Apocalipsis 3

Da na'aqtac maye qaỹamaxa so 'amqaanataxanaxaicpi ye Sardis

1«'Auauo'o aca 'ere, nache 'auamaxa ñi namaxashec#3.1 Namaxashec: Qaimeten ye Apocalipsis 1.20. maye ilotague' nam ỹa'amaqten So Jesús maye netaña ye nỹecpi ye Sardis. Qoneta':

‹Aỹem maye Aỹem hueto'oto soua siete saq cha'alo la'añaxaco Ñim Lo'onatac 'Enauacna#3.1 Soua siete saq cha'alo la'añaxaco Ñim Lo'onatac 'Enauacna: Qaimeten ye Apocalipsis 1.4-5. qataq soua siete huaqaañi: Ñaq 'ana'axaỹaxana dam 'am sa'axatem:

Aỹem saỹaten 'enauac nam 'auo'ottacpi, qataq saỹaten da 'ana'aqtaguec da qoỹeetega Aỹem 'aualaxaguet. Qalaxaye de'era saishet da 'en. 2Qaq ỹoqo'oye qoñisheguem qome qataq 'ana'añaxat da 'auaỹamaxaañi na lataxacpi maye mashe huotaique da 'axaañi da 'auo'ottac, cha'aye Aỹem sela'a da mashe saishet da 'aualaxaguet Ñim Lo'onatac 'Enauacna. 3Qataq 'auennata'a 'enauac nam 'auaỹaten maye na'aqtaguec Ñim Lo'onatac 'Enauacna, ime, nache 'avi'eguelaqot Ñimaye qataq 'aualaxaguet. Qaq da saishet da nache qonetec de'era, nache 'am ñeqo'ona da sauo'o ca 'anhuaxanaguec, qataq 'am sevira qom mashe saishet da Aỹem 'auauotaique; sheeta'am ca cachaxaic da saishet da qaỹaỹaten ca laloqo' da nvi' da decache.

4Qalaxaye na nỹecpi na Sardis huo'o na netaña shiỹaxauapi na saishet da ỹo'ottac na qauem. Qaq ỹoqo'oye namayepi Aỹem hueta'aguet qome, ỹaatrañi caua alogo lapagaxaiqa maye naigui da dauegaxan, qataq da qui'itta lataxac. Qaq namayepi ỹataqta taiguet da qoỹami'.

5Qaq nam saishet da iqallem na lqalaiguesat qataq saishet da ỹaxanec da lpi'iỹaxac Aỹem, nache sanaxanaxanguilo caua alogo lapagaxaiqa, qataq saishet da sapalaxat ca le'enaxat maye nanettalec aca nere maye naneraxalate na qanca'alaxatec. Qataq sa'axatem Ñim Ita'a qataq na lamaxashecpi maye do'onataxaatacot Ñimaye.

6Qaq cam huo'oi naua ltela lauaco, qaq no'on da na'axaỹaxana da la'aqtac So Saqcha'a Na'añaxac Qui'itta da 'enapega na 'amqaanataxanaxaicpi.›»

Da na'aqtac maye qaỹamaxa na 'amqaanataxanaxaicpi ye Filadelfia

7Nataqa'en 'auauo'o aca 'ere, nache 'auamaxa ñi namaxashec maye ilotague' nam ỹa'amaqten So Jesús maye netaña ye nỹecpi ye Filadelfia. Qoneta':

«Aỹem maye ỹoqta 'eesa da Aỹem Llalec Ñim Lo'onatac 'Enauacna#3.7 Llalec Ñim Lo'onatac 'Enauacna: De'era la'aqtac na griego 'eeta': Qui'itta qaq damaye nache naigui da So Jesús ỹataqta lalamaxat Ñim Lo'onatac 'Enauacna. qataq selo'ogue da lo'onataxanaxac co'ollaxa so nta'a David. Da ivita da sauatoigui ca lasom, nache qaica ca ishet da ỹapogui, qaq da sapogui qalaq qaica ca ỹe'eguelaxalec da ỹauatoigui. Qaq nagui ñaq 'ana'axaỹaxana dam 'am sa'axatem:

8‹Aỹem saỹaten 'enauac nam 'auo'ottacpi, qataq saỹaten da Aỹem 'aualaxaguet qataq saishet da qonetega saq Aỹem 'auauatton, na'aictaxa da qaica ca la'amaqchec da 'ara'añaxac. Qaq ỹoqo'oye Aỹem 'ana'axaỹaxana: Aỹem 'am sanem da 'ardaqa' da Aỹem 'auo'onataxanot qataq qaica ca ishet da 'am nqanaxat. Aỹem 'am saconeguet, qaq ỹoqo'oye qaica ca ishet da 'am ỹapo'oguet. 9Ñaq 'aumeten dam so'otec ne'ena tenataxanaxaicpi maye lalamaxatpi so pa'aguenataxanaxaic. Namayepi 'eetega judiopi, qalaxaye saq 'en. Ỹoqo'oye Aỹem so'otec namayepi da 'am ỹa'atto'oto naua l-llectel, yaqto' ỹaỹaten namayepi da Aỹem ỹataqta 'am sauotec.

10'Enauac na huetalec ana 'alhua ivireguet qome na lqalaiguesat qataq nque'eenaxacpi. Huaña qome, nache saỹaten ca Aỹem pi'iỹa'a qataq ca saishet da Aỹem pi'iỹa'a. Qaq 'am qalaxaye 'am ñepaxattalec, cha'aye Aỹem 'aualaxaguet co'ollaq 'am shenapega da saishet da 'axanec da 'arpi'iỹaxac Aỹem. 11Qaq Aỹem saqaỹaloq da ñanac. Qaq ỹoqo'oye qoqueto'ot da 'aua'amaqteetac Aỹem, yaqto' saishet da huo'o ca ỹacona ca 'ansheetenaxat.

12Qaq cam saishet da iqallem na lqalaiguesat, qataq saishet da ỹaxanec da lpi'iỹaxac Aỹem, nache Aỹem sami' ca ndaqa' maye ỹataqta ỹo'oxoraq añi lo'onaxanaxaqui Ñim Lo'onatac 'Enauacna, qataq saishet da ca'ai añimaye. Qaq camayepi serelec da le'enaxat Ñim Ita'a maye Lo'onatac 'Enauacna qataq ca le'enaxat ye nỹecpi maye neta'ague da piguem. Qaq yemaye nacheye yem dalaxaic Jerusalén maye anacta. Nataqa'en serelec camayepi ca dalaxaic ỹe'enaxat.

13Qaq cam huo'oi naua ltela lauaco, qaq no'on da na'axaỹaxana da la'aqtac So Saqcha'a Na'añaxac Qui'itta da 'enapega na 'amqaanataxanaxaicpi.›»

Da na'aqtac maye qaỹamaxa so 'amqaanataxanaxaicpi ye Laodicea

14'Auauo'o nataqa'en aca 'ere, ime nache 'auamaxa ñi namaxashec maye ilotague' nam ỹa'amaqten So Jesús maye netaña ye nỹecpi ye Laodicea. Qoneta':

¡Aỹem maye ỹe'enaxat da 'Eesa! Qaq ỹe'enaxat de'era, cha'aye sapaxaguenataxaateguec da 'eesa na'aqtaguec Ñim Lo'onatac 'Enauacna, qaq saishet da satenataxaatac. Qataq chegoqchigui Aỹem da Ñim Lo'onatacna ỹo'ot 'enauacna. Ñaq 'ana'axaỹaxana dam 'am sa'axatem:

15Aỹem saỹaten 'enauac nam 'auo'ottacpi, qataq saỹaten da saishet da imauec da Aỹem 'aualaxaguet qataq saq 'amaqtaq da 'aralaxayec. ¡Qaq 'onaxaictaxa da imauec da Aỹem 'aualaxaguet, huo'otaq imauec da saishet da Aỹem 'aualaxaguet! 16Qalaxaye ye saishet da imauec da Aỹem 'aualaxaguet, nache Aỹem ỹataqta imauec da saishet da 'am saconeguet. 17Cha'aye 'am qonetega da 'am sallaxanec, qataq ỹataqta 'onaxaic da 'icỹaxac qataq qaica ca 'aueetaique. Qalaxaye saisheto' da 'anauattoola't da qaica ca 'aramaicỹaxac qataq qaica ca ye 'am qataq 'am choxoraq qataq saishet da 'anauaañi qataq qouetauec. 18Qaq ỹoqo'oye nagui 'am seqata da Aỹem 'auachegoxoto'ot qome da 'ausheenaxana cam ỹoqta 'eesa da 'am sallaxanec naqa'en. Cha'aye ca Aỹem chegoqo'ot ỹataqta 'eesa da lta'araic da lashiichiỹaxac, 'eeta'am ca oro da ime da nqatelaguec. Da saishet da 'auauotaique da huo'o ca 'ara'agaxa da qouetauec, nache 'auaconegueta naua anogo lapagaxaiqa maye 'am sanema da yaqto' 'aayiñi qataq na lata' naua 'ara'ai'te, da yaqto' ỹoqta 'anauaachiguiñi.

19Cha'aye Aỹem ỹataqta seviraxato'ot, qataq saỹamaxaañi da lataxac nam ỹauotaxatpi. Qaq ỹoqo'oye 'avi'eguelaqot Ñim Lo'onatac 'Enauacna qataq imauec da 'aualaxaguet.

20Aỹem sootaigui na 'anasom,

seuaxaatega't naua ihuaxaye.

Qaq da 'aua'axaỹa da iỹaxanaxac,

nache da Aỹem 'auauateguet,

qaq Aỹem senoxonoigui na 'arma'.

Ime, qaq qomi' nquia'axau' qome.

21Qaq cam saishet da iqallem na lqalaiguesat, qataq saishet da ỹaxanec da lpi'iỹaxac Aỹem, nache camaye ỹo'onataxanaxaua da seloxogue ana 'alhua, 'eeta'am da 'eetec co'ollaxa da sauegaxan, nache nagui ỹo'onataxanaxaua Ñim Ita'a da seloqtague' ana 'alhua.

22Da huo'oi naua qartelai lauacolli', qaq no'on da qana'axaỹaxañiỹa da la'aqtac So Saqcha'a La'añaxac Ñim Lo'onatac 'Enauacna da 'enapega na 'amqaanataxanaxaicpi.

Currently Selected:

Apocalipsis 3: LÑLE13

Highlight

Copy