Génesis 38

Yaantacari Judá ijina aisati itimaque itomipee

1Impoiji inijantareanaqueri Judá iriri aisati irirentipee, ijataque anta nampitsiqui pajitachari Adulam. Isaviquimotapaaqueri shirampari pajitachari Hira. 2-3Ari ineapaaquero tsinane canaasato, irishinto shirampari pajitachari Súa, yaapaaquero. Ari itimacaaquero itomi, ipajitaqueri Er. 4Impoiji itimacaajiro aisati, ipajitaqueri Onán. 5Ari ijatantacari anta nampitsiqui pajitachari Quezib. Itimaji aisati itomi, ipajitaqueri Selá.

6Yora Judá yaacaavetacari itomi Er ijina. Opajita Tamar. 7Iro cantaincha yora Er te incameetsateji. Te irineacameetsateroji Tasorentsi oca yantayetaqueri, irotaque yoamantacariri. 8Impoiji icantajiri iriori Onán:

—Paajero ijina pirentini. Pimoncaratero ocoiri pijinatsori, pintimacaajero otomi intimanteari irishanincatajeari iriori.

9Iro cantaincha yora Onán iotaque ariorica intimacaayevetaquearo itomipee, eiro itomintasanotaritsi iriori. Irotaque yojocantarori iyashi quipatsiqui, ariorica yoonaapinivetaro. Icoaque eiro intsomontetacantarotsi, eiroquea itimantajatsi irirenti irishanincatajeari. 10Yora Tasorentsi te irineacameetsateroji catsini yantaqueri Onán, irotaque yoamantacariri iriori. 11Ari icantavetaro iraniro:

—Pijatavajetsita anta ivancoqui piri pintimashitavajeatsita. Irantearitavajetsita notomi Sela, impoijiquea nompacaajempiri iriori.

Iro icantantacarori Judá, iquenqueshireaca: “Iraacaavetajearorica, ari incamaje iriori, inquempetajeari irirentipeeni.” Irosati ojatantaja Tamar iriqui osaviquimotapaajiri.

Amatavitaqueri Tamar Judá yantantacarori

12Ari avisanaque osarentsipee, irosati ocamantaca ijina Judá, irishinto Súa. Ipeacotantanajarori yoashiretacovetanacaro ijinani, irosati ijatantaca anta nampitsiqui pajitachari Timnat, isaviquinta ameetiriri irovishatepee. Itsipatanacari Hirá, yora tsipatapinitariri savicatsiri nampitsiqui Adulam. 13Ari oquemacotaqueri Tamar oconquiri ijataque anta Timnat irameeteri irovishatepee. 14Irosati osapocantanacaro oitsaare oquitsaayetari camajimentaaro. Oquitsaatanaca pashini aisati opashicavorotanaca, eiro iotanteetarotsi. Ojatanaque anta iqueantapiniyeetantaroriqui nampitsi pajitachari Enaim. Osaviquimotapaaquero avotsi jatantachari Timnat. Iro amatavitantacariri oconquiri, iotaque antearivetaca ini itomi pajitachari Selá, iro cantaincha te incoyeji impacaajero.

15Impoiji ipiaja Judá, irosati ineantapaacaro osavicaiti avotsinampiqui. Ijivetapaacaro iro antapiniyetiriri shirampari. Iro caari iotantapaajaro, opashicavorotaca. 16Ari itempaashitanaquero, te irioteroji irointi iraniro. Icantapairo:

—Pishinetena nantempi.

Ocantanaqueri iroori:

—¿Paita pimpajenari ariorica pantaquena?

17Icantiro:

—Ari nontiancacantajempi chiivojaniqui.

Ocantanaqueri:

—Jee, ari. Iro cantaincha pojocanaquenari timimotimpiri, niotanteari queariorica pintiancacantajenari picantaquenari.

18Ari isampitiro:

—¿Paita picoiri nompanaquempiri?

Ocantanajiri:

—Iro pimpanaquenari piviritsate otimantari piseeyote, aisati pinchaquiire pajiricaquerira.

Ari ipaquero. Irosati yantantacaro, itsomontetacaaquero. 19Impoiji opianaja Tamar onampiqui. Opashireavorotapaaja aisati oquitsaatapaajaro oquitsaatapinitari camajimentaaro.

20Ari ipavetacari Judá itsipatapinitari yora Hirá adulamasati, chiivojaniqui. Itiancacantavetajanarori oipiantajeanaririme ipanaquerori. Iro cantaincha te irineajeroji. 21Irosati isampitantacari savicajeitatsiri nampitsiqui. Icantiri:

—¿Jaocame iroori tsinane antapiniyetiriri shirampari, ora savicapinitatsiri avotsiqui pinampiqui Enaim?

Yacajeitanaqueri:

—Jampaquea, te ontimeji tsinane aca antapiniyeterineri shiramparipee.

Irotaque icantavaqueriri. 22Irosati ipiantanaja, icamantapaajiri Judá:

—Teeve aneeroji tsinane. Icantajeitavaquena savicajeitatsiri anta: ‘Te ontimeji aca tsinane antapiniyeterineri shiramparipee.’

23Icantanaqueri:

—Aitanaji, ocanteata ayerota ora nopayetanaquerori, ishirontimenteejeiteecari. Aitaquenea notiancacantavetajanarori chiivojaniqui, iro cantaincha te pineajanteroji.

Otimaqueri Tamar apite itomi Judá

24Ari yavisanaque mava cashiri icamanteetaqueri Judá:

—Ora paniro Tamar yoonaaquero pashinipee shirampari, meeca itsomontetacaaquero.

Ainiro meeca oquempoyeaca ivancoqui iri. Iquemantacari Judá, icantanaque:

—¡Te oncameetsateji oca antaqueri! ¡Pijate, poimisoquijaitero! ¡Pintayero!

25Yoimisoquijantacarori, ocantacantaqueri oconquiri. Ocantavaqueri:

“Yora ashitarori oca iriotaque tsomontetacaaquenari. Pamenasanotero paita ashiyetarori oca iviritsa otimantari seeyo aisati cotiquiirontsi.”

26Ineantajarori Judá, iotavajiro irointi irashi. Icantanaque:

—Cameetsataque oni antaqueri. Naintiquea te noncameetsateji. Narotaque cantacaacarori, te nompacaajeroji notomi Selá.

Impoiji te irampiitajeroji iroonaajero aisati.

27Otimajanitantacari Tamar, otsipajanitaca. 28Itimantacari, yoimisoquijaquero aparoni iraco. Ora amenaquerori omaavacotavaqueri quitioncatsari mampetsa. Ocanti: “Irio jivatatsineri intime yoca.” 29Iro cantaincha ipiavacotantanajari, impoiji irinti jivatashitapaajancha itsipa. Irotaque opajitantacariri ora amenaquerori Fares. Ocanti: “¡Jaoca piquenapaaqueri avirori, pijivatantapaajari!” 30Impoiji itimanaque iriori yora omaavacotavaqueri incaaranqui quitioncatsariqui mampetsa; opajitaqueri iriori ZÉrah.

Currently Selected:

Génesis 38: cni

Highlight

Copy