampitavacariri quiso yoaqueri Tasorentsi. Iriotaque amitacotaqueriri yantaveetantacanariri cameetsa. 4Irotaque ineacameetsatasanotantacariri. Ipeaqueri amitacotiriri aisati amenacantayetirori maaroni timimoyetiriri ivancoqui. 5Intantacarori JosÉ yamenaqueneri timimotiriri Potifar, itasoncacoventaqueneri Tasorentsi maaroni timimotiriri ivancoqui, aisati ivanquirepee jeri ivirapee, yoshequiasanotantanacari. 6Ari imataquero yamenacantaquero maaroni icantaqueriri. Tecatsi inquenqueshireaje Potifar, apatiro irointi iquenqueshireapiniti iroyea.

Yora JosÉ cameetsa icanta, icameetsavorotaque. 7Ari osamanitanaque isaviquimotaqueri JosÉ Potifar. Ora ijina oneaqueri icameetsavorotaque. Oquenqueshireasanotaqueri onevetacari. Aparo quitaiteri ocantavetari:

—Nocoaque poonayena.

8Iro cantaincha te incoyeji. Icantanaquero:

—Teeve, te oncameetsateji noonayempi. Pamene, ineacameetsataquena pijime, icantaquena namenacantiro maaroni timimoyetiriri. Meeca nosavicaque aca, tecatsi inquenqueshirete. 9Aca ivancoqui te intimeji pashini quempetenaneri; tempa ishinetaquenaro maaroni paitapeerica. Tecatsi intsaneacotena, apaniroquea avinti; tempa avirotaque ijina. Te noncoyeji noonayempi aisati te noncoyeji nantimoteri Tasorentsi caari cameetsatatsi.

10Ocantani ocantapinivetari maaroni quitaiteripeequi iroonayerome, aisati intsipatearome quempeji. Te inquemisanteroji. 11Iro cantaincha aparo quitaiteri ijataque JosÉ pancotsiqui tsompoina irantaveetantajeari. Te intimaiteji nampirentsipee, 12irosati ajiricacotantavacari iitsaarequi, ocantiri:

—Jentsiqueti, poonayena.

Iro cantaincha itsaneanaca, ishiapitsatanacaro. Irointi yojocanaque iitsaare acoqui. 13-15Oneantacariri ishianaca yojocanaquero iitsaare, irosati ocajemantanacari nampirentsipee. Ocantiri:

—¡Pamenajeiteri yora hebreo inampitacari nojime, itseencajeitaquee! ¡Iqueashivetapaaquena, icoaveta irineavintsatename! Iro cantaincha nocajemacotaqueri, irosati ishiantanaca. Jero iitsaareca yojocanaqueri.

16Impoiji oquempoyeaquero iitsaare irosati yareetantajari ojime. 17Ocamantavaqueri:

—Yora piveranaro hebreo iqueashivetaquena nomaamentoqui, icoaveta irineavintsatename. 18Iro cantaincha iquemantaquenari nocajemacotavaqueri, irosati ishiantanaca. Jero meeca iitsaareca yojocanaqueri.

19Aitaque ocantacari iqueashivetaquena piveranaro. Iquemantacarori Potifar ocamantavaqueriri ijina, iquisasanotanaca. 20-21Irosati yaacantantacari, yoiminqueacantaqueri caravosoqui itimajeitinta itsipapee yoiminqueacantayetiri pincatsari. Iro cantaincha icantani Tasorentsi quiso yoaqueri JosÉ. Itasoncaventaqueri icantashireacaacari amenajeitiriri yoiminqueeyetiri ineacameetsatantacariri. 22Aisati ishinetaqueri iramenajeiteri yoiminquiyeetiri. Iriotaque cantacantirori paitarica irantayeteri. 23Ari imataquero maaroni icantaqueriri. Yamitacotaqueri Tasorentsi, cameetsa ijivatacaajeitaqueri itsipapee yoiminqueeyetiri. Yora amenajeivetariniri tecatsi inquenqueshireaje.

Currently Selected:

Génesis 39: cni

Highlight

Copy